Salsaludsod Dagiti Agbasbasa
Kinuna ni Jesus kadagiti agdengdengngeg kenkuana: “Masapul nga agbalinkayo a perpekto, a kas iti nailangitan nga Amayo a perpekto.” Kasano nga ‘agbalin a perpekto’ dagiti tattao ita?—Mat. 5:48.
Masungbatan dayta a saludsod no matarusantayo no kasano a nausar iti Biblia ti sasao a “perpekto” ken “kinaperpekto.” Saan nga amin a tukoyen ti Kasuratan kas “perpekto” ket naan-anay a perpekto. Siempre, naan-anay ti kinaperpekto ni Jehova. Ngem dagiti tattao wenno bambanag maibilangda a perpekto iti dadduma nga aspeto ngem iti relatibo laeng nga anag. Iti Biblia, dagiti sao a Hebreo ken Griego a naipatarus kas “perpekto” ket masansan a kaipapananna ti “kompleto,” “naan-anay,” wenno “awan mulitna” sigun kadagiti pagalagadan nga impasdek ti autoridad. No mausar dayta iti inaldaw a saritaan, tuktukoyenna ti relatibo a kinaperpekto.
Naparsua da Adan ken Eva a perpekto iti moral, naespirituan, ken pisikal. Perpektoda sigun iti pagalagadan nga impasdek ti Namarsua kadakuada. Gapu iti panagsukirda, saanda a naannurot dayta a pagalagadan isu a napukawda ti kinaperpektoda agraman dagiti kaputotanda. Iti kasta, simrek iti sangatauan ti basol, kinaimperpekto, ken ipapatay babaen ken Adan.—Roma 5:12.
Ngem nalawag a kinuna ni Jesus iti Sermonna iti Bantay nga uray dagiti imperpekto a tattao ket posible nga agbalinda a perpekto iti relatibo nga anag. Iti dayta a palawagna, nangipasdek kadagiti pagalagadan no ania ti perpekto wenno naan-anay nga ayat. Dayta a kita ti ayat ti impakita ti Dios iti sangatauan. Kinuna ni Jesus: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit, yantangay pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mat. 5:44, 45) Babaen ti panangipakita iti ayat iti kasta a pamay-an, tultuladen dagiti adalan ni Jesus ti perpekto nga ulidan ti Dios.
Ikagkagumaan ita dagiti Saksi ni Jehova a salimetmetan ti kasta a nangato a pagalagadan ti ayat agpaay iti sabsabali. Kayatda a tulongan ti amin a tattao a nagduduma ti nalikudan, puli, ken relihionda tapno makagun-odda iti umiso a pannakaammo maipapan iti kinapudno a linaon ti Biblia. Iti 236 a dagdaga, mangikonkondukta dagiti Saksi iti nasurok a 7,000,000 a panagadal iti Biblia kadagiti interesado a tattao.
“No ayatenyo dagidiay mangay-ayat kadakayo, ania a gunggona ti adda kadakayo?” insaludsod ni Jesus. “Saan aya nga ar-aramiden met dagiti agsingsingir iti buis ti isu met laeng a banag? Ket no ti kakabsatyo laeng ti kablaawanyo, ania a naisangsangayan a banag ti ar-aramidenyo? Saan aya nga ar-aramiden met dagiti tattao iti nasnasion ti isu met laeng a banag?” (Mat. 5:46, 47) Saan a mangidumduma dagiti pudno a Kristiano gapu iti adal wenno kultura; ken saanda laeng nga ayaten dagidiay mangay-ayat kadakuada. Imbes ketdi, tulonganda dagiti napanglaw ken masakit, dagiti agtutubo ken nataengan. Kadagiti kasta a pamay-an a matulad dagiti Kristiano ti ayat ni Jehova. Iti kasta, agbalinda a perpekto iti relatibo nga anag.
Matagiragsaktayto kadi ti kinaperpekto a napukaw ni Adan? Wen, babaen ti pammati iti pangsubbot a daton ni Jesus, agbalinton a perpekto dagiti natulnog a tattao bayat ti Milenio a Panagturay ni Kristo, inton ‘ti Anak ti Dios dadaelenna dagiti aramid ti Diablo.’—1 Juan 3:8.