Apay nga Interesadotayo iti Pagarian ti Dios?

Minilion a tattao iti intero a lubong ti mangnamnama iti Pagarian ti Dios. Sursurotenda ti kararag nga insuro ni Jesus kadagiti pasurotna, ‘Umay koma ti pagariam. Maaramid koma ti pagayatam iti daga.’​—Mateo 6:10.

Nupay adu a tattao ti interesado iti Pagarian ti Dios, saan nga isursuro dayta ti kaaduan a relihion. Kuna ti historiador a ni H. G. Wells a nagpateg dayta ken Jesus ta, “kasta unay ti panangipaganetgetna . . . iti pannursuro nga inawaganna iti Pagarian ti Langit” ngem kinuna ni Wells a “saan a napateg daytoy a pannursuro . . . no idilig iti pannursuro ti kaaduan a relihion ti Kakristianuan.”

Ti Pagarian ti Dios ti kangrunaan nga isursuro dagiti Saksi ni Jehova, saan a kas iti dadduma a relihion. Panunotem: Ti kangrunaan a magasinmi a basbasaem ita ket maipabpablaak iti 220 a lengguahe. Tunggal ruar ket mayim-imprenta iti dandani 46 a milion a kopia. Gapuna, daytoy a magasin ti kasaknapan ti pannakaiwarasna iti intero a lubong. Ania ti kangrunaan a mensahe daytoy a magasin? Kitaem ti kompleto a paulona: Ti Pagwanawanan Mangibumbunannag iti Pagarian ni Jehova.a

Apay a kasta unay ti panangikagumaan dagiti Saksi ni Jehova a mangipakaammo iti Pagarian ti Dios? Patienmi ngamin a ti Pagarian ti Dios ti kangrunaan a mensahe ti Biblia, ti kapatgan a libro ditoy lubong. Kasta met, kombinsidokami a ti Pagarian ti Dios ti kakaisuna a solusion dagiti problema ti tao ita.

Ikagkagumaan dagiti Saksi ni Jehova a tuladen ti ulidan ni Jesus babaen ti panangipakaammoda iti Pagarian ti Dios. Idi adda ditoy daga, ti Pagarian ti Dios ti nakaipamaysaan ti biag ken ministeriona. (Lucas 4:43) Apay a nakapatpateg ken Jesus ti Pagarian? Ania ti maipaayna dayta kenka? Awisendaka a mangbasa kadagiti sumaruno nga artikulo tapno maammuam ti sungbat ti Biblia.