PANAGBIAG KAS KRISTIANO
Kaanoak Manen a Makapag-auxiliary Pioneer?
Ti sirmata ni Ezequiel maipapan iti templo ipalgakna a mangipaayto ti ili ni Jehova kadagiti boluntario a daton. Ania dagiti mabalintayo nga aramiden kas sakripisio ti panagdayawtayo?—Heb 13:15, 16.
Ti maysa a nagsayaat a pamay-an ket panag-auxiliary pioneer. Lima ti Sabado wenno Domingo ti dadduma a bulan iti 2018 a tawen serbisio. Nangnangruna a makatulong daytoy kadagiti agtrabtrabaho iti full-time ken kadagiti makapangasaba laeng iti ngudo ti lawas. Maysa pay, mabalin a pilien dagiti agibumbunannag no 30 wenno 50 nga oras ti abutenda bayat ti Marso ken Abril ken bayat ti bulan ti ibibisita ti manangaywan iti sirkito.
No ngay saan nga ipalubos ti kasasaad a makapag-auxiliary pioneer-tayo? Mabalintayo latta nga ikagumaan a pasayaaten ti kalidad ti ministeriotayo ken nayonan ti oras ti panangasabatayo. Aniaman ti kasasaadtayo, tignayennatayo koma ti ayattayo ken Jehova a mangipaay kenkuana iti kasayaatan bayat ti 2018 a tawen serbisio!—Os 14:2.
Kasano a matuladko ti kinaregta ni Sabina Hernández?
BUYAEN TI VIDEO NGA ITI TULONG NI JEHOVA, MAARAMIDKO TI DANDANI AMIN, SA SUNGBATAN DAGITOY A SALUDSOD:
Ania ti nangtignay ken Sabina a mangaramid iti ad-adu pay iti panagserbina ken Jehova?
Kasano a naparegtaka iti ulidan ni Sabina?
Bayat ti 2018 a tawen serbisio, ania a bulan wenno bulbulan a makapag-auxiliary pioneer-ka?