Sigurado a Mapaay ti Wagas ti Panangituray ni Satanas
“Saanto a pulos [a] naimbag ti pagbanagan daydiay nadangkes.”—ECL. 8:13.
1. Apay a makaliwliwa a damag ti umad-adanin a pannakadusa dagiti nadangkes?
ITI din agbayag, madusanto dagiti agar-aramid iti kinadakes. Manungsungbatdanto kadagiti dakes nga aramidda. (Prov. 5:22; Ecl. 8:12, 13) Makaliwliwa dayta a damag, nangruna kadagidiay managayat iti kinalinteg ken biktima ti kinaawan hustisia ken panangmaltrato dagiti nadangkes. Ti kangrunaan a madusanto ket ti ama ti kinadakes, ni Satanas a Diablo.—Juan 8:44.
2. Apay a kasapulan ti tiempo a mangrisut iti isyu a timmaud idiay Eden?
2 Idiay Eden, ti napalangguad a ni Satanas sinugsoganna dagiti tattao a mangilaksid iti panangituray ni Jehova. Kas resultana, dimmasig ken Satanas dagiti umuna a nagannaktayo. Kinaritda ti kalintegan ni Jehova a mangituray isu a nakabasolda iti imatangna. (Roma 5:12-14) Siempre, ammo ni Jehova no anianto ti mapasaranda gapu iti panagrebelde ken kinaawan ti panagraemda. Ngem masapul a makita ti amin a tattao ken anghel ti di maliklikan a pagbanagan ti inaramidda. Gapuna, kasapulan ti tiempo tapno marisut dayta nga isyu ken naan-anay a mapaneknekan a talaga a nagkamali dagiti rebelde.
3. Ania ti masapul a panangmatmattayo kadagiti natauan a gobierno?
3 Gapu ta inlaksid ti tao ti panangituray ni Jehova, nangbukelda iti bukodda a kita ti gobierno. Iti surat ni apostol Pablo kadagiti kapammatian idiay Roma, dinakamatna dagiti kasta a natauan a gobierno kas “nangatngato nga autoridad.” Idi kaaldawan ni Pablo, dagiti nangatngato nga autoridad ket kangrunaanna a tumukoy iti gobierno ti Roma, iti panangituray ni Emperador Nero manipud 54-68 K.P. Kinuna ni Pablo a dagita a nangatngato nga autoridad ket “impasdek ti Dios kadagiti relatibo a saadda.” (Basaen ti Roma 13:1, 2.) Isursuro kadi ni Pablo a natantan-ok ti turay ti tao ngem iti turay ti Dios? Saan a pulos. Imbes ketdi, ibagbagana laeng a bayat nga ipalpalubos ni Jehova ti turay ti tao, masapul a raemen dagiti Kristiano ti “urnos ti Dios” ken agpasakupda kadagita nga agturay.
Dalan nga Agturong iti Pakadadaelan
4. Ilawlawagyo no apay a sigurado a mapaay ti turay ti tao.
4 Ngem sigurado a mapaay ti turay ti tao nga im-impluensiaan ni Satanas. Apay? Ti maysa a rason ket saan nga agpapaiwanwan dayta iti sirib ti Dios. Ni laeng Jehova ti addaan iti perpekto a sirib. Gapuna, isu laeng ti makaipaay iti mapagpannurayan a giya no kasano nga agballigi ti maysa a turay. (Jer. 8:9; Roma 16:27) Saan a kas iti tao a masansan a makasursuro babaen iti panageksperimento, kanayon nga ammo ni Jehova no ania ti kasayaatan nga aramidenna. Sigurado a saan nga agballigi ti aniaman a kita ti gobierno a saan nga agpaiwanwan iti Dios. Dayta—agraman ti managimbubukodan a motibo ni Satanas—ti makagapu a sigurado a mapaay ti aniaman a pamay-an ti panangiturayna babaen ti turay ti tao uray mangrugrugi pay laeng dayta.
5, 6. Ania ti nangituggod ken Satanas a bumusor ken Jehova?
5 Kaaduanna a liklikan ti masirib a tao ti aniaman a panagregget a sigurado a mapaay. No itultuloyna latta dayta a panagregget, mapilitanto a mangbigbig nga isu ket nagkamali. Adu a daras a paneknekan ti historia a kinamaag ti bumusor iti mannakabalin-amin a Namarsua. (Basaen ti Proverbio 21:30.) Ngem gapu ta ni Satanas ket kinullaapan ti kinapalangguad ken kinatangsitna, tinallikudanna ni Jehova. Iti kasta, sipapakinakem a pinili ti Diablo ti dalan nga agturong iti pannakadadael.
