Ania ti Kuna ti Biblia Maipapan iti Arak? Basol Kadi ti Panaginum iti Arak?
Sungbat ti Biblia
Saan a basol ti kalkalainganna a panaginum iti arak. Ibagbaga ti Biblia a ti arak ket sagut ti Dios a mangparagsak iti biag. (Salmo 104:14, 15; Eclesiastes 3:13; 9:7) Bigbigen met ti Biblia a makaagas ti arak.—1 Timoteo 5:23.
Imminum ni Jesus iti arak bayat ti kaaddana ditoy daga. (Mateo 26:29; Lucas 7:34) Iti maysa kadagiti nalatak a milagrona, ti danum ket pinagbalin ni Jesus nga arak kas naayat a sagutna iti padaya ti kasar.—Juan 2:1-10.
Peggad ti nalabes a panaginum
Nupay ibagbaga ti Biblia dagiti nasayaat nga epekto ti arak, kondenarenna ti nalabes a panaginum ken panagbartek. Isu a no kayat ti maysa a Kristiano ti uminum, aginum ngem kalalainganna laeng. (1 Timoteo 3:8; Tito 2:2, 3) Mangipaay ti Biblia iti sumagmamano a rason no apay a liklikan ti nalabes a panaginum.
Dadaelenna ti panagpampanunot ken panagdesision. (Proverbio 23:29-35) Ti nabartek a tao dina matungpal ti bilin ti Biblia nga “iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.”—Roma 12:1.
Ti nalabes a panaginum pukawenna ti bain ken determinasion nga agaramid iti umiso.—Oseas 4:11; Efeso 5:18.
Agresulta iti nakaro a sakit ken kinapanglaw.—Proverbio 23:21, 31, 32.
Kagura ti Dios ti sobra a panaginum ken panagbartek.—Proverbio 23:20; Galacia 5:19-21.
Kasanom a maibaga a sobran?
Makuna a sobran ti nainum ti maysa a tao no isu ket agprobokar wenno dangrannan ti sabsabali. Sigun iti Biblia, madlaw a nabartek ti maysa a tao, saan nga iti pannakaawan ti puotna, no di ket makita iti tigtignayna, kas iti saanna a pannakakontrol iti bagi, agibar-ibar, mangkarkarit, wenno saan a nalawag ti panagsaona. (Job 12:25; Salmo 107:27; Proverbio 23:29, 30, 33) Uray dagidiay dida kayat ti mabartek ket mabalin a “madagsenan iti nalabes . . . a panagin-inum” ken apitenda ti saan a nasayaat nga ibunga dayta.—Lucas 21:34, 35.
Naan-anay a panangliklik
Ibaga met ti Biblia dagiti gundaway a liklikan a naan-anay dagiti Kristiano ti panaginum iti arak:
No adda maitibkol.—Roma 14:21.
No ti panaginum salungasingenna ti linteg ti lugar a pagnanaedan ti maysa.—Roma 13:1.
No di makontrol ti maysa ti panaginumna iti arak. Dagiti alkoholiko wenno nalabes ti panaginumda iti arak masapul a situtulokda a mangaramid iti dakkel a panagbalbaliw.—Mateo 5:29, 30.