Ti Panangmatmat ti Biblia
Tulong a Kontribusion—Obligasion ti Kristiano?
AGARUP sangapulo a tawen itan, naipasdek ti PTL (Praise the Lord) Club idiay makin-abagatan a daya ti Estados Unidos, a nangur-or kadagiti donasion kas maysa a relihiuso nga organisasion ti kaasi. Babaen iti satellite-TV network ken koreo, nakaur-orda iti ginasut a milion a doliar, a nangpadakkel iti pundoda—a kunkunada a pangisaknap iti ebanghelio.
Panunotenyo man ti rikna ti rinibo a nangipatulod iti kuarta iti PTL Club idi nabasada ti damag a kas ti impablaak ti Associated Press a nagkuna a ni Jim Bakker, ti dati a presidente ti PTL, agraman ni baketna a ni Tammy, “ti naipadamag a nakaawat iti sueldo a $1.6 milion agraman bonus idi 1986.” Dakdakes pay, kinuna pay ti damag: “Naited latta dagidiay a sueldo nupay adda agarup $50 milion nga utang ti ministri . . . Agarup $265,000 a pundo ti PTL ti naited ken [Jessica] Hahn tapno agulimek laeng maipapan iti [seksual] a pannakainaigna ken Bakker.”
Sakbay a nasentensiaan ni Bakker tapno maibalud gaput’ panangsaurna kadagiti pasurotna, kinuna ti hues iti pannakabistana: “Masimronan dagiti adda relihionda iti panagbalinda a biktima dagiti mananggundaway a manangaskasaba ken papadi.”
Saan laeng a relihion ti naregget a mangal-allukoy kadagiti managkontribusion sada ibulsa ti kaaduan a kuarta. Kadawyanen dagiti managur-or nga alaenda ti 90 porsiento kadagiti donasion a maaw-awatda.
Pakasdaawan kadi ngarud, a maum-uman dagiti tao kadagita nga organisasion ti kaasi? Ngem aniat’ rumbeng nga aramiden dagiti Kristiano? Obligadoda kadi a tumulong kadagiti organisasion ti kaasi? Ania a pagalagadan ti ipaay ti Biblia tapno masigurado ti nainsiriban a panangusar kadagiti pundo no tumultulong iti dadduma? Aniat’ kasayaatan a pamay-an tapno tumulong iti sabsabali?
Panangted—Wen ken Saan
Tapno makasiguradotayo, ipatigmaan ti Biblia nga agbalintayo a naasi ken managparabur kadagidiay agkasapulan. Manipud pay idi ugma, naparegta ti ili ti Dios “a managparanudda koma, a nalakada a makipagrikna.” (1 Timoteo 6:18; Deuteronomio 15:7, 10, 11) Kinapudnona, nabagbagaan dagiti Kristiano idiay 1 Juan 3:17: “Ngem dayta agikut kadagiti sanikua daytoy a lubong, ket makitana ni kabsatna nga aglak-am iti pannakasapul, ket punitanna kenkuana ti pusona, kasano ti panagnaed ti ayat ti Dios kenkuana?”
Wen, mangtedkayo; ngem agannadkayo! Kanayon a pagkidkiddawandatayo dagiti organisasion ti kaasi, relihion, ken tinawen a kampania ti panagserbi iti komunidad; kaaduan ket manangipapilit ti panagdawatda. Ngem, iti panangtingiting kadagitoy, nasayaat a lagipen ti proverbio ti Biblia: “Ti nanengneng patienna amin a sao, ngem ti manakem a tao matmatanna a nalaing ti papananna.” (Proverbio 14:15) Iti sabali a pannao, agannad iti panamati iti aniaman a narabaw a kari wenno panangako dagiti organisasion ti kaasi. Kasano a talaga ti pannakausar ti maur-or a kuarta? Dagita kadi nga organisasion nga agpatpatulong ket rumbeng a tulongan dagiti Kristiano? Dagiti kadi aktibidadda ket napolitikaan, nasionalistiko, wenno nainaig iti ulbod a relihion? Ti kadi pakaisangratanna ket makagunggona ken di maikaniwas kadagiti Nainkasuratan a prinsipio?