6 Ti kinadursok ni Satanas ket inyanninaw idi agangay ti maysa nga agturay iti Babilonia a sitatangsit a nagkuna: “Iti langlangit agpangatoakto. Iti ngatuen dagiti bituen ti Dios ingatokto ti tronok, ket agtugawakto iti rabaw ti bantay ti gimong, kadagiti kaadaywan a paset ti amianan. Agpangatoakto iti ngatuen dagiti nangato a disso ti ul-ulep; pagbalinekto ti bagik a kaarngi ti Kangatuan.” (Isa. 14:13-15) Napaay ti minamaag a gandat dayta nga agturay ken nakababain ti nagbanagan ti dinastia ti Babilonia. Umasping iti dayta, naan-anayto a maparmek ni Satanas ken madadael ti lubongna iti mabiiten.
Apay a Naipalubos?
7, 8. Ania ti dadduma a pagimbagan ti panangipalubos ni Jehova iti kinadakes iti sumagmamano a tiempo?
7 Mabalin a panunoten ti dadduma no apay a di linapdan ni Jehova ti pannakidasig dagiti tattao ken ni Satanas ken ti panangipasdekda iti kita ti gobierno a sigurado a mapaay. Kas Dios a Mannakabalin-amin, kabaelanna nga aramiden dayta no kayatna. (Ex. 6:3) Ngem gapu ta masirib, ammona a ti temporario a dina pannakibiang iti panagrebelde ti tao ket agpaayto a pagimbagan ti amin. Iti kasta, maalangonto ni Jehova kas ti nalinteg ken naayat nga Agturay, ken pakagunggonaan dagiti matalek a tattao dayta a pangngeddeng ti Dios.
8 Anian a saem ti naliklikan koma ti tao no pinagkedkedanna ti damo pay laeng a panangsulisog ni Satanas ken saanna nga inlaksid ti panangituray ti Dios! Kaskasdi, adda dagiti gunggona nga itden ti panangipalubos ni Jehova nga iturayan dagiti tattao ti bagbagida. Naipaganetget kadagiti nasingpet nga indibidual ti kinasirib ti panagtulnog iti Dios ken panagtalek kenkuana. Iti sinigsiglo, pinadas dagiti tattao ti nagduduma a kita ti gobierno ngem awan kadagita ti nagballigi. Dayta ti nangpabileg iti panagtalek dagiti agdaydayaw iti Dios a kasayaatan latta ti wagas ti panangituray ni Jehova. Pudno, ti panangipalubos ni Jehova iti dakes a panagturay ni Satanas ket nagresulta iti panagsagaba ti sangatauan, a pakairamanan dagiti matalek nga agdaydayaw iti Dios. Ngem ti temporario a panangipalubosna iti kinadakes ket nangyeg met kadagiti gunggona kadagita a matalek nga agdaydayaw.
Iyaalsa a Nagresulta iti Pannakaidayaw ni Jehova
9, 10. Ilawlawagyo no kasano a ti turay ni Satanas nagresulta iti pannakaipadayag ni Jehova.
9 Ti panangipalubos ni Jehova a maipasango dagiti tattao iti impluensia ni Satanas ken iturayanda ti bagbagida ket saan a pammaneknek a napaay ti wagas ti panangituray ti Dios. Imbes ketdi, paneknekanna nga umiso ti naipaltiing a kinuna ni Jeremias a saan a kabaelan ti tao nga iturayan ti bagina kas ipakita ti historia. (Basaen ti Jeremias 10:23.) Kanayonanna, ti iyaalsa ni Satanas ket nangted iti gundaway ken Jehova tapno ad-adda a maiparangarangna dagiti agkakaimbag a galadna. Kasano?
10 Ti nakalkaldaang a resulta ti panangituray ni Satanas ad-adda a pinagminarna dagiti perpekto a galad ni Jehova. Iti kasta, naitandudo ti Dios iti imatang dagidiay mangay-ayat kenkuana. Wen, nupay kasla di nakappapati, ti wagas ti panangituray ni Satanas ket nagresulta iti pannakaipadayag ti Dios. Dayta ti mangipakita a tinaming ni Jehova ti pannakakarit ti kinasoberanona iti kasayaatan a pamay-an. Kas panangyilustrar iti dayta a kinapudno, usigentayo ti dadduma a galad ni Jehova ken kitaentayo no kasano a ti dakes a turay ni Satanas tinignayna ni Jehova a mangiparangarang kadagita a galad iti dadduma pay a pamay-an.
