Tuladenyo ti Panagpampanunot ni Kristo
“Maaddaankayo ti isu met laeng a kababalin ti isip a naadda ken Kristo Jesus.”—ROMA 15:5.
1. Apay a nasken a tuladentayo ti panagpampanunot ni Kristo?
“UMAYKAYO kaniak,” kinuna ni Jesu-Kristo. “Agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mat. 11:28, 29) Daytoy naayat nga awis ni Jesus iyanninawna ti naasi a panagpampanunotna. Awan ti tao a nasaysayaat a pagwadan malaksid ken Jesus. Nupay isu ti mannakabalin nga Anak ti Dios, nangipakita iti empatia ken kinadungngo, nangnangruna kadagidiay agkasapulan.
2. Ania dagiti kababalin ni Jesus nga usigentayo?
2 Iti daytoy nga artikulo ken iti dua a sumaganad, usigentayo no kasanotayo a patanoren, taginayonen, ken iparangarang ti “panunot ni Kristo.” (1 Cor. 2:16) Adalentayo dagiti lima nga aspetona: ti kinaalumamay ken kinapakumbaba ni Jesus, ti kinamanangngaasina, ti kinatulnogna iti Dios, ti kinaturedna, ken ti di agkupas a panagayatna.
Tuladenyo ti Kinaalumamay ni Kristo
3. (a) Kasano nga insuro ni Jesus ti kinapakumbaba kadagiti adalanna? (b) Kasano a nagtignay ni Jesus kadagiti pagkapuyan dagiti adalanna?
3 Ni Jesus, ti perpekto nga Anak ti Dios, ket situtulok nga immay ditoy daga tapno agserbi iti tengnga dagiti imperpekto ken managbasol a tattao. Dadduma kadakuada ti mangpapatay kenkuana inton agangay. Kaskasdi, tinaginayon ni Jesus ti rag-o ken panagteppelna. (1 Ped. 2:21-23) No “kumitatayo a sipapasnek” iti ulidan ni Jesus, mataginayontayo met ti rag-o ken panagteppeltayo nupay makaaramid dagiti dadduma iti bambanag a mabalin a makaapektar kadatayo. (Heb. 12:2) Inawis ni Jesus dagiti adalanna a makikadua kenkuana a mangibaklay iti sangolna ket iti kasta, makasursuroda kenkuana. (Mat. 11:29) Ania ti masursuroda? Ti maysa ket ti kinaalumamay ni Jesus ken ti kinaanusna kadagiti adalanna iti laksid dagiti pagkapuyanda. Iti rabii sakbay ti ipapatayna, binugguanna dagiti sakada. Dayta ti nangisuro kadakuada nga agbalinda a ‘napakumbaba iti puso,’ banag a saanda a pulos a nalipatan. (Basaen ti Juan 13:14-17.) Idi agangay, idi saan a ‘nagtultuloy a nagbantay’ da Pedro, Santiago, ken Juan, siaasi a natarusan ni Jesus dayta a nagkapuyanda. “Simon, matmaturogka kadi?” insaludsodna. “Lallaki, agtultuloykayo nga agbantay ken agkararag, tapno saankayo a dumteng iti pannakasulisog. Ti espiritu, siempre, sigagagar, ngem ti lasag nakapuy.”—Mar. 14:32-38.
4, 5. Kasano a ti ulidan ni Jesus tulongannatayo a siuumiso nga agtignay no adda dagiti pagkapuyan dagiti kakabsattayo?
4 Ania ti aramidentayo no ti kapammatiantayo ket mannakikompetensia, arsagid, wenno marigatan a mangyaplikar iti balakad dagiti panglakayen wenno “ti matalek ken masirib nga adipen”? (Mat. 24:45-47) Nupay nalakatayo a palabsen ti kababalin a gagangay iti lubong ni Satanas, mabalin a marigatantayo a mangpakawan kadagiti pagkapuyan dagiti kakabsattayo. No nalakatayo a masair kadagiti pagkamalian ti dadduma, masapul nga isaludsodtayo iti bagitayo, ‘Kasano nga ad-adda a mayanninawko “ti panunot ni Kristo”?’ Laglagipentayo a saan a nakapungtot ni Jesus kadagiti adalanna, uray no nangipakitada iti naespirituan a pagkapuyan.
