Perpekto a Biag—Saan nga Arapaap Laeng!
Perpekto a lubong—ania ti kaipapanan dayta kadakayo? Arapaapenyo ti lubong nga awan ti krimen, panagdroga, bisin, kinapanglaw, wenno kinakillo. Tagtagiragsaken ti amin ti emosional ken pisikal a salun-at. Awan ti ladingit wenno liday gapu ta awanen uray ni patay. Realistiko aya ti agarapaap iti kasta a lubong?
NUPAY saan a tagibassiten ti kaaduan a tattao dagiti rinang-ayan ti siensia ken teknolohia, saanda a talaga a patien a kabaelan ti natauan a sirib ken pannakaammo nga ipasdek ti perpekto a lubong a pangsagrapan ti amin iti talna ken ragsak. Iti sabali a bangir, di mailibak a naikasigudan a kayat ti tao a pasayaaten dagiti bambanag ken parmeken dagiti pagkapuyan. Siempre, saan a makatulong kadagiti awanan pagtaengan ken napanglaw ti basta di realistiko a panagarapaap. Saanna met a mapennek dagiti adda an-annayenna ken masakit nga agtarigagay a mabang-aran iti sagsagabaenda. Saan a kabaelan ti tao ti mangbangon iti perpekto a lubong. Nupay kasta, iti laksid ti mapaspasamak a rigat ken panangirurumen, adda dagiti natalged a pamatian a talaga nga asidegen a maipasdek ti lubong a maawaganyo a perpekto.
No perpekto a biag ti pagsasaritaan, mabalin a ti biag ni Jesu-Kristo ti sumiplot iti panunotyo. Saan laeng a ni Jesus ti perpekto a tao a nagbiag ditoy daga. Tinagiragsak idi da Adan ken Eva ti perpekto a biag iti paraiso. Naparsuada a kaladladawan ti Dios. Nupay kasta, napukawda daytoy nagsayaat a kasasaad gapu iti panagsukirda iti nailangitan nga Amada. (Genesis 3:1-6) Ngem ti Namarsua insaadna kadagiti tattao ti tarigagay nga agbiag nga agnanayon, kas paneknekan ti Eclesiastes 3:11: “[Ti Dios] inaramidna ti tunggal banag a naimnas iti panawenna: kasta met nga isu insaadna ti kinaagnanayon idiay pusoda, nupay kasta ti tao, dina matuntonan ti aramid nga inaramid ti Dios nanipud idi punganay agingga iti panungpalan.”
Nupay nagbalin a ‘barengbareng’ ti panagbiag ti sangatauan ken ‘naadipenda iti panagrupsa’ gapu iti kinaimperpekto ken basol, imutektekanyo dagiti makaliwliwa a sasao ni apostol Pablo: “Ti sigagagar a panangsegga ti sangaparsuaan ket agur-uray iti pannakaipanayag dagiti annak ti Dios. Ta ti sangaparsuaan naipasakop iti kinabarengbareng, saan a babaen ti kabukbukodanna a nakem no di ket babaen kenkuana a nangipasakup iti dayta, a maibatay iti namnama a ti sangaparsuaan a mismo mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.” (Roma 8:19-21) Nalawag nga ipakita ti Biblia a ni Jesu-Kristo ti usaren ti Dios a mangisubli iti perpekto a biag ti tao.—Juan 3:16; 17:3.
Malaksid iti daytoy nagsayaat a namnama iti masanguanan, kabaelantay amin ti rumang-ay iti naespirituan, ket maiparangarang ti irarang-aytayo uray ita.