11. Kasano nga impakita ni Jehova ti panagayatna?
11 Ayat. Kuna ti Kasuratan a ti “Dios ket ayat.” (1 Juan 4:8) Kinapudnona, ebkas ti ayat ti Dios ti panangparsuana kadagiti tattao. Kanayonanna, ti nakaskasdaaw ken nagsayaat a pannakaaramidda ket pammaneknek iti ayat ti Dios. Siaayat met nga impaayan ida ni Jehova iti nagpintas a pagtaengan a napno kadagiti bambanag a mangyeg kadakuada iti kinaragsak. (Gen. 1:29-31; 2:8, 9; Sal. 139:14-16) Ngem apaman a simrek ti kinadakes iti natauan a pamilia, inyebkas ni Jehova ti ayatna kadakuada iti baro a pamay-an. Kasano? Sigun ken apostol Juan, kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Adda pay kadi nasaysayaat a pamay-an a maipakita ti Dios ti panagayatna iti sangatauan ngem iti panangibaonna ditoy daga iti bugbugtong nga Anakna tapno subbotenna dagiti managbasol? (Juan 15:13) Dayta a naisangsangayan a panangipakita iti ayat ket agserbi met a pagwadan kadagiti tattao, a mangted kadakuada iti gundaway a mangiparangarang iti managsakripisio nga ayat ti Dios iti inaldaw a panagbiagda, kas inaramid ni Jesus.—Juan 17:25, 26.
12. Iti ania a pamay-an nga impakita ni Jehova ti pannakabalinna?
12 Pannakabalin. Ti laeng “Dios, a Mannakabalin-amin,” ti addaan iti pannakabalin a mangted iti biag. (Apoc. 11:17; Sal. 36:9) No mayanak ti tao, isu ket arigna a maysa a blanko a papel. Inton matay, mapnonto dayta a papel kadagiti pangngeddeng, aramid, ken kapadasan a nangsukog iti kinatao ken personalidadna. Maidulin dagita nga impormasion iti memoria ni Jehova. Iti naikeddeng a tiempo, kabaelan ni Jehova nga isubli ti biag dayta nga indibidual iti isu met laeng a kinatao ken personalidad. (Juan 5:28, 29) Iti kasta, nupay saan nga orihinal a panggep ni Jehova a matay ti tao, nangted dayta kenkuana iti gundaway a mangipakita a kabaelanna a pagungaren uray dagiti natay. Wen, ni Jehova ti “Dios, a Mannakabalin-amin.”
13. Kasano a ti ipapatay ni Jesus ket pammaneknek a perpekto ti kinahustisia ni Jehova?
13 Kinahustisia. Saan nga agulbod ni Jehova, ken saan met nga agaramid iti kinaawan hustisia. (Deut. 32:4; Tito 1:2) Kanayon a salimetmetanna ti kangatuan a pagalagadanna iti kinapudno ken kinahustisia, uray agkalikagum dayta iti panagsakripisiona. (Roma 8:32) Nagsaem la ketdi ken Jehova a makita ti dungdungnguenna nga Anak a matay iti pagtutuokan a kayo kas maysa a naakusar a managtabbaaw! Kaskasdi, gapu iti panagayatna kadagiti imperpekto a tattao, situtulok ni Jehova a mapasamak daytoy a nakas-ang a pagteng tapno maitandudo ti perpekto a pagalagadanna iti kinahustisia. (Basaen ti Roma 5:18-21.) Ti lubong a napno iti kinaawan hustisia ti nangted ken Jehova iti gundaway tapno maipakitana nga isu ti kangrunaan a mangan-annurot iti kinahustisia.
14, 15. Ania ti dadduma a pamay-an a naiparangarang ti nagsayaat a sirib ken kinaanus ni Jehova?
