Panangipakita iti Nasayaat a Kondukta kas Ministro ti Dios

“Agbalinkayo a tumutulad iti Dios.”​—EFE. 5:1.

1, 2. (a) Apay a napateg ti panangipakita kadagiti nasayaat a kondukta? (b) Ania ti mausig iti daytoy nga artikulo?

NO MAIPAPAN iti nadayaw a kondukta, insurat ti autor a ni Sue Fox: “Awan ti pilpilienna a lugar ken tiempo ti panangipakita kadagiti nasayaat a kondukta.” No iyugali dagiti tattao ti agbalin a nadayaw, maksayan dagiti di pagkikinnaawatan ken masansan a marisut dagita. Iti kasumbangirna, mangyeg iti rinnisiris, sakit ti nakem, ken ladingit no nagubsang ti panangtrato kadagiti sabsabali.

² Agminar ti nasayaat a kondukta iti uneg ti pudno a kongregasion Kristiano. Kaskasdi, agannadtayo di la ket ta matuladtayo dagiti dakes a kondukta a gagangay iti daytoy a lubong. Kitaentayo no kasano a ti panangyaplikar kadagiti prinsipio ti Biblia maipapan kadagiti nasayaat a kondukta ket salaknibannatayo iti dayta a peggad ken iyadanina dagiti tattao iti pudno a panagdayaw. Tapno matarusantayo no ania ti kalikaguman ti panangipakita iti nasayaat a kondukta, usigentayo ti ulidan ni Jehova a Dios ken ti Anakna.

Ni Jehova ken ti Anakna​—Ulidan ti Nasayaat a Kondukta

3. Kasano nga impakita ni Jehova a Dios ti nasayaat a kondukta?

³ Ni Jehova a Dios ti perpekto nga ulidan ti nasayaat a kondukta. Iti laksid ti natan-ok a saadna kas Soberano iti uniberso, tratuenna dagiti tattao buyogen ti dakkel nga asi ken panagraem. Iti pannakisaritana kada Abraham ken Moises, inusar ni Jehova ti Hebreo a sao a masansan a naipatarus kas “pangngaasim.” (Gen. 13:14; Ex. 4:6) No nakabasol dagiti adipenna, ni Jehova ket “naasi ken managparabur, nabannayat nga agunget ken naruay iti naayat a kinamanangngaasi ken kinapudno.” (Sal. 86:15) Dakkel ti nakaidumaan ni Jehova kadagiti tattao a dagus nga agpungtot no saan a mapasamak ti namnamaenda.

4. Kasano a matuladtayo ni Jehova no makisarita kadatayo dagiti sabsabali?

⁴ Mapagwadan met ti kababalin ti Dios no iti panagimdengna kadagiti tattao. Idi nagsaludsod ni Abraham maipapan kadagiti umili ti Sodoma, siaanus a sinungbatan ni Jehova ti tunggal saludsodna. (Gen. 18:23-32) Dina imbilang a panangsayang iti oras ti panangsungbatna kadagiti pakaseknan ni Abraham. Imdengan ni Jehova ti kararag dagiti adipenna ken ti pakaasi dagiti agbabbabawi a managbasol. (Basaen ti Salmo 51:11, 17.) Saan kadi a nasayaat a tuladentayo ni Jehova babaen ti iyiimdengtayo no makisarita kadatayo dagiti sabsabali?

5. Kasano a ti panangtuladtayo iti nasayaat a kondukta ni Jesus pasayaatenna ti relasiontayo kadagiti sabsabali?

⁵ Ti maysa kadagiti adu a nasursuro ni Jesu-Kristo manipud ken Amana ket ti panangiparangarang iti nasayaat a kondukta. Nupay ti ministeriona ket agkalikagum no dadduma iti adu a tiempo ken pigsana, kanayon a naanus ken naasi ni Jesus. Nakasagana ken sidadaan a tumulong kadagiti agkukutel, bulsek nga agpalpalama, ken dadduma pay nga agkasapulan. Inikkanna ida iti atension uray no saanda nga impakpakauna ti ipapanda kenkuana. Masansan nga isardengna ti ar-aramidenna tapno matulonganna ti maysa nga addaan parikut. Nakonsiderar unay kadagidiay mangipakita iti pammati kenkuana. (Mar. 5:30-34; Luc. 18:35-41) Kas Kristiano, matuladtayo ni Jesus babaen ti panagbalintayo a naasi ken manangtulong. Madlaw dayta dagiti kakabagian, kaarruba, ken dadduma pay. Kanayonanna, pakaidayawan dayta ni Jehova ken mangyeg kadatayo iti ragsak.