Ikagumaanyo ti Agbalin a Nainkalintegan
Napateg unay ken Jesu-Kristo ti maipapan iti panagbalin a perpekto, isut’ gapuna a kinunana iti umariwekwek a tattao a dimngeg kenkuana: “Masapul nga agbalinkayo a perpekto, a kas iti nailangitan nga Amayo a perpekto.” (Mateo 5:48) Talaga kadi a ninamnama ni Jesus nga agbalintayo a perpekto iti agdama a dakes a sistema? Saan. Siempre, ikagumaantay koma nga iparangarang dagiti galad a kas iti kinamanagparabur, kinamanangngaasi, ken panagayat kadagiti padatayo a tattao, ngem masansan a ditay maaramid ti umiso. Insurat uray ti maysa kadagiti apostol ni Jesus: “No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo ken tapno dalusannatayo manipud iti amin a kinakillo. No kunaentayo: ‘Ditay nagbasol,’ isu pagbalbalinentayo a naulbod, ket ti saona awan kadatayo.”—1 Juan 1:9, 10.
Nupay kasta, mapasayaattayo ti panangmatmattayo iti bagbagitayo ken ti panangtratotayo kadagiti sabsabali, a ditay aglablabes. Sadino ti pakasarakan iti nasaysayaat a balakad iti panangpatanor iti natimbeng, nainkalintegan a personalidad ngem iti balakad a masarakan iti Sao ti Dios, ti Biblia? Ti panangiparangarang kadagiti galad a kas iti rag-o ken kinatimbeng tulongannatayo a makilangen kadagiti sabsabali iti panggedan, iti asawa, ken kadagiti nagannak wenno annaktayo. Binalakadan ni apostol Pablo dagiti Kristiano: “Kankanayon nga agrag-okayo iti Apo. Maminsan pay a kunaek, Agrag-okayo! Maammuan koma dagiti isuamin a tattao ti kina-nainkalinteganyo.”—Filipos 4:4, 5.
Dagiti Pagsayaatan ti Panagbalin a Nainkalintegan
Agpaay a pagimbaganyo ken dagiti sabsabali no nainkalintegan dagiti namnamaenyo ken dikay agbalin a perpeksionista a mangparigat ken mamagparikut laeng kadakayo. Ti panangbigbig iti pudpudno a kabaelanyo ramanenna ti panagbalin a realistiko ken rasonable maipapan iti kayatyo nga aramiden. Laglagipenyo, pinarsuanatayo ti Dios tapno agbiag ditoy daga ken maragsakan iti makapnek a trabaho a pagimbagantayo ken dagiti sabsabali.—Genesis 2:7-9.
No naingetkay unay iti bagiyo, apay a diyo ikararag dayta ken Jehova? Dakkel a pakabang-aranyo no magun-odyo ti anamong ti Dios. Ammo ni Jehova ti pakabuklan ken ti imperpekto a kasasaadtayo, isut’ gapuna a rasonable ken saan a narigat nga ay-aywen. Ipatalged ti salmista kadatayo: “Kas panangngaasi ti maysa nga ama kadagiti annakna, kasta ti panangngaasi ni Jehova kadagiti agbuteng kenkuana. Ta ammona ti pannakasukogtayo; isu malagipna a datayo tapoktayo.” (Salmo 103:13, 14) Anian a yamantayo ta naasi ti Dios kadagiti tattao! Ammona dagiti pagkapuyantayo, ngem napategtayo latta kenkuana kas dungdungnguenna nga annak.
Imbes nga agbalintayo a perpeksionista, anian a nasaysayaat nga amang no patanorentayo ti naespirituan a pannakaawat ken natimbeng a panangmatmat! Maysa pay, masiguradotayo nga awan ti makalapped ken Jehova a mangtungpal iti panggepna a mamagbalin iti sangatauan a perpekto iti sidong ti Pagarian ti Dios. Ngem ania ti kayat a sawen ti panagbalin ti tao a perpekto?
