Makatulong Kadi Dagiti Prinsipio ti Biblia Ita?
SAAN TI KUNA TI DADDUMA. Kuna ti maysa a doktor a no usarem ti Biblia kas giya, kaslaka la agusar iti libro a naaramid idi 1920’s a mangisuro kadagiti estudiante ita ti chemistry. Mabalin nga isaludsod pay ketdi ti saan a mamati iti Biblia, ‘Usarem kadi ti manual ti daanen a kompiuter tapno masursurom nga usaren ti kabaruan a modelo ti kompiuter?’ Isu a para iti dadduma, nagpason ti Biblia.
Apay koma nga usarem ti nagkauna a libro a mangidalan kenka iti moderno a lubong? Adun dagiti website ken blog a kanayon a mangiruruar kadagiti kabaruan a balakad ken impormasion. Maipabpabuya iti TV dagiti balakad ti adu ti ammona a psychologist, eksperto iti panagbiag, ken autor. Sangabunton metten dagiti libro a naglaon kadagiti suhestion no kasano a solbaren dagiti problema ket binilion a doliar ti mabirokan dayta nga industria.
Gapu kadagita a kabaruan nga impormasion, apay nga agkonsultaka pay iti Biblia—a nakompleto agarup 2,000 a tawen ti napalabasen? Umiso ngata dagiti saan a mamati iti Biblia a ti panangusar iti dayta a nagdaanen a libro ket kas iti panangusar iti nagpason a libro ti chemistry wenno manual ti kompiuter? Kinapudnona, kamali dayta a panangipapan. Alisto nga agbaliw ti siensia ken teknolohia, ngem nagbaliw kadin ti kasapulan dagiti tattao? Agingga ita, kayat dagiti tattao ti maaddaan iti makapnek a biag, ragsak ken seguridad, nasayaat a relasion iti pamilia, ken pudno a gagayyem.
Nupay daanen ti Biblia, ipakitana no kasano a maipaayna dagita. Ibagana pay a naggapu iti Namarsua ti linaonna. Adda dagiti prinsipiona a mangidalan iti amin nga aspeto ti biag ken mangisagana kadatayo iti aniaman a problema. (2 Timoteo 3:16, 17) Saan la a dayta, ibagana pay a di agkupas dagiti balakad a linaonna—pammagbaga a pulos a saan a malaus! Kuna a mismo ti Biblia: “Ti sao ti Dios nabiag.”—Hebreo 4:12.
Agpayso kadi dagita nga ibagbaga ti Biblia? Nagpaso kadin dayta, wenno makatulong pay laeng, ken dayta ti kasayaatan a libro—maysa a sibibiag a libro? Nadisenio daytoy nga edision ti Pagwanawanan, ti umuna kadagiti agsasaruno nga espesial a ruar, tapno tumulong kenka a mangbirok iti sungbat kadagitoy a saludsod.