Ti Ayat ni Kristo Tignayennatayo nga Agayat
“Ni Jesus, yantangay inayatna ti kukuana nga adda iti lubong, inayatna ida agingga iti panungpalan.”—JUAN 13:1.
1, 2. (a) Kasano a naisangsangayan ti ayat ni Jesus? (b) Ania nga aspeto ti ayat ti usigentayo iti daytoy nga artikulo?
NANGIPASDEK ni Jesus iti perpekto nga ulidan ti ayat. Amin a maipapan kenkuana—ti panagtigtignay, panagsasao, pannursuro, ken ti sakripisio nga ipapatayna—ket mangyanninaw iti ayatna. Agingga iti ipapatayna, impakita ni Jesus ti ayatna kadagiti nakalangenna nangnangruna kadagidiay adalanna.
2 Ti naisangsangayan nga ulidan ni Jesus iti ayat ket maysa a nangato a pagalagadan a masapul nga annuroten dagiti pasurotna. Tignayennatayo met a mangipakita iti kasta nga ayat kadagiti kapammatiantayo ken iti sabsabali. Iti daytoy nga artikulo, usigentayo no kasano a matulad dagiti panglakayen ti ayat nga impakita ni Jesus kadagidiay nakaaramid iti biddut, uray pay nadagsen a basol. Usigentayo met no kasano a ti ayat ni Jesus tignayenna dagiti Kristiano a tumulong kadagiti kapammatianda iti tiempo ti pakarigatan, didigra, ken sakit.
3. Iti laksid dagiti nadagsen a basol ni Pedro, kasano ti panangtrato ni Jesus kenkuana?
3 Iti rabii sakbay ti ipapatay ni Jesus, isu ket namitlo nga inlibak ti mismo nga apostolna a ni Pedro. (Mar. 14:66-72) Kaskasdi, idi nagbabawi ni Pedro kas impadto ni Jesus, isu ket pinakawanna. Intalekna ken Pedro dagiti nadagsen a responsabilidad. (Luc. 22:32; Ara. 2:14; 8:14-17; 10:44, 45) Ania ti masursurotayo iti kababalin ni Jesus kadagidiay nakaaramid kadagiti nadagsen a basol?
Tuladenyo ti Panangmatmat ni Kristo Kadagidiay Nakabasol
4. Ania a kasasaad ti nangnangruna nga agkalikagum iti panangtulad iti panangmatmat ni Kristo?
4 Adu ti kasasaad nga agkalikagum iti panangtulad iti panangmatmat ni Kristo. Ti maysa kadagita a makatukay iti puso ket ti panangtrato kadagiti nakaaramid iti nadagsen a basol, iti man uneg ti pamilia wenno iti kongregasion. Nakalkaldaang ta bayat nga umad-adanin ti panungpalan ti sistema ni Satanas, kumarkaron ti impluensia ti espiritu ti lubong. Ti dakes wenno nalulok a moralidad daytoy a lubong mabalin nga impluensiaanna dagiti agtutubo ken nataengan, a pakapuyenna ti determinasionda nga agtalinaed iti nalinteg a dalan. Idi umuna a siglo, adda dagiti masapul a mailaksid iti kongregasion Kristiano, ken dadduma ti masapul a matubngar. Kasta met ti kasasaad ita. (1 Cor. 5:11-13; 1 Tim. 5:20) Nupay kasta, no tamingen dagiti panglakayen dagita a kasasaad buyogen ti ayat nga impakita ni Kristo, dakkel ti epektona iti nakabasol.
5. Kasano a matulad dagiti panglakayen ti panangmatmat ni Kristo kadagidiay nakabasol?
5 Kas ken Jesus, masapul a dagiti panglakayen annurotenda dagiti nalinteg a pagalagadan ni Jehova iti amin a gundaway. Iti kasta, mayanninawda ti kinaalumamay, kinaasi, ken ayat ni Jehova. No ti maysa a ‘nadunor ti pusona’ ken “naidagel iti espiritu” gapu iti basolna ket pudno nga agbabbabawi, saan a marigatan dagiti panglakayen a ‘mangatur iti kasta a tao iti espiritu ti kinaalumamay.’ (Sal. 34:18; Gal. 6:1) Ngem kasano ti panangtrato iti maysa a nasubeg ken saan a naan-anay wenno awanan iti panagbabawi?