14 Kinasirib. Kalpasan unay ti panagbasol da Adan ken Eva, impalgak ni Jehova ti pamay-anna a mangikkat iti amin a dakes a resulta ti iyaalsada. (Gen. 3:15) Ti kasta a dagus a panagtignay, agraman ti in-inut a panangipalgakna kadagiti detalye ti panggepna kadagiti adipenna, ti nangitampok iti kinasirib ni Jehova. (Roma 11:33) Awan ti makalapped iti abilidad ti Dios a mangtaming a sibaballigi kadagiti bambanag. Iti lubong a napno iti imoralidad, gubat, di kinanainkalintegan, kinasukir, kinaawan asi, panangidumduma, ken kinamanaginsisingpet, adu ti gundaway ni Jehova a mangipakita kadagiti parsuana no ania a talaga ti kinasirib. Kinuna ni adalan a Santiago: “Ti sirib manipud ngato umuna iti amin nadalus, kalpasanna natalna, nainkalintegan, sisasagana nga agtulnog, napno iti asi ken naimbag a bungbunga, saan a mangpataud kadagiti panangidumduma, saan a managinsisingpet.”—Sant. 3:17.
15 Kinaanus ken Mabayag a Panagitured. No saan a gapu iti kinaimperpekto, basol, ken pagkapuyan ti tao a masapul a tamingen ni Jehova, saantayo a naan-anay a maawatan dagiti galadna a kinaanus ken mabayag a panagitured. Yantangay sidadaan nga iparparangarang ni Jehova dagita a galad iti rinibun a tawtawen, pammaneknek dayta nga us-usarenna dagita a nakaskasdaaw a galad iti perpekto a pamay-an, banag a rumbeng a pagyamanantayo unay. Siuumiso a kinuna ni apostol Pedro a masapul nga ‘ibilangtayo ti kinaanus ni Apotayo kas pannakaisalakan.’—2 Ped. 3:9, 15.
16. Apay a mangyeg iti dakkel a rag-o ti kinamasindadaan ni Jehova a mangpakawan?
16 Sidadaan a Mamakawan. Managbasoltayo amin ken adu a daras a maitibkoltayo. (Sant. 3:2; 1 Juan 1:8, 9) Anian a yamantayo a sidadaan ni Jehova a mangpakawan kadatayo iti ‘dakkel’ a pamay-an! (Isa. 55:7) Usigenyo met daytoy a kinapudno: Gapu ta nayanaktayo nga imperpekto a managbasol, mariknatayo ti kasta unay a ragsak no pakawanen ti Dios dagiti nagkamaliantayo. (Sal. 51:5, 9, 17) Tunggal magun-odtayo ti pammakawan ni Jehova, rumayray ti panagayattayo kenkuana ken matignaytayo a mangtulad iti ulidanna no iti pannakilangentayo kadagiti sabsabali.—Basaen ti Colosas 3:13.
No Apay a Masakit ti Lubong
17, 18. Kadagiti ania a pamay-an a napaay ti wagas ti panangituray ni Satanas?
17 Ti intero a sistema ti lubong ni Satanas—a resulta ti wagas ti panangiturayna—ket maulit-ulit a napaay ken nagtultuloy a kasta iti sinigsiglo. Idi 1991, kuna ti diario a The European: “Masakit kadi ti lubong? Wen, ngem . . . saan a gapuanan dayta ti Dios—ti panagsakit ti lubong ket gapuanan ti tao.” Talaga a pudno dayta! Gapu ta inimpluensiaan ni Satanas dagiti umuna a nagannaktayo, pinilida nga iturayan ti bagbagida imbes a ti turay ni Jehova. Iti kasta, inrugida ti wagas ti panangituray nga awan ti mamaayna. Dagiti saem ken rigat a mapaspasaran ti tao iti intero a lubong ket tanda a nakaptan iti nakabutbuteng a sakit ti turay ti tao.
18 Ti wagas ti panangituray ni Satanas ket mangitandudo iti kinamanagimbubukodan. Ngem dayta a kababalin dina pulos maparmek ti ayat, ti galad a nakaibatayan ti wagas ti panangituray ni Jehova. Ti panangituray ni Satanas ket di nangyeg iti kinatalged, kinaragsak, wenno seguridad. Gapuna, naalangon ti wagas ti panangituray ni Jehova! Adda kadi pammaneknektayo iti dayta iti kaaldawantayo? Adda, kas makitatayo iti sumaganad nga artikulo.
Ania ti Naadaltayo Maipapan iti Turay no Basaentayo ti . . .
• Roma 13:1, 2?
• Colosas 3:13?
[Dagiti Ladawan iti panid 25]
Saan a pulos a nagimbagan ti sangatauan ti panangituray ni Satanas
[Credit Lines]
U.S. Army photo
WHO photo by P. Almasy
[Ladawan iti panid 26]
Kabaelan ni Jehova a pagungaren uray dagiti natay
[Ladawan iti panid 27]
Ti ayat ken kinahustisia ni Jehova ket naiparangarang iti panangisakripisiona iti Anakna