Naalangon ti Wagas ti Panangituray ni Jehova!
“Ti Kangatuan isu ti Agturay iti pagarian ti sangatauan.”—DAN. 4:17.
1, 2. Ania ti dadduma a rason a napaay ti turay ti tao?
NAPAAY ti turay ti tao! Saan a pagduaduaan dayta. Ti maysa a kangrunaan a rason a napaay dayta ket awanan ti tao iti sirib a mangituray a sibaballigi. Ad-adda ita a nagminar ti pannakapaay ti turay ti tao yantangay adu nga agturay ti mangipakpakita a ‘managayatda iti bagbagida, managayat iti kuarta, napalangguad, natangsit, saan a nasungdo, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, ken natangsitda gapu iti panagpannakkel.’—2 Tim. 3:2-4.
2 Inlaksid idi dagiti umuna a nagannaktayo ti wagas ti panangituray ti Dios. Impagarupda a maaddaanda iti wayawaya no ilaksidda dayta. Ngem kinapudnona, nagpasakupda iti panangituray ni Satanas. Ti innem a milenio a di umiso a panangituray ti tao—a sibibileg nga inimpluensiaan “ti agturay iti daytoy a lubong” a ni Satanas—ti pakaigapuan ti agdama a nakaay-ay-ay pay laeng a kasasaad ti sangatauan. (Juan 12:31) No maipapan iti agdama a kasasaad ti sangatauan, kuna ti The Oxford History of the Twentieth Century nga awan serserbina ti “panangipasdek iti perpekto a lubong.” Inlawlawagna: “Saan laeng nga imposible a maipasdek dayta. Ti panangikagumaanda a mangipasdek iti dayta ket nangyeg iti kakaruan a didigra, totalitarianismo, ken gubat.” Anian a prangka a panangadmitir iti pannakapaay ti turay ti tao!
3. Ania ti maikunatayo iti wagas ti panangituray ti Dios no saan a nagbasol da Adan ken Eva?
3 Anian a nakalkaldaang ta inlaksid dagiti umuna a nagannaktayo ti kakaisuna a naballigi a turay—ti turay ti Dios! Siempre, ditay ammo no ania ti eksakto a pannakabukel ti wagas ti panangituray ni Jehova iti daga no nagtalinaed a matalek kenkuana da Adan ken Eva. Ngem masiguradotayo nga agraira ti ayat ken di panangidumduma iti sidong ti turay ti Dios no nagpasakup iti dayta ti intero a sangatauan. (Ara. 10:34; 1 Juan 4:8) Maibatay iti di maartapan a kinasirib ti Dios, masiguradotayo met a no nagtalinaed a matalek ti sangatauan iti turay ni Jehova, naliklikan koma ti amin a nagkamalian dagidiay mangitantandudo iti turay ti tao. Ti turay ti Dios wenno teokrasia kabaelanna a ‘penken ti tarigagay ti tunggal sibibiag a banag.’ (Sal. 145:16) Iti ababa a pannao, dayta ti perpekto a turay. (Deut. 32:4) Anian a nakalkaldaang ta inlaksid dayta ti tao!
4. Ania ti mangipakita nga adda limitasion ti panangituray ni Satanas?
4 Kaskasdi, nasayaat a laglagipen nga uray impalubos ni Jehova nga iturayan dagiti tattao ti bagbagida, dina pulos insuko ti kalinteganna a mangituray kadagiti parsuana. Uray ti nabileg nga ari ti Babilonia ket napilitan a mangbigbig a “ti Kangatuan isu ti Agturay iti pagarian ti sangatauan.” (Dan. 4:17) Inton agangay, ti Pagarian ti Dios ti mangitungpal iti pagayatanna. (Mat. 6:10) Pudno, temporario nga ipalpalubos ni Jehova nga agtignay ni Satanas kas “ti dios daytoy a sistema ti bambanag” tapno makaipaay daytoy a kabusor iti makapnek a sungbat kadagiti isyu a pinataudna. (2 Cor. 4:4; 1 Juan 5:19) Kaskasdi, saan a kabaelan nga aramiden ni Satanas ti nalablabes ngem iti ipalubos ni Jehova. (2 Cron. 20:6; idilig ti Job 1:11, 12; 2:3-6.) Ken kanayon nga adda dagiti indibidual a nangikeddeng nga agpasakup iti Dios nupay agbibiagda iti lubong nga iturturayan ti kangrunaan a Kabusor ti Dios.
