Asino a Talaga ti Mangiturturay iti Lubong

NALABIT awan pay naam-ammom a lider ti maysa a sindikato a grupo. Ngem kaipapananna kadi nga awan ti kasta a lider? Nalaing nga agpammarang dagiti kasta a lider iti krimen. Makapagmandarda pay ketdi uray no addada iti pagbaludan. Isu a no adda madamagtayo nga aglalaban a sindikato ti droga, agraira a prostitusion, ken pannakailako dagiti tattao, nalakatayo a maibaga a talaga nga adda utek wenno lider dagitoy a kriminal.

Ti Biblia a Sao ti Dios ipalgakna a ni Satanas ket maysa a pudno a persona. Kas iti nabileg a lider dagiti sindikato, determinado a mangibanag iti pagayatanna babaen iti “ulbod a pagilasinan” ken “nakillo a panangallilaw.” Iti kinapudnona, “pagbalbalinenna ti bagina a kasla anghel ti lawag,” kuna ti Biblia. (2 Tesalonica 2:9, 10; 2 Corinto 11:14) Maikuna nga adda Diablo gapu kadagiti dakes a gapuananna. Ngem saan a patien ti adu a tattao nga adda di makita a nadangkes nga espiritu. Sakbay nga usigentayo ti kunaen ti Biblia maipapan iti Diablo, kitaentayo ti sumagmamano a palso a pammati no apay a saan a patien ti adu a tattao a ti Diablo ket talaga a persona.

◼ “No naayat ti Dios, apay a nangparsua iti Diablo?” Gapu ta ibaga ti Biblia a naimbag ken perpekto ti Dios, kasla di maikanatad a panunotentayo a nangparsua iti nadangkes a persona. Iti kinapudnona, saan nga ibagbaga ti Biblia a pinarsua ti Dios ti kasta a persona. Imbes ketdi, kunaenna maipapan iti Dios: “Ti Bato, naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.”​—Deuteronomio 32:4; Salmo 5:4.

Usigentayo ngarud no posible nga agaramid iti dakes ti perpekto a persona a pinarsua ti Dios. Naidumada kadagiti robot, ta impaayan ida ti Dios iti wayawaya nga agpili, no agaramidda iti naimbag wenno dakes. Gapuna, napateg no ania ti aramiden ti perpekto ken nasaririt a parsua​—tao man wenno espiritu​—a makabael nga agdesision a bukbukodna.

No kasta, saan a nainkalintegan nga ipaayan ti Dios dagiti parsuana iti wayawaya nga agpili no lapdanna met ida nga agaramid iti dakes. Nadakamat ti di umiso a panangusar iti wayawaya nga agpili idi kinuna ni Jesus maipapan iti Diablo: “Saan a nagtakder a di maisin iti kinapudno.” (Juan 8:44) Nalawag nga ipakita dagita a sasao a daydiay nagbalin a Diablo ket perpekto idi nga espiritu a persona, a mangsalsalimetmet iti kinapudno.a Inikkan ni Jehova a Dios dagiti parsuana iti wayawaya nga agpili gapu ta ay-ayatenna ida ken agtalek kadakuada.​—Kitaem ti kahon a “Posible Kadi a Mapukaw ti Kinaperpekto ti Perpekto a Parsua?” iti panid 6.

◼ “Ti Diablo ket adipen ti Dios” Kuna ti dadduma a kasta ti ibagbaga ti libro ti Biblia a Job. Sigun iti maysa a komentario iti Biblia, ti ‘panagsursor ti Diablo iti daga’ tukoyenna ti ar-aramiden idi dagiti nagkauna a Persiano nga espia a panagbiahe ken panagipadamag iti ari. (Job 1:7) No ti Diablo ket adipen ti Dios, apay ngarud a masapul nga ilawlawagna iti Dios no apay a ‘nagsursor iti daga’? Imbes a kunaen ti salaysay ti Job a ti Diablo ket adipen ti Dios, inawaganna ketdi dayta iti Satanas, a kaipapananna “Bumusbusor,” a mangipasimudaag nga isu ti kangrunaan a Kabusor ti Dios. (Job 1:6) Nagtaudan ngarud ti kapanunotan nga agserserbi ti Diablo iti Dios?