5 Usigentayo ti kaso ni apostol Pedro. Idi imbilin ni Jesus a dumsaag ni Pedro iti bangka ket magna iti rabaw ti danum tapno umasideg kenkuana, inaramid dayta ni Pedro ngem iti apagbiit laeng. Nakitana ngamin ti allawig isu a nangrugi a lumned. Nakapungtot kadi ni Jesus ket kinunana: “Gunggonam! Agnakemka”? Saan! “Idi inunnatna a dagus ti imana isu iniggaman ni Jesus ket kinunana kenkuana: ‘Sika a bassitan pammati, apay a nagduaduaka?’” (Mat. 14:28-31) No kas pagarigan ta ibilangmo a kimmapuy ti pammati ti maysa a kabsat, arigna kadi nga iyunnatmo ti imam tapno tulongam a bumileg ti pammatina? Dayta ti leksion a nalawag a masursurotayo iti kinaalumamay nga impakita ni Jesus ken ni Pedro.
6. Ania ti insuro ni Jesus kadagiti apostolna maipapan iti kinatan-ok?
6 Karaman met ni Pedro kadagiti gundaway a pagriririan dagiti apostol no asino ti katan-okan kadakuada. Kayat da Santiago ken Juan ti agtugaw iti makannawan ken makannigid ni Jesus iti Pagarianna. Idi nangngeg dayta ni Pedro ken ti dadduma nga apostol, nakapungtotda. Ammo ni Jesus a mabalin a nasursuroda dayta a kababalin iti kagimongan a dimmakkelanda. Inayabanna ida ket kinunana: “Ammoyo a dagiti agturay kadagiti nasion dominaranda ida ket dagiti naindaklan a tattao aramatenda ti autoridad kadakuada. Saan a kastoy kadakayo; no di ket siasinoman a kayatna ti agbalin a naindaklan kadakayo masapul nga agserbi kadakayo.” Kalpasanna, impatuldona ti mismo nga ulidanna: “Kas ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.”—Mat. 20:20-28.
7. Kasano a makatulongtayo iti panagkaykaysa ti kongregasion?
7 Ti panangutob iti napakumbaba a panangmatmat ni Jesus tulongannatayo nga ‘agtignay kas nanumnumo’ ngem kadagiti kakabsattayo. (Luc. 9:46-48) Mangyeg dayta iti panagkaykaysa. Ni Jehova, kas ama ti dakkel a pamilia, kayatna a dagiti annakna “agnaedda a sangsangkamaysa buyogen ti panagtutunos.” (Sal. 133:1) Inkararag ni Jesus iti Amana nga agkaykaysa ti amin a pudno a Kristiano tapno ‘ti lubong maammuanna nga imbaonnak ken inayatmo ida kas iti panagayatmo kaniak.’ (Juan 17:23) Iti kasta, ti panagkaykaysatayo ti mangipakita a pasurotnatayo ni Kristo. Tapno matagiragsaktayo dayta a panagkaykaysa, masapul a tuladentayo ti panangmatmat ni Kristo kadagiti pagkapuyan ti sabsabali. Manangpakawan ni Jesus ken insurona a magun-odtayo laeng ti pammakawan no agbalintayo a manangpakawan.—Basaen ti Mateo 6:14, 15.