6. Ania ti masapul a liklikan dagiti panglakayen no tamingenda dagiti nakabasol, ken apay?
6 No ti nakabasol dina ipangag ti Nainkasuratan a balakad wenno ipabasolna iti sabali ti naaramidanna, mabalin a makapungtot dagiti panglakayen wenno ti dadduma. Gapu ta ammoda dagiti dakes a resulta ti naaramid ti nakabasol, mabalin a dida mamedmedan nga iyebkas ti riknada maipapan iti naaramidan wenno kababalin ti nakabasol. Ngem mangpakaro laeng ti panagpungtot ken saanna nga iyanninaw ti “panunot ni Kristo.” (1 Cor. 2:16; basaen ti Santiago 1:19, 20.) Nalawag ken prangka ti pakdaar ni Jesus kadagiti dadduma idi kaaldawanna, ngem pulos a di nangisawang iti aniaman a makapasakit wenno makapainsulto a sasao. (1 Ped. 2:23) Imbes ketdi, impariknana kadagiti nakabasol a mabalinda ti agbabawi ken magun-odda manen ti anamong ni Jehova. Kinapudnona, ti maysa kadagiti kangrunaan a rason nga immay ni Jesus ditoy daga ket “tapno mangisalakan kadagiti managbasol.”—1 Tim. 1:15.
7, 8. Ania ti rumbeng nga ipakita dagiti panglakayen no tamingenda dagiti hudisial a kaso?
7 Kas panangtulad ken Jesus, ania ti rumbeng a kababalintayo kadagidiay masapul a madisiplina iti kongregasion? Laglagipentayo a dagiti Nainkasuratan nga urnos mainaig iti hudisial a kaso iti kongregasion ket mangsalaknib iti arban ken mabalin a mangtignay iti nadisiplina tapno agbabawi. (2 Cor. 2:6-8) Nakalkaldaang ta dadduma ti saan a nagbabawi ket masapul a mailaksidda. Kaskasdi, makaparagsak nga adu kadakuada ti nagsubli ken ni Jehova ken iti kongregasionna idi agangay. No tuladen dagiti panglakayen ti kababalin ni Kristo, agbalin a nalaka ti panagbalbaliw ti nakabasol ken ti panagsublina inton agangay. Mabalin a saanto a malagip ti dadduma a nakabasol ti amin a Nainkasuratan a balakad dagiti panglakayen ngem sigurado a malagipdanto ti panagraem ken ayat nga impakita kadakuada dagiti panglakayen.
8 Gapuna, dagiti panglakayen masapul nga ipakitada “ti bunga ti espiritu,” nangruna ti ayat nga imparangarang ni Kristo, uray iti sidong dagiti narigat a kasasaad. (Gal. 5:22, 23) Saanda koma a sidadarasudos nga ilaksid ti maysa a nakabasol. Masapul nga ipakitada a kayatda a tulongan nga agsubli ken Jehova. Gapuna, no kas pagarigan ta masapul a mailaksid ti nakabasol sa agbabawi inton agangay, kas inaramiden ti adu, napalalonto ti panagyamanna ken ni Jehova ken kadagiti “sagut a tattao” gapu ta pinagbalinda a nalaklaka ti panagsublina iti kongregasion.—Efe. 4:8, 11, 12.
