Ti Panangmatmat ti Dios iti Arak

TI NAMARSUA kadatayo, nga agtarigagay iti kasayaatan para kadatayo, saanna nga iparit ti kalkalainganna a panaginum iti arak.a Imbes ketdi, impaayanna ti tao iti “arak a mangparagsak kenkuana, lana ti olibo a mangparaniag iti rupana ken tinapay a mangted iti pigsana.” (Salmo 104:15, Ti Baro a Naimbag a Damag Biblia) Naminsan, timmulong ni Jesu-Kristo a nangparagsak iti maysa a kasar idi pinagbalinna ti danum a “kaimasan nga arak.”​—Juan 2:3-10, New Jerusalem Bible.

Rasonable ngarud a kunaen a talaga nga ammo ti Namarsua no ania ti epekto ti arak iti panaggunay ken panagpanunot. Babaen kadagiti pinanid ti Biblia, ti nailangitan nga Amatayo ‘isursuronatayo tapno magunggonaantayo,’ ken pakpakdaarannatayo a ditay uminum iti nalabes. (Isaias 48:17) Imutektekanyo daytoy a prangka a pakdaar:

“Dikay agbarbartek iti arak, nga iti dayta adda kinagaramugam.” (Efeso 5:18) “Dagiti managbarbartek . . . didanto tawiden ti pagarian ti Dios.” (1 Corinto 6:9-11) Kondenaren ti Sao ti Dios ti “panagbarbartek, naariwawa a panagragragsak, ken bambanag nga umasping kadagitoy.”​—Galacia 5:19-21.

Usigentayo ti dadduma a pagdaksan ti nalabes a panaginum iti arak.

Dagiti Pagdaksan ti Nalabes a Panaginum

Nupay adda pagimbagan ti arak, naglaon dayta kadagiti naingel a ramen a mangapektar iti panaggunay ken panagpanunot. Ti nalabes a panaginum mabalin a mangibunga iti aniaman kadagiti sumaganad:

Pagbalinenna a saan a ‘nalawag ti panagpampanunot.’ (Proverbio 23:33, Ti Baro a Naimbag a Damag Biblia) Inlawlawag ni Allen, ti nadakamat a mangnginum iti umuna nga artikulo: “Ti alkoholismo ket saan laeng a sakit ti bagi; maysa dayta a sakit ti panunot ken kababalin. Saanmo a mapanunot ti ibungana a pannakadangran ti dadduma a tattao.”

Pakapuyenna ti kinasimbeng ti panunot. Iballaag ti Kasuratan a ti “arak ken nasam-it nga arak isuda ti mangikkat iti nasayaat a motibo.” (Oseas 4:11) Kasano? No nalabes ti nainumtayo nga arak, mabalin a maawattayon wenno makaay-ayo pay ketdin kadatayo dagiti dakes a panagpampanunot ken tarigagay a kabaelantay koma a sarangten no ditay nakainum. Mabalin a kumapuy ti determinasiontayo a mangitultuloy a mangaramid iti umiso. Mabalin a pakapuyen ti arak ti determinasiontayo nga agtalinaed a nadalus iti moral, nga agresulta iti pannakadadael ti espiritualidad.

Kas pagarigan, idi nakasubangna ni baketna, napan ni John iti pagiinuman. Nakainumen iti sumagmamano a tagay tapno agkalma idi immasideg kenkuana ti maysa a babai. Kalpasan ti sumagmamano pay a tagay, kimmuyog ni John iti babai ket nakikamalala. Kasta unay ti ladingit ni John ta nakaaramid iti basol a dina koma pulos naaramid no saan a kimmapuy ti kinasimbengna gapu iti arak.

Pagbalinenna ti maysa a naariwawa ken nadarasudos. “Siasino ti kanayon a makiringgor? Siasino ti mannakisubang ken mannakiapa?” insaludsod ti Biblia. “Amin dagidiay agpuypuyat, tapno uminum iti maminsan pay.” (Proverbio 23:29, 30, Contemporary English Version) No nakainumka iti nalabes, “kaska la adda iti taaw a mayallo-allon, maul-ulawka ket kaska la adda iti palo ti maibagbagio a barko.” (Proverbio 23:34, Ti Baro a Naimbag a Damag Biblia) Ti maysa a nabartek mabalin nga agriing a kunkunana, “nagadu ti sugatko, ngem diak malagip no ania ti napasamak.”​—Proverbio 23:35, CEV.

Dadaelenna ti Pisikal a Salun-at. “Iti panungpalanna kumagat dayta a kas iti serpiente, ket agparuar iti sabidong a kas iti karasaen.” (Proverbio 23:32) Pinatalgedan ti siensia ti kinasirib dayta a nagkauna a proverbio. Makapapatay a sabidong ti adu unay nga arak ken pakaigapuan ti nagduduma a kanser, hepatitis, cirrhosis ti dalem, pancreatitis, nababa nga asukar kadagiti diabetiko, fetal alcohol syndrome, istrok, wenno sakit ti puso, ken dadduma pay. Mabalin a maawanan iti puot wenno matay pay ketdi ti maysa uray no maminsan laeng nga uminum iti nalabes. Ngem saan a nadeskribir kadagiti libro dagiti doktor ti kapeggadan a resulta ti nalabes a panaginum.

Ti kakaruan a peggad nga ibungana. Uray saan nga agbarbartek ti maysa no nalabes ti panagin-inumna, agresulta dayta kadagiti naespirituan a peggad. Ibatad ti Biblia: “Asi pay dagidiay bumangbangon a nasapa iti bigat tapno makasapulda laeng iti makabartek nga inumen, isuda nga agmenmenmen agingga iti adalemen a kinasipnget ti rabii tapno paggil-ayaben ida ti mismo nga arak!” Apay? Inlawlawag ni Isaias dagiti naespirituan nga ibunga ti nalabes a panaginum: “Ti aramid ni Jehova saanda nga imatangan, ket ti aramid dagiti imana saanda a nakita.”​—Isaias 5:11, 12.

Ibalbalakad ti Sao ti Dios a ‘ditay makikadua kadagiti nakaro ti panagin-inumna iti arak.’ (Proverbio 23:20) Nabalakadan dagiti babbaket a saanda a “paadipen iti adu nga arak.” (Tito 2:3) Apay? Ngamin, mabalin nga in-inut wenno di mapupuotan ti maysa nga umadu ti inumen ken sumansan pay ketdi ti panaginumna iti arak. Inton agangay, ti mammartek mabalin a “nakaidda a siririing nga isalsaludsodna, ‘Kaano ngata a bumigat, tapno makainumak manen?’” (Proverbio 23:35, CEV) Agpegpeggaden ti maysa no padpadaananna pay ketdin ti bigat tapno makainum manen uray no saan pay a naunawan iti panaginumna iti rabii.

Namallaag ti Biblia a dagiti makiraman iti ‘panaglablabes iti arak, naariwawa a panagragragsak, salisal iti panaginum manungsungbatdanto iti daydiay nakasagana a mangukom kadagidiay sibibiag ken kadagidiay natay.’ (1 Pedro 4:3, 5) Kasta met, mainaig kadagiti napeggad a tiempo a pagbibiagantayo, imballaag ni Jesus: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw [ni Jehova] kellaat nga umay kadakayo kas maysa a silo.”​—Lucas 21:34, 35.

Ania ngarud ti aramiden dagiti mangnginum tapno saanda a ‘madagsenan iti nakaro a panaginum’?

[Footnote]

[Dagiti Ladawan iti panid 4, 5]

Mangibunga iti adu a parikut ti nalabes a panaginum iti arak