Surat Manipud Bolivia
Naragsak ken Mananginanama iti Laksid ti Kinapanglaw
AGSERSERBIAK kas misionera iti napanglaw a pagilian ngem diak latta mairuam ti bagik a makakitkita iti kinapanglaw ken kinaawan namnama. Kayatko koma a dagus nga agpatinggan ti panagsagaba ti amin. Ngem ammok a ti laeng Pagarian ti Dios ti makarisut kadagita a parikut. Nupay kasta, namin-adun a nakitak nga iti laksid dagiti narigat a kasasaad, naragsak dagiti tattao a mangyap-aplikar iti Sao ti Dios. Ni Sabina ti maysa kadakuada.
Adu a tawenen ti napalabas, ubba-ubba ni Sabina ti dua a babassit pay nga annakna a babbai idi impaluganna ni lakayna iti daanen a bus a mapan iti sabali a pagilian tapno agsapul iti panggedan a pakabirokanna iti dakdakkel a sueldo. Bayat nga ur-urayenna ti panagawid ni lakayna, nagtulid ti bulbulan ken tawtawen, ngem pulos a din nagsubli. Sipud idi pimmanaw ni lakayna, inaldaw nga insakad ni Sabina ti panagbiagna ken ti dua nga annakna a da Milena ken Ghelian.
Iti maysa a malem, naam-ammok ni Sabina bayat a siaanus a mangas-asikaso kadagiti agiinnuna nga aggatang iti tiendaan ni manangna. Madlawko kadagiti nalanay a mata ni Sabina nga isu ket nabannogen iti agmalem a panagtrabahona. Intukonko ti panagadal iti Biblia kenkuana ken kadagiti annakna. “Kayatko koma,” kinunana, “ngem okupadoak unay. Nupay kasta, mabalinmo nga iyadalan dagiti annakko.” Immannugotak. Iti agtultuloy a panangyadalko kadagiti annakna, naam-ammok ni Sabina ken naawatak ti sasaadenna.
Agriing ni Sabina iti alas kuatro ti parbangon. Bayat a matmaturog pay dagiti annakna iti bassit a kuarto a pagnanaedanda, isaangnan ti daan nga aluminum a kaserola. Lutuennan ti karne a palaman dagiti ilakona nga empanada a pagbiagda nga agiina. Iti rabii sakbay a naturog, minasanan ti arina para kadagita a naimas nga empanada.
Iti binulodna a kariton, siaannad nga ikarga ni Sabina amin nga alikamen a masapulna iti agmalem—linong, kosinilia, sangabote a gas, lamisaan, tugtugaw, kaserola, pariok, manteka, karne, namasa nga arina, ken ginalon a tinemplana a mainum a tubbog ti prutas.
No agalas saisen, nakasaganan a rummuar ni Sabina ken ti dua nga annakna. Irikep ken ikandadodan ti ridaw ti kuartoda. Awan gaganaygayan ti ruprupada; awan ti agun-uni wenno agkatkatawa. Naipamaysa ti pigsa ken panunotda iti aramidenda. Namin-adun a nakitak ti kastoy a buya iti agsapa no tuman-awak iti tawa ti balay a pagnanaedanmi a misionero ken misionera. Wen, maysa laeng ni Sabina iti nagadu a babbai a pumanawen kadagiti pagtaenganda sakbay pay nga aglawag tapno mapan aglako iti makan ken mainum kadagiti kalsada ti Bolivia.
Iti alas 6:30 ti bigat bayat a sumingisingen ti init iti bantay, nakadanonen da Sabina ken dagiti annakna iti disso a paglakuanda. Nakaul-ulimekda a mangidiskarga kadagiti gargaretda iti kariton sada iplastar ti paglutuanda. Sumaretseten ti umuna nga empanada a maiprito iti agburburek a manteka. Iti nalamiis nga angin ti agsapa, agayamuomen dagiti naimas nga empanada isu a dagus nga umasideg dagiti mabisin nga aggatang.
“Manot’ gatangem?” iyimtuod ni Sabina iti umuna a gumatang. Uray no saan a kumitkita, ti di pay unay namurmurayan a lalaki ingatona ti dua a ramayna isu nga iyawatan ni Sabina iti dua a kaad-adaw ken pamalitoken a kayumanggi nga empanada. Alaenna metten ti nalaka a bayad dagita. Ginasut a daras a kastoy ti ar-aramidenna iti inaldaw. Inton maibusen ti tagilakoda, ikargada manen ti gargaretda iti kariton sada agawid. Nupay nakasaksakiten dagiti gurong ni Sabina iti inaramidna iti agsapa, mapan iti maikadua a trabahona, iti tiendaan ni manangna.
