Panagayunar​—Pagbalinennaka Kadi a Nasingsinged iti Dios?

‘Makatulong ti panagayunar tapno mausigmo ti espiritualidadmo ken ipalagipna kenka a saan a dagiti material a bambanag ti kapatgan iti biag.’​—KATOLIKO A BABAI.

‘Ti panagayunar tulongannaka a maaddaan iti relasion iti Dios.’​—JUDIO A RABBI.

‘Patiek a ti panagayunar ket maysa nga obligasion, ti kapatgan a pamay-an tapno maipakitak ti debosion ken panagyamanko iti Dios. Agayunarak gapu ta ay-ayatek ti Dios.’​—PASUROT TI PAMMATI A BAHA’I.

ADU a relihion iti lubong ti mangan-annurot iti panagayunar kas iti Budismo, Hinduismo, Islam, Jainismo, ken Judaismo. Patien ti adu a tattao a ti panangliklik iti taraon iti sumagmamano a tiempo pagbalinenna ti maysa a nasingsinged iti Dios.

Ania ti panagkunam? Rumbeng kadi nga agayunarka? Ania ti kuna ti Biblia maipapan iti daytoy a banag?

Panagayunar Idi Panawen ti Biblia

Idi panawen ti Biblia, nagayunar dagiti tattao gapu iti nadumaduma a rason nga inanamongan ti Dios. Dadduma ti nagayunar kas ebkas ti nakaro a leddaang wenno panagbabawi iti naaramidanda a basol (1 Samuel 7:4-6), tapno kiddawenda ti anamong wenno panangiwanwan ti Dios (Uk-ukom 20:26-28; Lucas 2:36, 37), wenno tapno ad-adda a maipamaysada ti panangutobda kadagiti bambanag.​—Mateo 4:1, 2.

Ngem dakamaten met ti Biblia dagiti panagayunar a di anamongan ti Dios. Nagayunar ni Ari Saul sakbay a nagkonsulta iti maysa a mannakiuman iti espiritu. (Levitico 20:6; 1 Samuel 28:20) Nagayunar met dagiti dakes a tattao a kas ken Jezebel ken dagiti panatiko a nangiplano iti pannakapapatay ni apostol Pablo. (1 Ar-ari 21:7-12; Aramid 23:12-14) Nagdindinamag met dagiti Fariseo gapu iti regular a panagayunarda. (Marcos 2:18) Kaskasdi, kinondenar ida ni Jesus, ken saanda a naay-ayo ti Dios. (Mateo 6:16; Lucas 18:12) Umasping iti dayta, saan a naay-ayo ni Jehova iti panagayunar ti dadduma nga Israelita gapu iti dakes nga aramid ken di umiso a motiboda.​—Jeremias 14:12.

Ipakita dagitoy a pagarigan a saan a ti panagayunar ti makaay-ayo iti Dios. Nupay kasta, adu kadagiti napasnek nga adipen ti Dios ti nagayunar tapno magun-odda ti anamongna. No kasta, nasken kadi nga agayunar dagiti Kristiano?

Obligado Kadi Dagiti Kristiano nga Agayunar?

Sigun iti bilin ti Mosaiko a Linteg, masapul a dagiti Judio ‘parigatenda dagiti kararuada,’ kayatna a sawen, agayunarda maminsan iti kada tawen bayat ti Aldaw ti Panangabbong. (Levitico 16:29-31; Salmo 35:13) Dayta laeng ti panagayunar nga imbilin ni Jehova kadagiti adipenna.a Masapul nga annuroten dayta dagiti Judio nga adda iti sidong ti Mosaiko a Linteg. Ngem saanen a maikalikagum kadagiti Kristiano ti panangannurot iti Mosaiko a Linteg.​—Roma 10:4; Colosas 2:14.

Nupay nagayunar ni Jesus maitunos iti Linteg, saan a dayta ti kangrunaan nga inaramidna. No kas pagarigan ta agayunar dagiti adalanna, imbagana kadakuada no kasanoda nga aramiden dayta, ngem dina pulos imbilin nga agayunarda. (Mateo 6:16-18; 9:14) Apay ngarud a kinuna ni Jesus nga agayunar dagiti adalanna kalpasan ti ipapatayna? (Mateo 9:15) Saan a bilin dayta. Iparparipirip laeng ni Jesus nga iti ipapatayna, nakaronto ti leddaang dagiti adalanna ket maawanandanto iti ganas a mangan.

Adda dua a salaysay ti Biblia a mangipakita a makaay-ayo iti Dios no pilien ti maysa ti agayunar buyogen ti umiso a motibo. (Aramid 13:2, 3; 14:23)b Ngarud, dagiti Kristiano saanda nga obligado nga agayunar. Kaskasdi, no ikeddeng ti maysa ti agayunar, rumbeng nga agannad kadagiti peggad.

Agannad Kadagiti Peggad

Ti maysa a peggad a rumbeng a liklikan no agayunar ket ti panagbalin a managinlilinteg. Namakdaar ti Biblia maibusor iti “sinsinan a kinapakumbaba.” (Colosas 2:20-23) Awan duadua a kagura ti Dios ti kasta a kababalin kas ipakita ti ilustrasion ni Jesus maipapan iti natangsit a Fariseo a nangipagarup nga isu ket nalinlinteg ngem kadagiti dadduma gapu iti regular a panagayunarna.​—Lucas 18:9-14.