Ti Panangituray ti Dios iti Israel
5. Ania ti inkari ti Israel iti Dios?
5 Manipud idi tiempo ni Abel agingga iti tiempo dagiti patriarka, adu a matalek a tattao ti nagdayaw ken ni Jehova ken nagtulnog kadagiti bilinna. (Heb. 11:4-22) Idi kaaldawan ni Moises, nakitulag ni Jehova kadagiti kaputotan ti patriarka a ni Jacob, ket dagitoy ti nagbalin a nasion ti Israel. Idi 1513 K.K.P., dagiti Israelita ken dagiti kaputotanda nagkarida nga awatenda ni Jehova kas ti Agturay kadakuada, a kunkunada: “Isuamin a sinao ni Jehova situtulokkami a mangaramid.”—Ex. 19:8.
6, 7. Kasano idi ti panangituray ti Dios iti Israel?
6 Adda panggep ni Jehova a nangpili kadagiti Israelita nga agbalin nga ilina. (Basaen ti Deuteronomio 7:7, 8.) Saanna laeng nga inaramid dayta nga agpaay a pagimbagan dagiti Israelita no di ket agpaay iti napatpateg a banag—ti nagan ken kinasoberanona. Ti Israel ti mangsaksi a ni laeng Jehova ti pudno a Dios. (Isa. 43:10; 44:6-8) Gapuna, kinuna ni Jehova iti dayta a nasion: “Nasantuanka nga ili ken Jehova a Diosmo, ket pinilinaka ni Jehova nga agbalin nga ilina, maysa a naisangsangayan a sanikua, manipud iti amin nga ili nga adda iti rabaw ti daga.”—Deut. 14:2.
7 Iti panangituray ti Dios kadagiti Israelita, inkabilanganna ti kinaimperpektoda. Kasta met, perpekto dagiti lintegna ken iyanninawda dagiti galad ti Dios. Dagiti bilin ni Jehova a naited babaen ken Moises itampokda ti kinasanto ti Dios, ti panagayatna iti kinahustisia, ti kinamasindadaanna a mamakawan, ken ti kinaanusna. Idi kaaldawan ni Josue ken dagiti kapanawenanna, nagtulnog ti nasion kadagiti bilin ni Jehova ken tinagiragsakda ti talna ken dagiti naespirituan a bendision. (Jos. 24:21, 22, 31) Dayta a periodo ti pakasaritaan ti Israel ipakitana ti naballigi a wagas ti panangituray ni Jehova.
Dagiti Dakes a Resulta ti Turay ti Tao
8, 9. Ania ti di nainsiriban a kiniddaw ti Israel, ken ania dagiti nagbanaganna?
8 Ngem iti panaglabas ti panawen, masansan nga inlaksid dagiti Israelita ti turay ti Dios isu a napukawda ti pannalaknibna. Idi agangay, babaen ken propeta Samuel, nagkiddaw ti Israel iti tao nga agbalin nga arida. Kinuna ni Jehova a patgan ni Samuel ti kiddawda. Ngem innayon ni Jehova: “Saan a sika ti linaksidda, no di ket siak ti linaksidda iti panagarik kadakuada.” (1 Sam. 8:7) Nupay pinalubosan ni Jehova a maaddaan ti Israel iti natauan nga ari, pinakdaaranna ida kadagiti dakes a resulta ti panangituray ti tao.—Basaen ti 1 Samuel 8:9-18.
9 Paneknekan ti historia a pudno ti pakdaar ni Jehova. Ti panangituray ti tao ket nagresulta kadagiti nakaro a parikut iti Israel, nangruna no saan a matalek ti nagbalin nga arida. Gapuna, saan a pakasdaawan a sipud idi, dagiti natauan gobierno a saan nga agpaspasakup ken Jehova dida nakaipaay kadagiti permanente a pagimbagan ti tao. Pudno, dadduma a politiko ti mangkiddaw iti pamendision ti Dios kadagiti panagreggetda a manggun-od iti talna ken talged, ngem kasano koma a bendisionan ti Dios dagiti saan nga agpaspasakup iti turayna?—Sal. 2:10-12.
Baro a Nasion nga Iturayan ti Dios
10. Apay a nasuktan ti Israel kas ti nasion a pinili ti Dios?
10 Pinaneknekan ti nasion ti Israel a dida kayat ti agserbi a simamatalek ken Jehova. Idi agangay, inlaksidda ti Mesias a dinutokan ti Dios isu nga inlaksid met ida ni Jehova ken pinanggepna a sukatan ida iti maysa a grupo dagiti tattao a mangbukel iti baro a nasion. Kas resultana, idi 33 K.P. nabuangay ti kongregasion Kristiano a buklen dagiti napulotan nga agdaydayaw ken Jehova. Dayta a kongregasion ket arigna a maysa a baro a nasion iti sidong ti panangituray ni Jehova. Tinukoy dayta ni Pablo kas ti “Israel ti Dios.”—Gal. 6:16.