8. Ania ti masursurotayo kadagiti nabayagen nga adipen ti Dios?
8 Adu met ti masursurotayo no tuladentayo ti pammati dagidiay nabayagen a mangtultulad ken Kristo. Kas ken Jesus, masansan a matarusanda dagiti pagkapuyan ti sabsabali. Nasursuroda a ti panangtulad iti kinamanangngaasi ni Kristo saannatayo laeng a tulongan nga agbalin a ‘naanus kadagiti pagkapuyan dagidiay di napigsa’ no di ket mangyeg pay iti panagkaykaysa. Kanayonanna, maparegta ti intero a kongregasion a mangiparangarang iti panagpampanunot ni Kristo. Kayatda nga aramiden met koma dayta dagiti kakabsatda, kas iti indagadag ni apostol Pablo kadagiti Kristiano idiay Roma: “Ti Dios a mangipaay iti panagibtur ken liwliwa ipalubosna koma kadakayo a maaddaankayo ti isu met laeng a kababalin ti isip a naadda ken Kristo Jesus, tapno buyogen ti panagkaykaysa maidaydayawyo ti Dios ken Ama ni Apotayo a Jesu-Kristo babaen ti maymaysa a ngiwat.” (Roma 15:1, 5, 6) Wen, ti sangsangkamaysa a panagdayawtayo ket pakaitan-okan ni Jehova.
9. Tapno matuladtayo ni Jesus, apay a kasapulantayo ti nasantuan nga espiritu?
9 Innaig ni Jesus ti ‘kinapakumbaba iti puso’ iti kinaalumamay, a paset ti bunga ti nasantuan nga espiritu ti Dios. Gapuna, malaksid iti panangadal iti ulidan ni Jesus, kasapulantayo ti nasantuan nga espiritu ni Jehova tapno siuumiso a matuladtayo ti kinaalumamayna. Nasken nga ikararagtayo ti nasantuan nga espiritu ti Dios ken ikagumaantayo a sukayen ti bungana—“ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Gal. 5:22, 23) Babaen ti panangtuladtayo iti kinapakumbaba ken kinaalumamay ni Jesus, maay-ayotayo ti nailangitan nga Amatayo a ni Jehova.
Naasi ti Pannakilangen ni Jesus
10. Kasano nga impakita ni Jesus nga isu ket naasi?
10 Ti kinamanangngaasi ket paset met ti bunga ti nasantuan nga espiritu. Kanayon a naasi ti pannakilangen ni Jesus. ‘Siaasi nga inawat’ ni Jesus ti amin a sipapasnek a nangbirok kenkuana. (Basaen ti Lucas 9:11.) Ania ti maadaltayo iti panagbalin ni Jesus a naasi? Ti naasi a tao ket mannakigayyem, naalumamay, mannakipagrikna, ken naimbag. Kasta ni Jesus. Naasian kadagiti tattao “agsipud ta nalalatan ken naiwarawarada a kasla karkarnero nga awanan pastor.”—Mat. 9:35, 36.
11, 12. (a) Mangisalaysay iti maysa a pagarigan a nangipakita ni Jesus iti asi. (b) Ania ti maadalyo iti nausig a pagarigan?
11 Impakita pay ni Jesus ti asi ken pannakipagriknana babaen ti aramid. Usigentayo ti maysa a pagarigan. Iti las-ud ti naunday a 12 a tawen, nagsagaba ti maysa a babai iti saan a gagangay a panagpadara. Ammona nga iti sidong ti Mosaiko a Linteg, isu ken ti asinoman a makasagid kenkuana ket maibilang a narugit nga agdayaw. (Lev. 15:25-27) Kaskasdi, gapu iti reputasion ken kababalin ni Jesus, isu ket kombinsido a kabaelan ken talaga a kayat a paimbagen ni Jesus. Kanayon nga ibagbagana: “No masagidko uray laeng dagiti makinruar a kawesna umimbagakto.” Idi naaddaan iti tured, inaramidna ti kasta ket dagus a nariknana nga immimbag.
12 Ammo ni Jesus nga adda nangsagid kenkuana isu a binirokna. Gapu ta madanagan ti babai di la ket ta tubngaren ni Jesus gapu iti pananglabsingna iti Linteg, agtigtigerger a nagruknoy iti sakaananna ket nagpudno. Tinubngar kadi ni Jesus ti agsagsagaba a babai? Saan a pulos! Makaliwliwa a kinunana: “Anak, ti pammatim pinaimbagnaka. Mapanka a sitatalna.” (Mar. 5:25-34) Naliwliwa la ketdi ti babai a nakangngeg kadagita a naasi a sasao!