Nasaysayaat ti Perpekto a Biag Ngem ti Panagbalin a Perpeksionista
Ti panagbalin a perpekto dina kaipapanan ti panagbalin a perpeksionista. Saanto a nainget ken aginlilinteg dagidiay maparaburan nga agbiag iti Paraiso a daga iti sidong ti Pagarian ti Dios. Ti maysa kadagiti maiparebbeng tapno makalasat iti dakkel a rigat isu ti naimpusuan a panangapresiar iti daton a pangsubbot, kas inyebkas ti dakkel a bunggoy a naggapu iti amin a nasion a dineskribir ni apostol Juan: “Ti pannakaisalakan utangtayo iti Diostayo, a situtugaw iti trono, ken iti Kordero.” (Apocalipsis 7:9, 10, 14) Agyamanto dagiti amin a makalasat iti um-umay a dakkel a rigat ta situtulok ni Kristo a natay gapu kadakuada ken kadagiti amin a mamati kenkuana. Ti naayat a sakripisiona ti pakaibatayan ti manayon a pannakaikkat dagiti pakapilawan ken pagkapuyan.—Juan 3:16; Roma 8:21, 22.
Anianto ti kasasaad no perpekton dagiti tattao? Imbes a panagsasalisal ken panagiinnartap, ti ayat ken kinaimbag iti nagbabaetan dagiti tattao pagbalinennanto a makapnek ti biag, ket awanton ti masikoran ken makarikna a saanda a napateg. Nupay kasta, saanto a makapasikor wenno makauma ti perpekto a biag. Saan nga ipaay ti Sao ti Dios ti amin a detalye maipapan iti Paraiso ngem deskribirenna ti kasasaad ti biag a manamnamatayo: “Bangonendanto dagiti balbalay, ken agtaengdanto kadakuada; ket agmuladanto kadagiti kaubasan, ket kanendanto ti bungada. Isuda didanto mangbangon, ket sabali ti agnaed; didanto agmula ket sabali ti mangan; ta kas kadagiti al-aldaw ti maysa a kayo kastadanto dagiti al-aldaw ti ilik, ket dagiti pinilik agragsakdanto iti mabayag iti aramid dagiti im-imada. Isuda didanto agtrabaho iti ubbaw, didanto agpasngay a maipaay iti didigra.”— Isaias 65:21-23.
Imbes a panunotenyo no anianto a kita ti paglinglingayan, pag-shopping-an, teknolohia, wenno pagluganan ti ipaay ti Pagarian, iladawanyo ti bagiyo a mangtagtagiragsak iti kaitungpalan dagitoy a sasao: “Ti lobo ken ti kordero aglanglangdanto nga agarab, ket ti leon manganto iti garami a kas iti baka; ket ti tapok isunto ti kanen ti uleg. Didanto mangranggas, didanto met mangdadael iti amin a nasantuan a bantayko, kuna ni Jehova.” (Isaias 65:25) Anian a naidumanto ti perpekto a biag iti agdama a kasasaad! No maibilangkayto kadagidiay maikari nga agbiag iti dayta a tiempo, makapagtalekkayo a maseknanto ti naayat a nailangitan nga Amayo kadakayo ken iti pamiliayo. “Pagay-ayatam met ni Jehova; ket isu itdennanto kenka dagiti tarigagay ta pusom.”—Salmo 37:4.
Saan nga arapaap laeng ti perpekto a biag. Matungpalto a naan-anay ti naayat a panggep ni Jehova iti sangatauan. Mabalin a maibilangkayto ken ti pamiliayo kadagidiay mapagbalin a perpekto ken agbiag nga agnanayon iti baro a lubong ti Dios. Impakpakauna ti Biblia: “Ti sililinteg tawidennanto ti daga, ket agtaengto kenkuana nga agnanayon.”—Salmo 37:29.
[Ladawan iti panid 6]
Mapasayaattayo ti panangmatmattayo iti bagitayo ken kadagiti sabsabali, a ditay agbalin a perpeksionista wenno nainget
[Ladawan iti panid 7]
Apay a diyo sirmataen a tagtagiragsakenyon ti natalna ken nalinteg a kasasaad iti Paraiso?