Saan met nga umiso nga ipakaammo nga agay-ayunarka, wenno agayunarka gapu ta imbilin ti dadduma nga aramidem dayta. Sigun iti Mateo 6:16-18, imbalakad ni Jesus a personal a banag ti panagayunar, a sika ken ti Dios laeng ti makaammo.

Saan koma a pulos a panunoten ti maysa a ti panagayunar abbonganna ti basol. Tapno makaay-ayo iti Dios, ti panagayunar ket napakuyogan koma iti panagtulnog kadagiti lintegna. (Isaias 58:3-7) Mapakawan dagiti basoltayo babaen ti naimpusuan a panagbabawi, saan ket a babaen ti panagayunar. (Joel 2:12, 13) Ipaganetget ti Biblia a magun-odantayo ti pammakawan babaen ti di kaikarian a kinamanangngaasi ni Jehova a nayebkas babaen ti daton ni Kristo. Saantayo a mateggedan ti pammakawan babaen ti aniaman nga aramid, a pakairamanan ti panagayunar.​—Roma 3:24, 27, 28; Galacia 2:16; Efeso 2:8, 9.

Ipakita ti Isaias 58:3 ti sabali pay a gagangay a di umiso a kapanunotan. Ipagarup dagiti Israelita a rumbeng laeng a subadan ni Jehova ti panagayunarda, a kasla ket adda naimbag a nakem nga utang ti Dios kadakuada. Inyimtuodda: “Iti ania a rason a nagayunarkami ket saanmo a nakita, ken pinarigatmi ti kararuami ket saanmo nga imutektekan?” Adu met ita ti mangipagarup a gapu iti panagayunarda, rumbeng laeng a pakitaan ida ti Dios iti pabor kas subad iti inaramidda. Ditay koma pulos tultuladen ti kasta a kinaawan panagraem ken di nainkasuratan a kababalin!

Patien ti dadduma a mabalinda a mateggedan ti anamong ti Dios no parigatenda ti bagida babaen ti panagayunar, panangablat iti bagida, wenno aniaman nga umasping kadagita. Kondenaren ti Sao ti Dios dayta a kapanunotan, nga ipakitana a dagiti “nakaro a panangparigat iti bagi” ket “awan pategda iti panangsaranget” kadagiti dakes a tarigagay.​—Colosas 2:20-23.

Natimbeng a Panangmatmat

Saan nga inkapilitan ti panagayunar; ngem saan met a dakes. Mabalin a makagunggona dayta iti dadduma a kasasaad no la ket ta liklikan dagiti nadakamat a peggad. Ngem saan a ti panagayunar ti pakaibatayan ti makaay-ayo a panagdayaw. “Ti naragsak a Dios” a ni Jehova kayatna a naragsak dagiti adipenna. (1 Timoteo 1:11) Kuna ti Saona: “Awanen ti nasaysayaat kadakuada ngem ti . . . tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.”​—Eclesiastes 3:12, 13.

Masapul a naragsak ti panagdayawtayo. Ngem ti Biblia dina pulos inaig ti panagayunar iti kinaragsak. Maysa pay, no agpeggaden ti salun-attayo gapu iti panagayunar wenno maibus ti pigsatayo nga agpaay koma iti naragsak a trabaho nga intalek ti Namarsua kadagiti pudno a Kristiano​—ti panangiwaragawag ti naimbag a damag maipapan iti Pagarian​—iti kasta, nalawag a saanen a makagunggona dayta.

Agayunartayo man wenno saan, ditay koma ukomen dagiti dadduma. Saan koma nga agbalin nga isyu dayta iti nagbabaetan dagiti pudno a Kristiano, “ta ti pagarian ti Dios saanna a kaipapanan ti pannangan ken iyiinum, no di ket kaipapananna ti kinalinteg ken talna ken rag-o buyogen ti nasantuan nga espiritu.”​—Roma 14:17.

[Footnotes]

[Blurb iti panid 28]

Iparangarang dagiti Fariseo ti sinsinan a kinapakumbaba no agayunarda

[Blurb iti panid 29]

“Ti pagarian ti Dios saanna a kaipapanan ti pannangan ken iyiinum, no di ket kaipapananna ti kinalinteg ken talna ken rag-o”

[Kahon iti panid 29]

Ti Ngay Kuaresma?

Ti 40 nga aldaw a panagayunar bayat ti Kuaresma ket makuna a pananglaglagip iti 40 nga aldaw a panagayunar ni Kristo. Kaskasdi, di pulos imbilin ni Jesus kadagiti adalanna a laglagipenda ti panagayunarna ken awan met ti pammaneknek nga inaramidda dayta. Ti umuna a mapagpannurayan a reperensia a nangdakamat iti 40 nga aldaw a panagayunar sakbay ti Paskua ti Panagungar ket nalabit kadagiti surat ni Athanasius a napetsaan ti 330 K.P.

Yantangay nagayunar ni Jesus kalpasan ti bautismona saan ket a sakbay ti ipapatayna, agparang a di umiso ti panangrambak ti dadduma a relihion iti Kuaresma bayat dagiti lawas sakbay ti Paskua ti Panagungar. Ngem ti 40 nga aldaw a panagayunar iti umuna a paset ti tawen ket gagangay kadagiti nagkauna a Babilonio, Egipcio, ken Griego. Dayta a “Nakristianuan” a kostumbre ket nalawag a namunganay kadakuada.