Ania ti Mapaspasamak iti Charity?
KALPASAN dagiti iraraut idi Setiembre 11, 2001, idiay New York City ken Washington, D.C., nakaad-adu ti tulong ti publiko kadagiti biktima ti trahedia. Dagiti charity (organisasion nga agur-or kadagiti tulong agpaay kadagiti agkasapulan) ket nakaawat iti dakkel a donasion a $2.7 a bilion a pangtulong kadagiti pamilia dagiti biktima. Gapu iti ladingitda iti kadakkel ti nadadael, dagiti tattao iti sadinoman tinarigagayanda ti tumulong.
Nupay kasta, dagus a naupay dagiti dadduma a tattao idi naammuan dagiti pammabalaw a sabali ti pakaus-usaran ti pondo dagiti mabigbigbig a charity. Nagadu ti nakapungtot gapu iti damag a maysa a dakkel a charity ti nangiplano a mangilasin iti nganngani kagudua ti $546 a milion a naur-or tapno usarenda kadagiti sabali a panggep. Nupay imbabawi ti organisasion ti panggepna ken nagpadispensar, kinuna ti maysa a reporter: “Sigun kadagiti kritiko, naladawen dayta a tignay tapno maisubli ti panagtalek” a tagtagiragsaken ti charity sakbay ti iraraut. Sika ngay? Nadadael kadi ti panagtalekmo kadagiti charity?
Makatulong Wenno Masayang Laeng?
Ti panagabuloy iti charity ket kaaduanna a maibilang a kinaimbag. Ngem saan a kasta ti panangmatmat ti amin. Nasurok a 200 a tawenen ti napalabas, insurat ti Ingles a mannalaysay a ni Samuel Johnson: “Ad-adda a makasiguradoka nga agar-aramidka iti naimbag no tangdanam dagiti trabahador gapu iti bannogda, ngem ti panangted iti kuarta iti charity.” Adda met ita dagiti tattao nga agkedked nga agabuloy iti charity, ken saan a mapabileg ti panagtalek ti publiko gapu kadagiti damag nga adda dagiti charity a saan nga umiso ti panangusarda kadagiti donasion. Utobenyo ti dua a nabiit pay a pasamak.
Maysa a direktor iti narelihiosuan a charity idiay San Francisco ti naikkat kalpasan a napabasol nga impabayadna iti ahensiana ti pinagparetokena ken ti $500 kada lawas a gastosna iti restawran iti uneg ti dua a tawen. Idiay Britania, naibabain dagiti nangorganisar iti maysa a dakkel a pabuya iti telebision mainaig iti charity idi naduktalan a manipud iti nganngani $10 milion, (U.S.) a naidonar tapno maibangon dagiti balay a pagtaraknan idiay Romania, 12 laeng a depektibo a balay ti naibangon, ken ginasut a ribu a doliar ti saan nga ammo no ania ti nakaaramatanna. Gapu kadagitoy a negatibo a report, nainkalintegan ita ti panagannad dagiti tattao no kasano kaadu ti idonarda ken no siasino ti pangtedanda.
Mangted Wenno Saan
Nupay kasta, saan a nainkalintegan a ti ar-aramid ti sumagmamano nga indibidual wenno organisasion ti manglapped iti pudno a pannakaseknan ken asitayo kadagiti sabsabali. Kuna ti Biblia: “Ti porma ti panagdaydayaw a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda.” (Santiago 1:27) Wen, ti panagtignay agpaay kadagiti napanglaw ken marigrigat ket napateg a paset ti Kristianidad.
Ngem mabalin nga iyimtuodyo, ‘Rumbeng kadi nga itultuloyko ti mangted iti charity, wenno tumulongak laengen babaen dagiti personal a sagut kadagiti indibidual?’ Ania a kita ti panangted ti namnamaen ti Dios? Ti sumaganad nga artikulo lawlawaganna dagitoy a saludsod.