6. Kasano nga inyulidan ni Jesus ti panagbalin a nadayaw?

⁶ Nadayaw met ni Jesus kadagiti tattao babaen ti panangawagna kadakuada iti naganda. Kasta met kadi ti inaramid dagiti Judio a lider ti relihion? Saan. Minatmatanda dagidiay di makaammo iti Linteg kas ‘nailunod a tattao’ ken trinatoda ida a kasta. (Juan 7:49) Ngem saan a kasta ti inaramid ti Anak ti Dios. Imbes ketdi, inawaganna da Marta, Maria, Zaqueo, ken dadduma pay iti naganda. (Luc. 10:41, 42; 19:5) Nupay agpannuray iti kaugalian ken kasasaad no kasanotayo nga awagan dagiti tattao, nainggayyeman koma ti pannakilangen dagiti adipen ni Jehova.a Dida ipalubos a ti panagduduma iti kasasaad ti biag ti mangkissay iti panagraem a maikari kadagiti kapammatianda ken dadduma pay.​—Basaen ti Santiago 2:1-4.

7. Kasano a makatulong dagiti prinsipio ti Biblia no iti panangipakita iti panagraem kadagiti padatayo a tattao?

⁷ Ti nadayaw a panangtrato ti Dios ken ti Anakna kadagiti tattao iti amin a nasion ken puli ket mangipakita a raraemenda dagitoy nga indibidual ken makaallukoy kadagiti siuumiso nga agannayas iti kinapudno. Siempre, nagduduma ti maibilang a nadayaw a kondukta depende iti lugar. Gapuna, awan ti surotentayo a nainget a pagannurotan mainaig iti dayta. Imbes ketdi, agpaiwanwantayo kadagiti prinsipio ti Biblia no iti panangipakita iti panagraem kadagiti padatayo a tattao. Usigentayo no kasano a ti nadayaw a panangtrato kadagiti tattao pagbalinennatayo a nabungbunga iti ministeriotayo.

Panangkablaaw ken Pannakisarita Kadagiti Tattao

8, 9. (a) Ania nga ugali ti mabalin a maibilang a saan a nadayaw? (b) Apay a masapul nga iyaplikartayo dagiti sasao ni Jesus iti Mateo 5:47 no iti pannakilangentayo?

⁸ Gapu iti kinaokupado dagiti tattao iti adu a lugar, manmano itan ti agkikinnablaaw. Siempre, saan a manamnama a makasaritam amin a masabatmo. Ngem iti dadduma a situasion, maitutop ken matarigagayan ti panagkikinnablaaw. Kaugalianyo kadi ti agkikinnablaaw? Wenno dikay pay agisem wenno mangkomusta no adda masabatyo? Posible a ti maysa dina mapupuotan a mapatanorna ti ugali nga iti kinapudnona ket maibilang nga awan daydayawna.

⁹ Palagipannatayo ni Jesus: “No ti kakabsatyo laeng ti kablaawanyo, ania a naisangsangayan a banag ti ar-aramidenyo? Saan aya nga ar-aramiden met dagiti tattao iti nasnasion ti isu met laeng a banag?” (Mat. 5:47) Mainaig iti dayta, insurat ti konsultante a ni Donald Weiss: “Masair ti dadduma no ammoda a nakitam ida ngem dimo kinablaawan. Awan ti aniaman a maipambarmo a mangpalag-an iti riknada. Ti kasayaatan nga aramidem ket mangkablaaw ken makisaritaka.” No saantayo a nakayakay wenno mangidumduma iti pannakilangentayo, adu ti magunggonatayo.