Idi napanak iti tiendaan para iti damo a panangyadalko iti Biblia kadagiti annakna, nakasaganan ti dua a babassit a bangko iti suli. Sipud idi nangrugikami, da Milena ken Ghelian, nga agtawen iti 9 ken 7, ket magagaran ken nakasaganada a naimbag iti tunggal panagadalmi. In-inut a pimmasig kaniak dagitoy a managbabain nga ubbing. Naragsakan ni Sabina gapu iti dayta. Di nagbayag, inkeddengna metten ti makipagadal kaniak iti Biblia nupay mabambannog unay iti trabahona.
Bayat nga umad-adu ti pannakaammo ni Sabina, umun-uneg metten ti panagayatna ken Jehova a Dios. Isu ket naragsak itan! Nagbalbaliwen ti dati a mabambannog ken malmalday a rupa ti aglaklako iti igid ti kalsada. Deretson ti takderna, saanen a kanayon a nakadumog, ken naraniagen dagiti matana. “Kanayonen a nakaisem ni Sabina,” kinuna ni manangna. “Saan idi a kasta.” Nakita met ti sabsabali ti dakkel a nagbaliwan ni Sabina ken dagiti annakna. Mapempennek itan ti nabayagen a tarigagayna a mangammo iti kinapudno maipapan iti Dios ken kadagiti panggepna.
Maragragsakan ni Sabina iti panagadalna ngem gapu iti narigat a trabahona, di pay la makatabuno kadagiti Nakristianuan a gimong. Kamaudiananna, pinatganna met la ti awisko nga umay idiay Kingdom Hall. Sipud idin, kanayonen a makigimong. Nakasarak ni Sabina kadagiti pudno a gagayyem iti uneg ti kongregasion. Napaneknekanna met a pudno nga ipaay ni Jehova ti kasapulan dagidiay agayat ken agsakripisio nga agserbi kenkuana.—Lucas 12:22-24; 1 Timoteo 6:8.
Ipatpateg ni Sabina dagiti maad-adalna, ken tarigagayanna nga iranud dagita. Ngem kinunana, “Agnerbiosak no panunotek ti maipapan iti panangasaba.” Pampanunotenna, ‘Kasanoak ngata a makaisuro iti sabali idinto ta managbabain ken nababa laeng ti adalko?’ Nupay kasta, natignay a mangaramid iti daytoy nagpateg nga addang gapu iti naipakita kenkuana nga asi ken iti nagsayaat a panagbalbaliw ti mismo a kabibiagna. Naamirisna met nga isu ket nasken nga agbalin a pagwadan dagiti annakna. Gapuna, rinugianna nga iranud ti naimbag a damag ket nagagaran met dagiti annakna a nangaramid iti kasta.
Ita, ni Sabina ket saanen a basta napanglaw a babai nga inaldaw a mabambannog ken naliday nga agtartrabaho. Saan unay a nagbalbaliw ti pinansial a kasasaadna ngem nagbalbaliwen ti panangmatmatna iti biag. Kas bautisadon a Kristiano, iranranudnan ti naimbag a damag ti Pagarian ti Dios—ti kakaisuna a permanente a solusion ti kinapanglaw ken kinaawan namnama iti daytoy a lubong.—Mateo 6:10.
Alas singko manen ti parbangon. Nakasaganan ni Sabina a rummuar manipud iti bassit a kuarto a pagnanaedanna. Ngem saan a mapan aglako iti empanada. Isu ket makitaripnong kadagiti padana a Saksi ni Jehova a mapan mangasaba kadagiti kalsada. Ad-adda pay a rimmagsak gapu ta us-usarenna ti sumagmamano a tiempona iti tunggal lawas tapno agboluntario a tumulong iti sabsabali. Inkandadona ti ridawda sa nakaisem a napan iti kalsada. Imbes nga agiduron iti kariton, nakaiggem iti bag a nakaikargaan ti Bibliana ken dagiti naibatay-Biblia a literatura nga usarenna a mangirakurak iti mensahe a mangyeg iti namnama. Sikokompiansa nga immisem ni Sabina ket kinunana, “Diak pulos impagarup a kabaelak gayam nga iranud ti mensahe ti Biblia.” Sana innayon, “Magusgustuak dayta!”