11, 12. Ania ti nagpadaan ti nagkauna nga Israel ken ti “Israel ti Dios” no maipapan kadagiti mangidadaulo?
11 Adda nagdumaan ken nagpadaan ti orihinal a nasion ti Israel ken ti baro nga “Israel ti Dios.” Saan a kas iti nagkauna nga Israel, ti kongregasion Kristiano ket awanan iti natauan nga ari ken saan a masapul a mangidatonda iti animal agpaay kadagiti managbasol. Ti maysa a nagpadaanda ket ti urnos mainaig kadagiti lallakay wenno panglakayen. (Ex. 19:3-8) Dagita a Kristiano a panglakayen saanda nga iturayan ti arban. Imbes ketdi, ipastoranda ti kongregasion ken sipapasnek nga idauluanda dagiti Nakristianuan nga aktibidad. Siaayat a tratuenda ti tunggal maysa iti kongregasion, a padayawan ken raemenda ti isuamin.—2 Cor. 1:24; 1 Ped. 5:2, 3.
12 Dagiti kameng ti “Israel ti Dios” ken ti kaduada a “sabsabali a karnero” ad-adda a maipategda ni Jehova ken ti wagas ti panangiturayna no utobenda ti wagas ti pannakilangen ti Dios iti Israel. (Juan 10:16) Kas pagarigan, ipakita ti pakasaritaan a dakkel ti impluensia dagiti agturay kadagiti iturayanda, nasayaat man dayta wenno dakes. Dayta a kinapudno ipaganetgetna kadagiti mangidadaulo kadagiti Kristiano a nupay saanda nga agturay a kas kadagiti nagkauna nga ar-ari, masapul a kanayon a mapagwadanda iti pammati.—Heb. 13:7.
No Kasano ti Panangituray ni Jehova Ita
13. Ania ti napateg a napasamak idi 1914?
13 Iti intero a lubong, iwarwaragawag ita dagiti Kristiano nga asidegen nga agpatingga ti turay ti tao. Idi 1914, impasdek ni Jehova ti Pagarianna idiay langit ken ni Jesu-Kristo ti dinutokanna kas Ari. Iti daydi a tiempo, intedna ken Jesus ti autoridad a “mangparmek ken tapno an-anayenna ti panagballigina.” (Apoc. 6:2) Naibilin iti baro a naitrono nga Ari: “Mapanka mangparukma iti tengnga dagiti kabusormo.” (Sal. 110:2) Nakalkaldaang ta nagtultuloy a di nagpasakup dagiti nasion iti turay ni Jehova. Nagtultuloyda a nagtignay a kasla “awan ti Jehova.”—Sal. 14:1.
14, 15. (a) Kasano ti panangituray kadatayo ti Pagarian ti Dios ita, ken ania dagiti nasken nga isaludsodtayo mainaig iti dayta? (b) Kasano a napaneknekan a kasayaatan latta ti panangituray ti Dios?
14 Adda sumagmamano pay a natda kadagiti napulotan a kameng ti “Israel ti Dios,” ken kas kakabsat ni Jesus, agtultuloyda nga agserbi kas “embahador a mangisunsuno ken Kristo.” (2 Cor. 5:20) Nadutokanda kas matalek ken masirib a klase adipen a mangaywan ken mangipaay iti naespirituan a taraon kadagiti napulotan ken iti dumakdakkel a bunggoy dagiti Kristiano a pakairamanan ita ti minilion a mangnamnama nga agbiag nga agnanayon ditoy daga. (Mat. 24:45-47; Apoc. 7:9-15) Nabatad a bembendisionan ni Jehova dayta nga urnos kas paneknekan ti naespirituan a kinarang-ay a tagtagiragsaken dagiti pudno nga agdaydayaw ita.
15 Nasayaat nga isaludsod ti tunggal maysa kadatayo: ‘Naan-anay kadi a maawatak dagiti responsabilidad a masapul nga itungpalko iti uneg ti kongregasion Kristiano? Siuumiso kadi a supsuportarak ti wagas ti panangituray ni Jehova? Maragsakanak kadi nga agbalin nga iturayan ti Pagarian ni Jehova? Determinadoak kadi a mangitultuloy a mangipakaammo iti Pagarian ti Dios agingga iti kabaelak?’ Kas maysa a grupo, situtuloktayo nga agtulnog iti bilin ti Bagi a Manarawidwid ken makikooperar kadagiti nadutokan a panglakayen iti kongregasion. Iti kasta, ipakpakitatayo nga agpaspasakuptayo iti panangituray ti Dios. (Basaen ti Hebreo 13:17.) Ti situtulok a panagpasakup ket agresulta iti sangalubongan a panagkaykaysa a naisangsangayan iti daytoy nabingaybingay a lubong. Mangyeg met dayta iti talna ken kinalinteg ken pakaidayawan ni Jehova, a mangpaneknek a kasayaatan latta ti wagas ti panangiturayna.
