Agsursuroka iti Sao ti Dios

Adda Kadi Namnama Dagiti Natay?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Ania ti namnama dagiti natay?

Idi dimteng ni Jesus idiay Betania iti asideg ti Jerusalem, uppat nga aldawen a natay ti gayyemna a ni Lazaro. Napan ni Jesus iti tanem a kadua da Marta ken Maria a kakabsat ni Lazaro. Simmaruno met kadakuada ti bunggoy ti tattao. Mailadawam kadi ti rag-o da Marta ken Maria idi pinagungar ni Jesus ti kabsatda?​—Basaem ti Juan 11:20-24, 38-44.

Mamati ni Marta nga agungarto dagiti natay. Nabayagen nga ammo dagiti matalek nga adipen ni Jehova nga iti masanguanan, pagungarento ti Dios dagiti natay tapno agnaedda met laeng ditoy daga.​—Basaem ti Job 14:14, 15.

2. Ania ti kasasaad dagiti natay?

Pudno a ti sibibiag a tao ken animal ket addaan iti puersa ti biag, wenno “espiritu,” ngem saantayo nga espiritu a parsua a lumuglugan laeng iti nainlasagan a bagi. (Eclesiastes 3:19; Genesis 7:21, 22) Naaramidtayo kas pisikal a parsua a naggapu iti tapok. (Genesis 2:7; 3:19) No matay ti utektayo, mapukaw metten ti panunottayo. Gapuna, idi napagungar ni Lazaro, awan ti naestoriana a pasamak kabayatan ti ipapatayna gapu ta awan ti puot dagiti natay.​—Basaem ti Salmo 146:4; Eclesiastes 9:5, 10.

Nalawag a saan nga agsagsagaba dagiti natay. Palso ngarud ti sursuro a tutuoken ti Dios dagiti tattao kalpasan ti ipapatay. Pammadakes dayta iti Dios. Makarimon kenkuana ti kapanunotan a matutuok dagiti tattao iti apuy.​—Basaem ti Jeremias 7:31.

3. Makasaritatayo kadi dagiti natay?

Saan a makasao dagiti natay. (Salmo 115:17) Ngem adda dagiti dakes nga anghel a mabalin a makisarita kadagiti tattao, ket agpammarangda kas espiritu daydiay natay. (2 Pedro 2:4) Iparit ni Jehova ti panangpadas a makisarita kadagiti natay.​—Basaem ti Deuteronomio 18:10, 11.

4. Siasino dagiti mapagungar?

Iti umay a baro a lubong, agungarto ti minilion a tattao nga adda iti tanem. Agungarto met ti sumagmamano a nagaramid iti dakes gapu ta saanda a naam-ammo ni Jehova.​—Basaem ti Lucas 23:43; Aramid 24:15.

Amin a mapagungar maikkandanto iti gundaway a makasursuro iti kinapudno maipapan iti Dios ken tapno maipaneknekda nga adda pammatida ken Jesus babaen ti panagtulnogda kenkuana. (Apocalipsis 20:11-13) Dagidiay napagungar nga agaramid iti naimbag agbiagdanto nga agnanayon ditoy daga. Ngem addanto dagiti napagungar nga agaramid latta iti dakes. Ti panagungarda ket “panagungar iti pannakaukom.”​—Basaem ti Juan 5:28, 29.

5. Ania a galad ni Jehova ti ipamatmat ti panagungar?

Nagbalin a posible ti panagungar dagiti natay gapu ta imbaon ti Dios ti Anakna a mangited iti biagna para kadatayo. Ebkas ngarud dayta ti ayat ken di kaikarian a kinamanangngaasi ni Jehova.​—Basaem ti Juan 3:16; Roma 6:23.

Para iti kanayonan nga impormasion, kitaem ti kapitulo 6 ken 7 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 16]

Naparsua ni Adan manipud iti tapok