Idi pay umuna a siglo C.E., dagiti libro nga apokripa, kas ti “Libro dagiti Jubileo” ken ti “Paglintegan ti Kagimongan” iti sekta a Qumran, inladawanda ti Diablo a makitintinnawar iti Dios ngem agpaspasakup latta Kenkuana. Sigun iti historiador a ni J. B. Russell iti librona a Mephistopheles, kinunana a ti Protestante a Repormador a ni Martin Luther imbilangna ti Diablo kas instrumento ti Dios, “kas iti alikamen a pagarbas wenno gabion nga ar-aramatenna iti hardinna.” Kuna pay ni Russell a “pagay-ayat ti gabion a pukawen dagiti ruot,” ngem iggem dayta ti nabileg nga ima ti Dios, iti kasta tungpalenna ti pagayatan ti Dios. Ti sursuro ni Luther​—nga inawat met ti Pranses a teologo a ni John Calvin​—ket di nagustuan ti adu a managayat iti hustisia. Apay koma nga ipalubos ken panggepen ti naayat a Dios a mapasamak ti kinadakes? (Santiago 1:13) Daytoy a doktrina, agraman dagiti nakaam-amak a pasamak iti maika-20 a siglo, ti makagapu nga adu a tattao ti saan a mamati iti Dios ken iti Diablo.

◼ “Ti Diablo ket kinadakes laeng iti panunot ti tao” No ibilangtayo ti Diablo kas kinadakes laeng nga adda iti panunot, marigatantayo a mangtarus iti dadduma a sasao ti Biblia. Kas pagarigan, asino ti kasarsarita ti Dios iti Job 2:3-6? Kasarsaritana ngata ti kinadakes a pampanunoten ni Job, wenno kasarsaritana pay ketdi ti bagina? Maysa pay, padayawan ngata ti Dios dagiti nasayaat a kababalin ni Job sana ipalubos a masuot babaen iti kinadakes nga adda met la iti panunot ni Job? No kasta ti panangipapantayo, kaslatayo ibagbaga a nakillo ti Dios, ken saan a pudno a “kenkuana awan ti kinakillo.” (Salmo 92:15) Maisupadi iti dayta, di kinayat ti Dios a dangran ni Job. Nalawag ngarud a ti Diablo ket saan a kinadakes nga adda iti panunot wenno dakes a personalidad ti Dios, no di ket maysa nga espiritu a namagbalin iti bagina a Kabusor ti Dios.

Asino a Talaga ti Agturturay iti Lubong?

Adu a tattao ita ti mangipapan a saanen nga uso ti panamati iti Diablo. Ngem no pudno nga awan ti Diablo, awanen ti makapnek a sungbat no apay nga adda kinadakes. Kinapudnona, gapu ta di mamati ti adu nga adda Diablo, saanda metten a patien nga adda Dios ken adda pagalagadan ti naimbag ken dakes.

“Ti kasisikapan a panangallilaw ti diablo,” insurat ni Charles-Pierre Baudelaire a nagbiag idi maika-19 a siglo, “ket ti panangkombinsirna kadatayo nga isu awan.” Gapu iti daytoy, pinataud ti Diablo ti panagduadua maipapan iti kaadda ti Dios. No saan a pudno nga adda Diablo, saan kadi a ti Dios ti mapabasol iti amin a kinadakes? Dayta ti kayat ti Diablo a patien dagiti tattao!

Kas iti lider dagiti sindikato, ilimed ti Diablo ti kinasiasinona tapno matungpal ti dakes a panggepna. Kastoy ti kuna ti Biblia: “Ti dios daytoy a sistema ti bambanag binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.”​—2 Corinto 4:4.

Adda pay napateg a saludsod a kayattayo nga usigen. Anianto ti aramiden ti Dios iti daytoy nga utek ti amin a kinadakes ken panagsagaba? Mausig daytoy iti sumaganad nga artikulo.

[Footnote]

[Blurb iti panid 5]

Ti kadi Diablo ket adipen ti Dios wenno kabusorna?

[Kahon/Ladawan iti panid 6]

Posible Kadi a Mapukaw ti Kinaperpekto ti Perpekto a Parsua?

Adda limitasion ti kinaperpekto nga inted ti Dios kadagiti nasaririt a parsuana. Nupay perpekto ni Adan idi naparsua, nasken a bigbigenna ti limitasion nga inkeddeng ti Namarsua. Kas pagarigan, agsagaba la ketdi no mangan iti rugit, graba, wenno kayo. Nalabit matay wenno madangran no dina bigbigen ti linteg ti grabidad ket tumpuak iti nangato a rangkis.

Kasta met, sigurado a madangran ti asinoman a perpekto a parsua​—tao man wenno anghel​—no salungasingenna dagiti moral a pagalagadan nga impasdek ti Dios. Gapuna, no di umiso ti panangusar ti nasaririt a parsua iti wayawayana nga agpili, nalaka laeng nga agbiddut wenno agbasol.​—Genesis 1:29; Mateo 4:4.