Ammoyo Kadi?

Ania ti naidumduma iti panangtrato ni Jesus kadagiti adda leprosy-na?

Mabuteng idi dagiti Judio iti kita ti leprosy (kukutel) a gagangay idi panawen ti Biblia. No adda kasta a makaakar a sakit ti maysa a tao, maapektaran dagiti nerve endings-na ket madadael ken madisporma dagiti paset ti bagina. Awan pay idi ti agas ti leprosy. Isu a maisina ti pagyanan dagiti agkukutel ken obligadoda a mangipakaammo iti dadduma ti kondisionda.—Levitico 13:45, 46.

Nangaramid dagiti rabbi, wenno Judio a lider ti relihion, kadagiti paglintegan iti leprosy, a nalablabes ngem iti naibaga iti nasantuan a Sursurat, ket dayta ti ad-adda a nangparigat kadagiti adda leprosy-na. Kas pagarigan, saan a mabalin ti umasideg iti agkukutel iti as-asideg ngem iti 4 a kasiko (2 a metro). Ngem no napigsa ti angin, masapul nga umadayo dagiti tattao iti 100 a kasiko (45 a metro). Kuna met ti dadduma a Talmudist a ti kaipapanan ti linteg ti nasantuan a Sursurat maipapan iti panagyan dagiti adda leprosy-na iti “ruar ti pakarso” ket masapul nga iti ruar ti pader dagiti siudad ti pagyananda. Isu a no makakita idi ti maysa a rabbi iti agkukutel iti uneg ti siudad, batuenna sana ibaga: “Inka idiay paggigianam, dimo rugrugitan dagiti tattao.”

Naidumduma la unay ti panangtrato ni Jesus! Imbes a papanawenna dagiti adda leprosy-na, sinagidna ida—ken pinaimbagna pay ida.—Mateo 8:3.

Ania idi dagiti pangibatayan dagiti Judio a lider ti relihion iti panangipalubosda iti diborsio?

Idi panawen ni Jesus, pagdedebatean dagiti lider ti relihion ti maipapan iti diborsio. Isu a naminsan, sinubok ti dadduma a Fariseo ni Jesus. Insaludsodda: “Nainkalintegan aya a ti maysa a lalaki idiborsiona ti asawana iti tunggal kita ti pangibatayan?”—Mateo 19:3.

Ipalubos ti Linteg a naited idi ken Moises nga idiborsio ti lalaki ti asawana no “nakasarak iti maysa a banag a di natakneng iti biangna.” (Deuteronomio 24:1) Idi panawen ni Jesus, adda dua nga eskuelaan a pakaisursuruan dagiti kapanunotan dagiti Judio a lider ti relihion. Agkontra ti interpretasionda iti dayta a linteg. Sigun iti Shammai, ti mas istrikto nga eskuelaan, ti laeng maipalubos a rason para iti diborsio ket “kinarugit,” kayatna a sawen, pannakikamalala. Ngem kuna met ti eskuelaan a Hillel a mabalin a legal ti pannakidiborsio ti maysa a lalaki no adda dida pagkinnaawatan iti asawana, uray kasano kabassit. Isursurona pay a mabalin a makidiborsio ti lalaki no madi ti raman ti luto ni baketna wenno nakakita iti napimpintas ngem ni baketna.

Ania ti sungbat ni Jesus kadagiti Fariseo? Imbagana: “Siasinoman a mangidiborsio iti asawana a babai, malaksid no maibatay iti pannakiabig [wenno, seksual nga immoralidad], ket mangasawa iti sabali makaaramid iti pannakikamalala.”—Mateo 19:6, 9.