Tuladenyo ti Ayat ni Kristo Bayat ti Tiempo ti Panungpalan
9. Mangted iti pagarigan nga impakita ni Jesus ti pudno a panagayatna kadagiti adalanna.
9 Inlanad ni Lucas ti maysa a naisangsangayan a pasamak nga impakita ni Jesus ti pudno nga ayat. Gapu ta ammo ni Jesus a lakubento dagiti Romano a soldado ti siudad ti Jerusalem isu a narigatto ti agtalaw, siaayat a pinakdaaranna dagiti adalanna: “Inton makitayo ti Jerusalem a nalikmut kadagiti nagkampo a buyot, iti kasta ammuenyo a ti pannakalangalangna immasidegen.” Ania ti nasken nga aramidenda? Nasaksakbay a nangted ni Jesus kadagiti nalawag ken espesipiko a bilin. “Iti kasta dagidiay adda idiay Judea rugianda koma ti agkamang iti bambantay, ket dagidiay adda iti tengngana pumanawda koma, ket dagidiay adda iti aw-away saanda koma a sumrek kenkuana; agsipud ta dagitoy dagiti aldaw a panangipakat iti kinahustisia, tapno matungpal ti amin a bambanag a naisurat.” (Luc. 21:20-22) Kalpasan a dagiti buyot ti Roma linakubda ti Jerusalem idi 66 K.P., dagiti natulnog impangagda dagita a bilin.
10, 11. Kasano a ti panangusig iti panagtalaw dagiti nagkauna a Kristiano manipud Jerusalem tulongannatayo nga agsagana iti “dakkel a rigat”?
10 Bayat ti panagtalaw dagiti Kristiano manipud Jerusalem, masapul a mangipakitada iti Nakristianuan nga ayat iti tunggal maysa a kas iti ayat nga impakita ni Kristo kadakuada. Sigurado a nagririnnanudanda ti aniaman nga adda kadakuada. Ngem ti padto ni Jesus ket saan laeng nga agaplikar iti pannakadadael dayta a nagkauna a siudad. Impakpakaunana: “Addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.” (Mat. 24:17, 18, 21) Sakbay ken kabayatan ti “dakkel a rigat” nga ur-urayentayo, maipasangotayo met kadagiti pakarigatan. Ti panangtulad iti kababalin ni Kristo tulongannatayo a mangibtur kadagita.
11 Iti dayta a tiempo, masapul a tuladentayo ti ulidan ni Jesus, a mangipakitatayo iti di agimbubukodan nga ayat. Mainaig iti dayta, imbalakad ni Pablo: “Tunggal maysa kadatayo ay-aywenna koma ti padana a tao iti naimbag a maipaay a pakapabilganna. Ta uray ti Kristo saanna nga inay-ayo ti bagina . . . Ita ti Dios a mangipaay iti panagibtur ken liwliwa ipalubosna koma kadakayo a maaddaankayo ti isu met laeng a kababalin ti isip a naadda ken Kristo Jesus.”—Roma 15:2, 3, 5.
12. Ania a kita ti ayat ti masapul a patanorentayo ita, ken apay?
12 Ni Pedro, a napakitaan iti ayat ni Jesus, indagadagna kadagiti Kristiano a patanorenda ti “di managinsisingpet a nainkabsatan a panagayat” ken ‘pagtulnoganda ti kinapudno.’ Masapul a ‘nasged unay nga ayatenda ti maysa ken maysa manipud iti puso.’ (1 Ped. 1:22) Ita, ad-adda a masapul a tuladentayo dagiti galad ni Kristo. Kumarkaron dagiti pakarigatan a pakaipaspasanguan ti ili ti Dios. Awan koma kadatayo ti agtalek iti aniaman a paset daytoy daan a lubong, kas nalawag nga ipakita ti nabiit pay a panagsuek ti ekonomia ti lubong. (Basaen ti 1 Juan 2:15-17.) Imbes ketdi, bayat nga umas-asideg ti panungpalan daytoy a sistema, masapul nga ad-adda nga umadanitayo ken ni Jehova ken patanorentayo ti pudno a pannakigayyem kadagiti kapammatiantayo. Imbalakad ni Pablo: “Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.” (Roma 12:10) Impaganetget met dayta ni Pedro, idi a kinunana: “Kangrunaan iti amin, maaddaankayo iti nasged nga ayat iti maysa ken maysa, agsipud ta ti ayat abbonganna ti nakaad-adu a basol.”—1 Ped. 4:8.