10. Kasano a makatulong ti nasayaat a kondukta tapno agbalin a nabunga ti ministeriotayo? (Kitaenyo ti kahon nga “Irugiyo Babaen ti Nainggayyeman nga Isem.”)

¹⁰ Usigentayo ti kapadasan ti Kristiano nga agassawa a da Tom ken Carol nga agnanaed iti maysa a dakkel a siudad iti Amianan nga America. Pinagbalinda a paset ti ministerioda ti naragsak a pannakisarita kadagiti kaarrubada. Kasanoda nga inaramid dayta? Sipapanunot ni Tom iti Santiago 3:18, idi kinunana: “Inkagumaanmi ti agbalin a mannakigayyem ken mannakikappia kadagiti tattao. Asitganmi dagiti adda iti ruar ti pagtaenganda ken dagiti agtartrabaho iti komunidadmi. Iseman ken kablaawanmi ida. Pagsasaritaanmi dagiti paginteresanda​—dagiti annak, aso, pagtaengan, ken panggedanda. Idi agangay, ibilangdakamin a gagayyemda.” Innayon ni Carol: “Kadagiti simmarsaruno a pannakisaritami, nakiam-ammokami kadakuada. Inestoriami ti trabahomi ngem apagbiit laeng. Idi agangay, nakasabaanmi ida.” Naalada ti panagtalek ti adu kadagiti kaarrubada. Adu ti immawat kadagiti naibatay iti Biblia a publikasion ken sumagmamano ti nangipakita iti dakkel nga interes nga agadal iti kinapudno.

Nadayaw Uray Kadagiti Narigat a Kasasaad

11, 12. Apay a namnamaentayo ti di umiso a pannakatrato bayat a mangaskasabatayo, ken kasano ti rumbeng a panagtignaytayo?

¹¹ No dadduma, tratuendatayo a sigugubsang dagiti kaskasabaantayo. Manamnamatayo dayta ta impakpakauna ni Jesus kadagiti adalanna: “No indadanesdak, idadanesdakayto met.” (Juan 15:20) Saan a nasayaat ti ibungana no tutopantayo dagiti makasair a sasaoda. Ania ti aramidentayo? Insurat ni apostol Pedro: “Santipikarenyo ti Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.” (1 Ped. 3:15) Ti panagbalintayo a nadayaw​—ti panagtignay buyogen ti kinaalumamay ken panagraem​—ket mabalin a mangpalukneng iti puso dagidiay mangumsi kadatayo.​—Tito 2:7, 8.

¹² Mabalintayo kadi ti agsagana no kasanotayo nga agtignay iti pamay-an a makaay-ayo iti Dios no maipasangotayo kadagiti makasair a komento? Wen. Insingasing ni Pablo: “Ti panagsaoyo kankanayon koma a mabuyogan iti kinaparabur (wenno kinadayaw), natemplaan iti asin, tapno ammoyo no kasano ti rebbengyo nga isusungbat iti tunggal maysa.” (Col. 4:6) No iyugalitayo ti agbalin a nadayaw kadagiti kapamilia, kaeskuelaan, katrabahuan, kapammatian, ken kaarrubatayo, ad-adda a nakasaganatayo a sumango kadagiti panangumsi iti pamay-an a maitutop kadagiti Kristiano.​—Basaen ti Roma 12:17-21.

13. Mangted iti pagarigan a mangipakita a ti kinadayaw paluknengenna ti puso dagiti bumusbusor.

¹³ Mangyeg kadagiti nasayaat a resulta no nadayawtayo uray kadagiti narigat a kasasaad. Idiay Japan, kas pagarigan, adda Saksi nga inumsi ti maysa a bumalay ken ti bisitana. Sidadayaw a pimmanaw ti kabsat. Bayat nga intuloyna ti mangasaba, nadlawna nga isu ket palpaliiwen ti bisita ti bumalay iti di unay adayo. Idi isu ket inasitgan ti kabsat, kinunana: “Dispensarennak koma. Uray pinagsasawandaka, nakaisemka latta. Kasano ngata a matuladka?” Gapu ta naikkat iti trabaho ken nabiit pay a natay ti inana, awan ti makitanan a rason tapno agbalin a naragsak. Intukonan ti Saksi iti panagadal iti Biblia ket inawatna met. Di nagbayag, maminduan iti kada lawas nga agadalda.

