Panangtulong Kadagiti Agkasapulan

Rason nga agselebrar ti dadduma iti Krismas.

Gapu ta tinulongan ni Jesus dagiti tattao a napanglaw, masakit, ken marigrigat, kayat met ti dadduma a tuladen ti ulidanna. Para kadakuada, ti Krismas ti kasayaatan a tiempo a panangaramidda iti dayta, no kaano a masansan nga ikagumaan dagiti charity ti agkolekta iti donasion.

Apay a mapaay ti panggep?

No tiempo ti Krismas, okupado dagiti tattao nga ag-shopping, aglinglingay, ken mangbisita kadagiti gagayyem ken pamiliada. Gapu kadagitoy, maibusen ti tiempo, pigsa, wenno kuartada a tumulong kadagiti nakurapay ken agkasapulan, isu a mangtedda laengen iti donasion.

Ania dagiti makatulong a prinsipio ti Biblia?

“Saanmo a medmedan ti naimbag kadagidiay addaan karbengan iti dayta, no adda iti pannakabalin ta imam ti panangaramid iti dayta.” (Proverbio 3:27) Saan laeng nga iti panawen ti Krismas nga agsagaba dagiti napanglaw, mabisbisin ken marigrigat. No makitam nga adda agkasapulan iti tulong ket “adda iti pannakabalin ta imam” wenno kabaelam ti tumulong, apay nga urayem pay laeng ti Krismas? Mabendisionanto ti panangipakitam iti asi.

“Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag a kas iti irarang-ayna.” (1 Corinto 16:2) Dayta ti imbalakad ni apostol Pablo kadagiti nagkauna a Kristiano a mayat a tumulong kadagiti napanglaw. Mabalinmo kadi ti ‘mangilasin’ wenno mangbadyet iti kuarta nga itedmo a regular iti maysa a tao wenno organisasion a mangusar a nainsiriban iti dayta? Iti kasta a pamay-an, sigurado a maseknanka kadagiti agkasapulan ken mangmangtedka sigun iti kabaelam.

“Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” (Hebreo 13:16) Paliiwem ta malaksid iti “panangiranud iti bambanag iti sabsabali,” laglagipentayo met ti “panagaramid iti naimbag,” wenno panangtulong. Kas pagarigan, dagiti masirib a nagannak sanayenda dagiti annakda a tumulong kadagiti lallakay ken babbaket iti inaldaw nga aktibidadda; paregtaenda dagiti masakit babaen ti panangtedda iti kard, panangbisita, wenno panangtawag iti telepono; ken maseknan kadagiti nakakaasi nga ubbing wenno masaksakit. Iti kasta, masursuro dagiti ubbing ti agbalin a naasi ken naparabur iti intero a makatawen.