Maysa a Pagarian a Mangbalbaliw iti Intero a Daga

AMMOM kadi no ania a Pagarian dayta?​—a Dayta daydiay insuro ni Jesus nga ikararagtayo. Insurona a kiddawentayo iti Dios: “Umay koma ti pagariam.” (Mateo 6:9, 10) Iti dandanin 2,000 a tawen, dagiti pasurot ni Jesus inkarkararagda iti Dios nga umay koma ti Pagarianna. Ikarkararagmo met kadi dayta?​—

Tapno maawatam no ania ti pagarian, nasken nga ammom no ania ti makunkuna nga ari. Ti ari ket maysa nga agturay. Adda masakupan ti panagturayna. Ti masakupan ti turay ti Pagarian ti Dios ket ramanenna ti intero a daga. Inton umay ti Pagarian ti Dios, tagiragsakento ti amin a tattao ditoy daga dagiti bendision a resulta ti panagturayna.

Ti Pagarian ti Dios ket maysa a nailangitan a gobierno. Iti Isaias 9:6, saritaen ti Biblia ti maipapan iti Agturay iti dayta a gobierno. Kastoy ti kinuna ti Biblia maipapan kenkuana: “Adda maysa nga ubing a nayanak kadatayo, . . . ket ti naprinsipean a panagturay maiparabawto iti abagana. Ket mapanagananto iti . . . Prinsipe ti Kappia.”

Ammom kadi no ania ti makuna a prinsipe?​— Wen, dayta ti anak ti maysa nga ari. Ammom kadi met no asino ti nailangitan nga Ari?​— Umiso ti sungbatmo no kunam a ni Jehova. Isu daydiay inawagan ti Biblia kas “ti Kangatuan iti intero a daga.” (Salmo 83:18) Iti Biblia, masansan a ni Jesus ti naawagan kas ti “Anak ti Dios.” Ti maysa a rason ket impaay ni Jehova ti biag ni Jesus. Ni Jehova ti pudno nga Ama ni Jesus.​—Lucas 1:34, 35; Juan 1:34, 49; 3:17; 11:27; 20:31; Aramid 9:20.

Maysa a naisangsangayan a gobierno ti Pagarian ti Dios nga insuro ni Jesus nga ikararagtayo. Maysa dayta a “naprinsipean a panagturay” agsipud ta ni Jehova ti nangipatugaw iti Anakna, ni Jesus, kas Agturay wenno Ari iti Pagarian. Ngem ammom kadi nga adda pay dadduma a napili a makipagturay kas ari a kadua ni Jesus iti Pagarian ni Amana?​— Pagsaritaanta man ti maipapan kadakuada.

Sakbay ti ipapatayna, imbaga ni Jesus kadagiti matalek nga apostolna ti ipapanna iti “balay” ni Amana idiay langit. “Mapanak ket mangisaganaak iti lugar a maipaay kadakayo,” kinunana, “tapno no sadino ti ayanko addakayo met koma.” (Juan 14:1-3) Ammom kadi ti aramiden idiay langit dagiti apostol ken ti dadduma pay a napili a kadua ni Jesus?​— “Makipagturaydanto kenkuana kas ar-ari.” Ibaga pay ti Biblia no mano ti makipagturay ken Jesus kas ari. Addanto 144,000.​—Apocalipsis 14:1, 3; 20:6.

Ania ti pagarupmo a kasasaadto ti daga inton agturay ti Prinsipe ti Kappia ken dagiti 144,000?​— Sigurado a nagsayaatto ti kasasaad! Awanton ti gubat. Agkakappianton dagiti animal ken dagiti tattao. Awanen ti agsakit ken matay. Makakitanton dagiti bulsek, makangngegton dagiti tuleng, agtaray ken aglagtonto dagiti pilay a kas iti ugsa. Mangtedto ti daga iti naimas a taraon para iti amin. Agiinnayatto ti amin a tattao kas insuro ni Jesus nga aramiden dagiti adalanna. (Juan 13:34, 35) Kitaenta dagiti bersikulo a nailista iti libro ni Isaias ket basaenta ti maipapan kadagiti nakaskasdaaw a mapasamak.​—Isaias 2:4; 11:6-11; 25:8; 33:24; 35:5, 6; 65:21-24.

Sipud pay idi insuro ni Jesus dagiti tattao nga ikararagda nga “umay koma ti pagariam,” minilmilionen a tattao ti nakaammo maipapan iti dayta a Pagarian. Daytoy a pannakaammo ti nangbalbaliw iti biagda. Din agbayag, inton suktanen dayta a Pagarian ti amin a gobierno ditoy daga, addanton talna, kinasalun-at, ken kinaragsak. Tagiragsakento dayta ti amin nga agserserbi ken Jehova a Dios ken iti pinilina nga agturay a ni Jesu-Kristo.​—Juan 17:3.