13-15. Kasano a ti dadduma a kakabsat tinuladda ti ayat ni Kristo idi napasamak dagiti didigra?
13 Iti intero a lubong, agdindinamag dagiti Saksi ni Jehova gapu iti panangipakitada iti pudno nga ayat. Usigentayo dagiti Saksi a timmulong kalpasan a dinadael dagiti bagyo ti dakkel a paset ti abagatan nga Estados Unidos idi 2005. Gapu ta natignayda iti ulidan ni Jesus, nasurok a 20,000 ti nagboluntario, ket adu kadakuada ti nangpanaw iti nanam-ay a pagtaengan ken natalged a trabaho tapno tulonganda dagiti nadidigra a kakabsatda.
14 Iti maysa a lugar, nagpatakdang ti danum ti baybay agingga iti 80 a kilometro ken nangpataud iti agingga iti 10 a metro a kangato ti danum. Idi immes-es, naan-anay a nadadael ti kakatlo kadagiti pagtaengan ken dadduma pay a patakder a nalayus. Dagiti Saksi a nagboluntario manipud iti nagduduma a pagilian inusarda dagiti paglainganda, remienta, ken pagibangon a materiales, ken situtulokda a nangaramid iti aniaman a trabaho a kasapulan kadagita a lugar. Nagbiahe iti nasurok a 3,000 a kilometro ti dua nga agkabsat a babbai a balo, nga awitda dagiti gargaretda, tapno mapanda tumulong. Maysa kadakuada ti adda sadiay agingga ita a tumultulong iti mangsaranay a komite ken agserserbi kas regular pioneer.
15 Naibangon manen wenno natarimaan ti nasurok a 5,600 a pagtaengan dagiti Saksi ken dadduma pay a lumugar. Ania ti narikna dagiti Saksi iti naisangsangayan nga ayat a naipakita kadakuada? Maysa a kabsat a babai a nadadael ti balayna ket immakar iti bassit a treyler nga agtedtedted ti atepna ken dadael ti paglutuanna. Isu ket imbangonan dagiti kakabsat iti maysa a simple ngem komportable a pagtaengan. Bayat a sitatakder iti baro ken napintas a pagtaenganna, nagsangit gapu iti yamanna ken ni Jehova ken kadagiti kakabsat. Iti adu a lugar, dagiti Saksi a naawanan iti pagtaengan nagtalinaedda kadagiti temporario a pagdagusan iti maysa wenno ad-adu pay a tawen uray naibangonen dagiti pagtaenganda. Apay? Tapno adda pagyanan dagiti nagboluntario a kakabsat. Anian a nagsayaat a panangtulad iti kababalin ni Kristo!
Tuladenyo ti Panangtrato ni Kristo Kadagiti Masakit
16, 17. Kadagiti ania a pamay-an a matuladtayo ti panangtrato ni Kristo kadagiti masakit?
16 Manmano laeng kadatayo ti nakapasar iti nakaro a kalamidad. Ngem dandani amin ti maipaspasango kadagiti parikut iti salun-at. Agserbi a pagwadan ti panangtrato ni Jesus kadagiti masakit. Naasian kadakuada gapu iti ayatna. Idi a ti bunggoy impanda kenkuana dagiti masakit, “inagasanna amin nga agsagsagaba iti nakaro.”—Mat. 8:16; 14:14.
17 Nupay dagiti Kristiano ita dida kabaelan ti mangpaimbag a kas iti inaramid idi ni Jesus, tultuladenda ti asi nga impakitana kadagiti masakit. Kasanoda nga ipakpakita dayta? Ti maysa ket babaen ti panangaramid ken panangitungpal dagiti panglakayen kadagiti urnos a panangtulong kadagiti masakit a kakabsat, nga annurotenda ti prinsipio a nadakamat iti Mateo 25:39, 40.a (Basaen.)
