Maapektaran Kadi Dagiti Anghel ti Biagmo?

Iti maysa a malem ti Domingo, binisita da Kenneth ken Filomena, a taga-Curaçao, ti agassawa nga iyad-adalanda iti Biblia.

Kuna ni Kenneth: “Nakarikep ti balay idi napankami ken awan diay luganda. Ngem kasla adda nangibaga kaniak a tawagak ida.”

Sinungbatan ti asawa a babai ti tawag ni Kenneth sa imbagana a napan nagtrabaho ni lakayna. Idi naammuanna nga adda da Kenneth ken Filomena iti ruar, pinastrekna ida.

Dagus a nadlawda a nagsangsangit ti babai. Idi rugianen ni Kenneth ti panagadalda iti Biblia babaen iti kararag, nagsangit manen ti babai. Isu a naalumamay a dinamagda no ania ti problema.

Insungbatna a planona ti agpakamatay iti dayta a malem ken madama nga agar-aramid iti suicide letter para ken lakayna ngem insardengna idi timmawag ni Kenneth. Imbagana nga adda depression-na. Isu a nangibasada iti makaliwliwa a sasao iti Biblia. Nakatulong la ketdi dagita a sasao tapno masalbar ti biagna!

Kinuna ni Kenneth: “Nagyamankami ken Jehova ta inusarnakami a mangtulong iti daytoy maburburiboran a babai ken kangrunaanna ta tinignaynakami a tumawag, a nalabit babaen iti maysa nga anghel wenno ti nasantuan nga espiritu ti Dios!”a

Umiso kadi a patien da Kenneth ken Filomena a bimmallaet ti Dios, babaen man iti anghel wenno nasantuan nga espiritu—ti aktibo a puersa ti Dios? Wenno nairanrana laeng a timmawag ni Kenneth?

Ditay masigurado. Ngem ammotayo nga us-usaren ti Dios dagiti anghelna a tulongan dagiti tattao iti naespirituan. Kas pagarigan, kuna ti Biblia nga inusar ti Dios ti maysa nga anghel tapno bilinenna ti Kristiano nga ebanghelisador a ni Felipe a tulonganna ti Etiope nga opisial nga agbirbirok iti mangidalan kenkuana iti naespirituan.—Aramid 8:26-31.

Adu a relihion ti mangisursuro iti panamati kadagiti ekstraordinario nga espiritu a parsua, a dadduma kadagita ket naikuna a nasisingpet a parsua a mangitungtungpal iti pagayatan ti Dios wenno agserserbi kas anghel de la guardia. Adu ti mamati a saan laeng nga agpaypayso dagiti anghel no di ket tultulongandatayo pay. Nupay kasta, adu latta ti saan a mamati kadagiti anghel.

Agpaypayso kadi dagiti anghel? No wen, naggapuanda? Ania ti pudno maipapan kadakuada? Maapektaranda kadi ti biagmo? Kitaentayo dagiti ebidensia.