13. (a) Kasano a naiduma ti kababalin ni Jesus kadagiti Fariseo? (b) Kasano ti panangtrato ni Jesus kadagiti ubbing?
13 Saan a kas kadagiti natangken ti panagpuspusoda a Fariseo, di pulos inusar ni Kristo ti autoridadna a mangnayon iti dadagsen ti sabsabali. (Mat. 23:4) Imbes ketdi, siaasi ken siaanus nga insurona kadakuada dagiti daldalan ni Jehova. Nakadungdungngo ni Jesus kadagiti pasurotna, kanayon a naayat ken naasi, ken maysa a pudno a gayyem. (Prov. 17:17; Juan 15:11-15) Nadekket ni Jesus kadagiti ubbing ken saanda met nga alusiisen kenkuana. Kanayon nga adda panawenna kadakuada. Naminsan, gapu iti panagrikna dagiti adalan a nakapatpategda unay a kas kadagiti lider ti relihion, linapdanda dagiti tattao a mangyasideg kadagiti annakda tapno iggaman ida ni Jesus. Saan a naay-ayo ni Jesus iti dayta nga inaramid dagiti adalanna. Kinunana kadakuada: “Bay-anyo dagiti ubbing nga umay kaniak; dikay padasen a pawilan ida, ta ti pagarian ti Dios kukua dagiti kasta.” Kalpasanna, inusarna dagiti ubbing tapno mangisuro iti maysa a leksion, a kinunana: “Pudno kunak kadakayo, Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.”—Mar. 10:13-15.
14. Ania dagiti magunggona dagiti ubbing a maipaayan iti napasnek a pannakaseknan?
14 Panunotenyo biit no ania ti narikna dagidiay nga ubbing idi dimmadakkeldan, idi nalagipda no kasano nga ‘innala ida ni Jesu-Kristo kadagiti takiagna ket rinugianna a binendisionan ida.’ (Mar. 10:16) Maragsakan met dagiti ubbing ita no malagipdanto ti naayat ken di agimbubukodan a pannakaseknan kadakuada dagiti nataengan ken dadduma pay. Napatpateg pay, dagiti ubbing a nakarikna iti kasta a napasnek a pannakaseknan manipud iti kongregasion mabigbigda nga adda ti espiritu ni Jehova iti ilina.
Mangipakita iti Asi iti Awanan Asi a Lubong
15. Apay a ditay pakasdaawan ti kinaawan iti asi ita?
15 Marikna ti adu a tattao ita nga awan ti tiempoda a mangipakita iti asi kadagiti dadduma. Gapuna, iti eskuelaan, pagtrabahuan, bayat ti panagbiahe, ken iti ministerio, inaldaw a maipaspasango ti ili ni Jehova iti espiritu ti lubong. Mabalin a maupaytayo iti kinaawan asi dagiti tattao ngem saantay koma a pakasdaawan dayta. Ni Jehova pinaltiinganna ni Pablo tapno pakdaarannatayo nga agbiagto dagiti pudno a Kristiano iti napeggad a ‘maudi nga al-aldaw,’ iti tengnga dagiti tattao a ‘managayat iti bagbagida ken awanan iti nainkasigudan a panagayat.’—2 Tim. 3:1-3.