18. Kasano nga impakita ti dua a kabsat ti pudno a panagayatda iti kapammatianda, ken ania dagiti resultana?
18 Siempre, saan laeng a dagiti panglakayen ti mabalin a mangipakita iti kinaimbag kadagiti sabsabali. Usigenyo ti kasasaad ni Charlene nga agtawen iti 44. Adda kanserna ken naibaga kenkuana a sangapulo laengen nga aldaw ti panagbiagna. Gapu iti kasasaadna ken iti rigat ni lakayna a mangay-aywan kenkuana, nagboluntario ti dua a kabsat, da Sharon ken Nicolette, tapno naan-anay a tulonganda agingga iti maudi nga al-aldawna. Nagpaut dayta iti innem a lawas, ngem nagtultuloy nga impakita dagitoy dua a kabsat ti ayatda agingga iti ipapatayna. “Nagrigat no ammom a saanen nga umimbag ti maysa,” kuna ni Sharon. “Ngem pinabilegnakami ni Jehova. Ad-adda a simmingedkami iti Dios ken iti maysa ken maysa.” Kuna ti asawa ni Charlene: “Kanayonto a malaglagipko ti kinaimbag ken praktikal a tulong nga impakita dagitoy dua a kabsat. Gapu iti nasin-aw a motibo ken nasayaat a kababalinda, nalaklaka nga inibturan ti dungdunguek a ni Charlene daytoy a maudi a pannubok ken nangyeg kaniak iti kasapulak unay a bang-ar ken liwliwa. Diakto pulos malipatan ti kinaimbagda. Ti panagsakripisioda pinabilegna ti pammatik ken ni Jehova ken ti panagayatko kadagiti amin a kakabsat.”
19, 20. (a) Ania ti lima nga aspeto ti kababalin ni Kristo nga inusigtayo? (b) Ania ti determinado nga aramidenyo?
19 Iti daytoy a serye ti tallo nga artikulo, inusigtayo ti lima nga aspeto ti kababalin ni Jesus ken no kasano a matuladtayo ti panagpampanunot ken panagtigtignayna. ‘Naalumamay koma ti kababalintayo ken napakumbaba ti pusotayo,’ kas ken Jesus. (Mat. 11:29) Ikagumaantayo met koma ti agbalin a naasi kadagiti sabsabali, uray makitatayo dagiti pagkapuyan ken kinaimperpektoda. Situtured a tungpalentayo ti amin a pagalagadan ni Jehova, uray maipasangotayo kadagiti pakasuotan.
20 Kamaudianna, ipakitatayo ti pudno nga ayat kadagiti amin a kakabsattayo, kas iti inaramid ni Kristo, “agingga iti panungpalan.” Dayta nga ayat ti pakabigbigan dagiti pudno a pasurot ni Jesus. (Juan 13:1, 34, 35) Wen, “agtultuloy koma ti nainkabsatan nga ayatyo.” (Heb. 13:1) Determinadokayo koma a mangusar iti biagyo a mangidayaw ken ni Jehova ken tumulong kadagiti sabsabali! Bendisionanto ni Jehova ti napasnek a panagreggetyo.
[Footnote]
a Kitaenyo ti artikulo nga “Agaramid ti Ad-adda Pay Ngem ti Panagkuna: ‘Aginudo ken Agbussogkayo’” iti Oktubre 15, 1986, a ruar Ti Pagwanawanan.
Mailawlawagyo Kadi?
• Kasano a matulad dagiti panglakayen ti panangtrato ni Kristo kadagiti nakabasol?
• Apay a nangnangruna a napateg ti panangtulad iti ayat ni Kristo iti daytoy tiempo ti panungpalan?
• Kasano a matuladtayo ti panangtrato ni Kristo kadagiti masakit?
[Ladawan iti panid 17]
Kayat dagiti panglakayen nga agsubli ken Jehova dagiti nakabasol
[Ladawan iti panid 18]
Kasano a dagiti Kristiano a nagtalaw manipud Jerusalem tinuladda ti kababalin ni Kristo?
[Ladawan iti panid 19]
Agdindinamag dagiti Saksi ni Jehova gapu iti panangtuladda iti ayat nga impakita ni Kristo