Adu nga organisasion ti kaasi ti adut’ maitultulongda iti tattao nga agkasapulan. No naapektaranda kadagiti nakaparsuaan a didigra wenno sakit, kadawyan nga uray dagiti Kristiano ket makaawat met iti tulong dagita nga organisasion. Ngem dadduma nga organisasion ti kaasi dakkel unay ti isusueldoda kadagiti taoda wenno adu unay ti magastoda iti panangur-or, nga agbanag a bassit laengen ti nabati a kuarta a naur-or a maipaay iti naipakaammo a panggep. Kas pangarigan, ipakita ti nabiit pay a surbey ti 117 a kadakkelan nga organisasion a nonprofit idiay Estados Unidos, agraman dagiti organisasion ti kaasi, a nasurok a kakapat kadakuada ti mangsusueldo kadagiti nangatot’ saadda nga executive-da iti tinawen a sueldo a $200,000 wenno nasursurok pay. Masansan nga ipakita dagiti audit a dagiti magasto ket para kadagiti naluho nga aruaten ken ti nagastos nga estilo ti panagbiag. Aniaman ti nagan ti organisasion ti kaasi, nalawag a ti panangtulong kadagiti panggepda ket saan a panangtungpal iti bilin ti Biblia a tulongan dagiti agkasapulan.
Natimbeng a Panangmatmat
Nupay awan ti mayat a mangsayang iti kuartana—wenno nakarkaro pay, makita dayta a mangpabaknang iti naagum a tattao—masapul met ti panagannad maibusor iti panagbalin a managsuspetsa no maipapan iti panangted. Diyo ipambar ti kinadakes, wenno ti kinakusit ti dadduma nga “organisasion ti kaasi” tapno di tulongan dagiti agkasapulan wenno lapdan ti panangngaasi. Ibalakad ti Proverbio 3:27, 28: “Dika medmedan ti imbag kadagiti karbenganna, no adda ita imam ti pannakabalin a mangaramid. Dika kunaen iti kaarrubam: ‘Inkan, ket baliwam ti umay ket intono bigat ti panangtedko,’ no adda kenka ita iti biangmo.” (Idiligyo ti 1 Juan 3:18.) Diyo ipappapan nga amin nga organisasion ti kaasi ket nagastos wenno saur. Usigenyo dagiti kinapudno, sakayto ikeddeng no mangtedkayo wenno saan.
Kaykayat ti adu nga isuda a mismo ti mangted kadagiti sagut kadagiti agkasapulan ken iti pamiliada. Ngarud, masigurado dagiti mangiburay a nasayaat, dagus ti pannakaaramat dagiti intulongda. Daytoy met ti mangyeg gundaway tapno pabilgen ken iyebkas ti kinaasi agpadpada iti sao ken aramid. Nupay bassit laeng ti material a maipaayyo, maragsakankayto met laeng a mangted. No addanto madamagyo a pudno nga agkasapulan, mangtedkayo iti kabaelanyo buyogen ti kababagas ti 2 Corinto 8:12: “Ta no sisasagana ti pakinakem, ti sagut makaay-ayo no mayannugot iti kupikupan ti maysa a tao, a saan a kas ti awan kenkuana.”
Laglagipenyo met a no dadduma adda nasaysayaat a maited imbes a kuarta. Kinuna ni Jesus kadagiti pasurotna a “mapankayo, mangaskasabakayo a kunkunayo: ‘Ti pagarian ti langit dimtengen.’ . . . Ti inawatyo nga awan bayadna, itedyo nga awan bayadna.” (Mateo 10:7, 8) Umasping met laeng ita, mabigbig dagiti Kristiano a ti panawen, pigsa, ken kuarta a mabusbos iti panangsuporta iti panangasaba iti Pagarian—a mangpasayaat iti panagbiag ken mangiyeg namnama—ti kasayaatan a kita ti panangited iti kaasi.
Gapuna, ti panangmatmat ti Biblia isut’ panagbalin a naasi, managparabur, ken praktikal. Palagipannatayo a masansan a kasapulan ti material a tulong, ket masapul a maipangag dayta. Kabayatanna, dikay koma ipappapan a mapilitkayo a mangted iti siasinoman nga umay agkiddaw iti tulong. Usigenyo ti kasayaatan a panangusar iti kuartayo tapno maay-ayo ti Dios ken maipaay ti kasayaatan a praktikal a tulong iti pamiliayo a mismo ken iti padayo a tao. (1 Timoteo 5:8; Santiago 2:15, 16) Tuladenyo ni Jesus a nagbalin a nasiput ken manangtulong iti kasapulan ti dadduma—iti naespirituan ken namaterialan. Kunaen ti Hebreo 13:16: “Ngem dikay lipatan ti panagaramid iti naimbag ken iti panagririnnaman, ta ti Dios pagay-ayatanna unay dagiti kakastoy a daton.”