Agballigi ti Turay ni Jehova
16. Ania a pangngeddeng ti masapul nga aramiden ti tunggal maysa ita?
16 Napartak ti iyaadani ti pannakarisut dagiti isyu a napataud idiay Eden. Gapuna, itan ti tiempo a masapul nga agtignay dagiti tattao. Nasken nga ikeddeng ti tunggal maysa no isu ket agpasakup iti turay ni Jehova wenno iti turay ti tao. Pribilehiotayo a tulongan dagiti naemma a mangaramid iti umiso a pangngeddeng. Iti din agbayag, inton Armagedon, permanente a sukatan ti turay ni Jehova dagiti gobierno ti tao nga im-impluensiaan ni Satanas. (Dan. 2:44; Apoc. 16:16) Agpatingganto ti turay ti tao ket ti Pagarian ti Dios ti mangituray iti intero a daga. Naan-anayto a maalangon ti wagas ti panangituray ni Jehova.—Basaen ti Apocalipsis 21:3-5.
17. Ania dagiti kinapudno a makatulong kadagiti naemma tapno siuumiso a maikeddengda ti turay a dasiganda?
17 Dagidiay saan pay a naan-anay a nakapagdesision a dumasig ken Jehova ti nasken a mangikabilangan buyogen ti kararag no ania dagiti gunggona nga itden ti panangituray ti Dios iti sangatauan. Saan a narisut ti turay ti tao dagiti parikut a kas iti krimen ken terorismo. Ti turay ti Dios ikkatennanto ti amin a kinadakes ditoy daga. (Sal. 37:1, 2, 9) Ti turay ti tao ket nagresulta iti agsasaruno a gubat, ngem ti turay ti Dios “pagsardengenna dagiti gubat agingga iti ungto ti daga.” (Sal. 46:9) Isublina pay ti talna iti nagbaetan ti tao ken animal! (Isa. 11:6-9) Nasaknap ti kinapanglaw ken panagbisin iti sidong ti turay ti tao, ngem ikkaten dagita ti turay ti Dios. (Isa. 65:21) Uray dagiti turay ti tao nga addaan iti kasayaatan a motibo saanda a naikkat ti sakit ken ipapatay. Ngem iti sidong ti turay ti Dios, siraragsak nga agsubli iti kinasalibukagda dagiti nataengan ken masakit. (Job 33:25; Isa. 35:5, 6) Kinapudnona, agbalinto a paraiso ti daga ken agungarto iti dayta dagiti natay.—Luc. 23:43; Ara. 24:15.
18. Kasano a maipakitatayo a patientayo a ti wagas ti panangituray ti Dios ti kasayaatan?
18 Wen, ikkaten ti turay ti Dios ti amin a pakarigatan a pinataud ni Satanas idi inimpluensiaanna ti umuna a nagannaktayo a tumallikud iti Namarsua. Ken panunotenyo no kasano a mangparparigat ni Satanas iti agarup 6,000 a tawenen, ngem ti Dios ikkatenna amin dagita a pakarigatan iti uneg ti 1,000 a tawen babaen ken Kristo! Anian a nagdayag a pammaneknek iti kinatan-ok ti wagas ti panangituray ti Dios! Kas Saksi maipaay iti Diostayo, isu ti bigbigentayo nga Agturay kadatayo. Gapuna, ipakitatayo iti kada aldaw, iti kada oras pay ketdi, nga agdaydayawtayo ken Jehova, nga agpapaituraytayo iti Pagarianna, ken maragsakantayo nga agbalin a Saksina. Ken gundawayantayo ti tunggal oportunidad a mangipakaammo iti asinoman a mayat a dumngeg a ti wagas ti panangituray ni Jehova ti kasayaatan.
No Maipapan iti Panangituray ti Dios, Ania ti Maadaltayo iti . . .
• Hebreo 13:17?
[Dagiti Ladawan iti panid 29]
Saan a pulos nga insuko ni Jehova ti kalinteganna a mangituray
[Ladawan iti panid 31]
Ti situtulok a panagpasakup iti wagas ti panangituray ni Jehova ket agresulta iti sangalubongan a panagkaykaysa