Dusdusaennatayo Kadi ti Dios?
“Nalabit pannusa daytoy ti Dios, ngem maasianak kadagiti biktima ti didigra,” kinuna ti nalatak a politiko idiay Japan kalpasan a nadayyeg dayta a pagilian iti 9.0 a ginggined sa nagtsunami idi Marso 2011.
Idi natay ti nasurok a 220,000 a tattao gapu iti ginggined idiay Haiti idi Enero 2010, imbaga ti nalatak a ministro nga ebanghelista iti TV a gapu dayta iti “pannakitulagda iti diablo” isu a masapul nga “agsublida iti dios.”
“Kayat ngamin ti Dios a riingen ti nabibineg ken nagkalion a konsiensiatayo,” kinuna ti maysa a padi a Katoliko idi natay ti 79 a tattao iti stampede iti Manila, Pilipinas. Inreport ti pagiwarnak a “duapulo ket maysa a porsiento kadagiti adulto ti mamati a makaunget ti Dios isu [a masansan] nga agreggaay ti daga, agbagyo, ken mapasamak ti dadduma pay a didigra” iti pagilian.
NABAYAGEN a patien ti kaaduan a dusdusaen ti Dios dagiti dakes a tattao babaen iti didigra. Idi 1755, idi natay ti agarup 60,000 a tattao gapu iti ginggined, uram, ken tsunami idiay Lisbon, Portugal, insaludsod ti nalatak a pilosopo a ni Voltaire: “Dakdakes kadi ti Lisbon ngem ti Paris nga agpappapas iti ragsak?” Nabayagen nga iyim-imtuod ti adu a tattao no us-usaren ngata ti Dios dagiti natural a didigra tapno dusaenna dagiti tattao. Iti adu a pagilian, maibilang a nakem ti Dios dagita a didigra.
Gapuna, maisaludsodtayo: Talaga kadi a nagusar ti Dios iti natural a didigra tapno dusaenna dagiti tattao? Pannusa kadi ti Dios dagiti agsasaruno a didigra iti kaaldawantayo?
Adda dagiti agkuna a gapuanan ti Dios dagiti didigra ket pagrasonda dagiti salaysay ti Biblia nga inusar ti Dios dagiti puersa iti nakaparsuaan iti panangdadaelna iti dakes a tattao. (Genesis 7:17-22; 18:20; 19:24, 25; Numeros 16:31-35) Ngem no usigentayo dagitoy a salaysay, adda tallo a pakailasinan a dagiti didigra ket naggapu iti Dios. Umuna, adda naited a pakdaar. Maikadua, dagiti laeng nakadakdakes wenno di mangikankano iti pakdaar ti nadadael, saan a kas kadagiti natural a didigra ita a mangpapatay kadagiti naimbag ken dakes a tattao. Maikatlo, inispal ti Dios dagiti inosente a tattao.—Genesis 7:1, 23; 19:15-17; Numeros 16:23-27.
Awan ti pammaneknek a nakem ti Dios ti nakaad-adu a didigra a nakapukawan ti minilion a biag iti kaaldawantayo. Ania ngarud ti makagapu nga immadu dagitoy a didigra? Kasano a masaganaantayo dagita? Addanto kadi tiempo nga awanen ti didigra? Masungbatan dagitoy kadagiti sumaganad nga artikulo.