SUHETO ITI AKKUB | KASANOM A SANGUEN DAGITI PAKADANAGAM?
Adda Pakadanagan iti Sadinoman!
“Idi mapanak gumatang iti makan, cookies laengen ti nabati ket mamin-10,000 a nanginngina dayta ngem iti dati a presiona! Kabigatanna, awanen a pulos ti magatang a makan.”—Paul, Zimbabwe.
“Imbaga ni lakayko nga adda babaina ket panawannakamin. Kasanok ngata a maibturan ti panangtraidorna kaniak? Kasano ngaruden dagiti annakmi?”—Janet, United States.
“No aguni ti wangwang, mapanak aglemmeng sa agpaklebak iti datar bayat a bumtak dagiti missile. Uray mano nga orasen ti limmabas, agtigtigerger pay laeng dagiti imak.”—Alona, Israel.
Agbibiagtayo iti panawen nga adu ti pakadanagan, maysa a “napeggad a tiempo a narigat a pakilangenan.” (2 Timoteo 3:1) Adu ti madandanagan gapu iti rigat ti biag, pannakasinasina ti pamilia, gubat, kalamidad, ken panagwaras ti makapapatay a sakit. Ken adda pay dagiti personal a pakadanagantayo: ‘Kanser ngata ti bukol iti bagik?’ ‘Anianto ngatan ti situasion ti lubong inton dumakkel dagiti appokok?’
Saan a kanayon a dakes ti panagdanag. No mabutengtayo iti peggad, makatulong dayta tapno maliklikantayo ti madangran. Natural laeng met a medio ma-stress-tayo sakbay ti eksaminasion, interbiu iti trabaho, wenno maysa a presentasion. Ngem no sobra wenno kanayonen ti panagdanagtayo, pagdaksantayon dayta. Ipakita dagiti nabiit pay a panangadal iti nasurok a 68,000 nga adulto nga uray ti bassit ngem kanayon a panagdanag pangatuenna ti posibilidad ti nasapa nga ipapatay. Isu nga insaludsod idi ni Jesus: “Siasino kadakayo ti makapaatiddog iti biagna babaen iti panagdandanagna?” Wen, awan ti umatiddog ti biagna gapu iti panagdanag. Isu nga imbalakadna: ‘Dikayo agdandanag.’—Mateo 6:25, 27, Ti Baro a Naimbag a Damag Biblia.
Mabalin nga awan ti mapadpadasantayo ita a narigat a situasion, ngem baka maipasangotayto iti kasta. Tapno saannatayo nga abaken dagiti pakadanagan, makatulong ti praktikal a sirib, napaypayso a pammati iti Dios, ken nabileg a namnama iti masanguanan. Kitaentayo no kasano a nakatulong dagita kada Paul, Janet, ken Alona a nangsango kadagiti pakadanaganda.