16. Kas panangtulad ken Kristo, kasanotayo a maipakita ti asi kadagiti kakabsat?
16 Iti kasumbangirna, makapagin-awa ti kasasaad iti uneg ti pudno a kongregasion Kristiano. Babaen ti panangtulad ken Jesus, makatulongtayo amin iti panangtaginayon iti dayta a makaay-ayo a kasasaad. Kasano? Adu a kakabsat ti agkasapulan iti tulong ken pammaregta gapu kadagiti pakaipaspasanguanda a parikut iti salun-at wenno iti dadduma pay a karit. Kadagitoy ‘maudi nga al-aldaw,’ kumarkaro pay dagita a parikut, ngem saan a pakasdaawan dayta. Idi panawen ti Biblia, nagsagaba dagiti Kristiano kadagiti kasta a parikut. No kasano a kasapulanda idi ti tulong, kastatayo met ita. Ni Pablo, kas pagarigan, indagadagna kadagiti Kristiano nga ‘agsaoda iti makaliwliwa kadagiti malmaldaangan a kararua, saranayenda dagiti nakapuy, maaddaanda iti mabayag a panagitured iti isuamin.’ (1 Tes. 5:14) Agkalikagum daytoy iti panangipakita iti asi a kas iti imparangarang ni Kristo.
17, 18. Ania ti dadduma a pamay-an a matuladtayo ti kinaasi ni Jesus?
17 Maikalikagum kadagiti Kristiano a ‘siaasi nga awatenda dagiti kakabsatda,’ a tratuenda ida kas iti panangtrato ni Jesus kadakuada, a mangipakitada iti pudno a pannakaseknan kadagidiay nabayagen ken nabiit pay nga am-ammoda. (3 Juan 5-8) No kasano a ni Jesus ti immuna a nangipakita iti asi kadagiti dadduma, kastatayo met koma, a kanayon a makapabang-artayo iti sabsabali.—Isa. 32:2; Mat. 11:28-30.
18 Maipakitatayo ti asi babaen ti panangaramid iti banag a pagimbagan dagiti sabsabali. Mangbirok kadagiti pamay-an ken gundaway a maaramidtayo dayta! “Iti nainkabsatan nga ayat maaddaankayo iti kinalailo iti maysa ken maysa,” indagadag ni Pablo, sa innayonna: “Iti panangipakita ti pammadayaw iti maysa ken maysa mangidaulokayo.” (Roma 12:10) Kaipapanan dayta ti panangsurot iti ulidan ni Kristo, panagbalin a naasi ken nadungngo, nga ipakita ti “ayat a saan nga aginsisingpet.” (2 Cor. 6:6) Kastoy ti panangiladawan ni Pablo iti dayta a Nakristianuan nga ayat: “Ti ayat mabayag-panagituredna ken manangngaasi. Ti ayat saan a managimon, saan nga agpangas, saan nga agtangsit.” (1 Cor. 13:4) Imbes a mangimula iti sakit ti nakem kadagiti kakabsat, ipangagtayo daytoy a balakad: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa no kasano a ti Dios sibubulos a nangpakawan met kadakayo babaen ken Kristo.”—Efe. 4:32.
19. Ania dagiti nasayaat a resulta ti panangipakita iti Nakristianuan nga asi?
19 Adu ti magunggonatayo no ikagumaantayo a patanoren ken ipakita ti asi nga imparangarang ni Kristo iti aniaman a tiempo ken kasasaad. Siwayawaya nga agandar ti espiritu ni Jehova iti uneg ti kongregasion, a tumulong iti tunggal maysa a mangpatanor iti bunga ti espiritu. Kanayonanna, no tuladentayo ti ulidan ni Jesus ken tulongantayo ti dadduma a mangaramid iti dayta, pagrag-oanto ti Dios ti naragsak ken nagkaykaysa a panagdayawtayo. Gapuna, kanayon nga ikagumaantayo nga iparangarang ti kinaalumamay ken kinamanangngaasi ni Jesus iti pannakilangentayo iti sabsabali.
Mailawlawagyo Kadi?
• Kasano nga impakita ni Jesus nga isu ket ‘naalumamay ken napakumbaba ti pusona’?
• Kasano nga imparangarang ni Jesus ti asi?
• Ania ti dadduma a pamay-an a maipakitatayo ti Nakristianuan a kinaalumamay ken kinaasi iti daytoy imperpekto a lubong?
[Ladawan iti panid 8]
Tulongantayo kadi ti kabsattayo no kumapuy ti pammatina, kas napasamak ken Pedro?
[Ladawan iti panid 10]
Kasano a makatulongkayo tapno agraira ti asi iti uneg ti kongregasion?