Ti Kasayaatan a Pamay-an a Masursuro ti Panagbalin a Nadayaw

14, 15. Idi panawen ti Biblia, kasano ti panangsanay dagiti adipen ni Jehova kadagiti annakda?

¹⁴ Idi panawen ti Biblia, dagiti nagannak a managbuteng iti Dios siguraduenda a masursuro dagiti annakda ti panagbalin a nadayaw iti uneg ti pagtaengan. Iti Genesis 22:7, usigenyo ti nadayaw nga awag da Abraham ken Isaac iti maysa ken maysa. Impakita met ni Jose ti nasayaat a panangsanay kenkuana dagiti nagannakna. Nadayaw uray kadagiti padana idi a balud. (Gen. 40:8, 14) Dagiti sasaona ken Faraon ipakitana nga ammona no kasano ti rumbeng a pannakisarita iti nangato nga opisial.​—Gen. 41:16, 33, 34.

¹⁵ Ti Sangapulo a Bilin a naited kadagiti Israelita ramanenna daytoy a bilin: “Dayawem ni amam ken ni inam tapno agbayag dagiti aldawmo iti rabaw ti daga nga ited kenka ni Jehova a Diosmo.” (Ex. 20:12) Ti maysa a pamay-an a dagiti annak mapadayawanda dagiti nagannakda ket ti panagbalinda a nadayaw iti pagtaengan. Ti balasang ni Jefte ket nangipakita iti dakkel a panagraem ken amana babaen ti panangtungpalna iti kari ni tatangna uray narigat dayta.​—Uk. 11:35-40.

16-18. (a) Kasano a maisuro kadagiti annak ti panagbalin a nadayaw? (b) Ania ti sumagmamano a pagimbaganna no dagiti nagannak sursuruanda dagiti annakda nga agbalin a nadayaw?

¹⁶ Nakapatpateg ti panangsanay kadagiti annaktayo nga agbalin a nadayaw. Tapno agbalindanto a nasayaat nga adulto, nasken a sursuruen dagiti agtutubo ti umiso a panangkablaaw kadagiti bisita, panangsungbat iti telepono, ken pannangan a kadua ti sabsabali. Masapul a mailawlawag kadakuada no apay a nasken nga ilukatanda iti ruangan ti sabsabali, agbalinda a naasi kadagiti nataengan ken masakit, ken tulonganda dagidiay addaan iti nadagsen nga awit. Masapul a matarusanda ti kinapateg ti naimpusuan a panangibaga iti “pangngaasim,” “pagyamanan,” “awan aniamanna,” “kayatka a tulongan,” ken “dispensarennak.”

¹⁷ Dagiti nagannak nalaklakada a maisuro dagiti annakda nga agbalin a nadayaw no isuda a mismo ti mangyulidan. Kastoy ti kuna ti 25 ti tawenna a ni Kurt no kasanoda a nasursuro nga uppat nga agkakabsat ti agbalin a nadayaw: “Nakita ken nangngegmi no kasano ti naalumamay a panagsarita da Nanang ken Tatang ken ti naanus ken nakonsiderasion a panangtratoda kadagiti tattao. Idiay Kingdom Hall, ikaduanak ni Tatang no makisarita kadagiti natataengan a kakabsat sakbay ken kalpasan ti gimong. Nangngegko ti panangkablaaw ken nakitak ti panagraemna kadakuada.” Kinuna pay ni Kurt: “Idi agangay, natuladko ti kababalinna. Nayugalikon ti nadayaw a panangtrato kadagiti tattao. Aramidem dayta saan a gapu ta masapul no di ket gapu ta kayatmo.”

¹⁸ Ania ti pagimbaganna no dagiti nagannak ket sursuruanda dagiti annakda nga agbalin a nadayaw? Maaddaanto dagiti annak kadagiti gagayyem ken mataginayonda ti natalna a relasion kadagiti sabsabali. Makabalandanto kadagiti nasayaat a galad a makipagtrabaho kadagiti amo ken padada nga empleado. Kanayonanna, dagiti annak a nadayaw ken nasingpet mangyegda iti rag-o ken pannakapnek kadagiti nagannakda.​—Basaen ti Proverbio 23:24, 25.

