SUNGBAT DAGITI SALUDSOD MAIPAPAN ITI BIBLIA
Adda kadi namnama dagiti natay?
Ti ipapatay ket kas iti pannaturog, ta awan puot ken awan maaramidan dagiti natay. Ngem ti Namarsua iti biag, mapagungarna dagiti natay. Kas pammaneknek, inikkanna ni Jesus iti pannakabalin a mangpagungar.—Basaem ti Eclesiastes 9:5; Juan 11:11, 43, 44.
Kasano a ti ipapatay ket kas iti pannaturog?
Inkari ti Dios a dagiti natay nga adda iti lagipna ket pagungarennanto iti nalinteg a baro a lubong. Dagidiay mapagungar ket agtalinaedda nga awan puotna agingga a pagungaren ida ti Dios. Il-iliwen ti Mannakabalin-amin a Dios nga usaren ti pannakabalinna a mangpagungar kadagiti natay.—Basaem ti Job 14:14, 15.
Anianto ti mapasamak iti panagungar?
Inton pagungaren ti Dios dagiti tattao, mabigbigdanto ti bagbagida, dagiti gagayyemda, ken dagiti pamiliada. Nupay nagrupsan ti bagi ti tao, kabaelan ti Dios a pagungaren dayta nga addaan iti baro a bagi.—Basaem ti 1 Corinto 15:35, 38.
Sumagmamano laeng nga indibidual ti mapagungar nga agbiag idiay langit. (Apocalipsis 20:6) Kaaduan a mapagungar ket agbiagto iti naisubli a paraiso a daga. Mangabaruananda ken addaanda iti namnama nga agbiag nga agnanayon.—Basaem ti Salmo 37:29; Aramid 24:15.