Idumanatayo ti Nasayaat ti Kondukta

19, 20. Apay a masapul a determinadotayo a mangtulad iti Dios ken iti Anakna no iti panangiparangarang kadagiti nasayaat a kondukta?

¹⁹ “Agbalinkayo a tumutulad iti Dios, kas annak a dungdungnguen,” insurat ni Pablo. (Efe. 5:1) Ti panangtulad ken Jehova a Dios ken iti Anakna ramanenna ti panangyaplikar kadagiti prinsipio ti Biblia, kas kadagiti nausig iti daytoy nga artikulo. No aramidentayo dayta, maliklikantayo ti mangipakita iti pammarang a kinadayaw tapno laeng magun-od ti material a pagnam-ayan wenno ti pabor ti maysa nga adda iti autoridad.​—Jud. 16.

²⁰ Bayat ti maudi nga al-aldaw ti dakes a panagturay ni Satanas, isu ket determinado a mangikkat kadagiti pagannurotan ti kinadayaw nga impasdek ni Jehova. Ngem mapaay ti Diablo a mangikkat iti kinadayaw dagiti pudno a Kristiano. Sapay koma ta determinado ti tunggal maysa kadatayo a mangtulad iti Dios ken iti Anakna no iti panangiparangarang kadagiti nasayaat a kondukta. Iti kasta, agbalin a naiduma ti panagsasao ken panagtigtignaytayo kadagidiay awan daydayawna. Maipadayagtayo met ti nagan ti Dios a Jehova, ti perpekto nga ulidan ti nasayaat a kondukta, ken maatrakar dagiti napasnek a tattao iti pudno a panagdayaw.

[Footnote]

Malagipyo Kadi?

• Ania ti maadaltayo ken ni Jehova ken iti Anakna no iti panangiparangarang kadagiti nasayaat a kondukta?

• Kas Kristiano, apay a nasayaat a nainggayyeman a kablaawantayo dagiti tattao?

• Kasano nga agbalin a nabungbunga ti ministeriotayo no nadayawtayo?

• Kasano a dagiti nagannak maisuroda kadagiti annakda dagiti nadayaw a kondukta?

[Kahon iti panid 27]

Irugiyo Babaen ti Nainggayyeman nga Isem

Adu ti bumdeng a makisarita iti dida am-ammo. Ngem gapu ta dagiti Saksi ni Jehova ay-ayatenda ti Dios ken dagiti kaarrubada, ikagumaanda a sursuruen ti mangirugi iti saritaan tapno mairanudda dagiti kinapudno iti Biblia. Ania ti makatulong kenka a lumaing iti daytoy a benneg?

Sagudayen ti Filipos 2:4 ti maysa a napateg a prinsipio: “Itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.” Tapno maawatantayo ti kayat a sawen dagita a sasao, utobem daytoy: Ibilangnaka nga estranghero ti maysa a dimo pay am-ammo. Ania ti aramidem tapno saan a bumdeng a makisarita kenka? Makatulong ti nainggayyeman nga isem ken kablaaw. Ngem adda pay masapul nga ikabilangam.

No kasaritam ti maysa, nalabit nga adda nasingam a pampanunotenna. Mabalin a saanmo a maala ti interesna no daydiay pampanunotem ti kayatmo a pagsaritaanyo imbes a ti pakaseknanna. Gapuna, aniaman a makitam a posible a pampanunotenna, apay a saan a dayta ti pagsaritaanyo? Kasta ti inaramid ni Jesus idi nakasaritana ti Samaritana iti abay ti bubon. (Juan 4:7-26) Panggep ti babai ti agsakdo. Dayta ti nangirugian ni Jesus iti saritaanda, a nagturong iti narayray a saritaan kadagiti naespirituan a bambanag.

[Dagiti Ladawan iti panid 26]

Ti panagbalin a mannakigayyem ket mabalin nga agturong iti nasayaat a panangsaksi

[Ladawan iti panid 28]

Kanayon a maitutop nga ipakita dagiti nadayaw a kondukta