No Kasla Saanmon a Maibturan

Kas pagarigan, napukaw ti dandani amin a sanikua ni Sallya a taga-United States gapu iti bagyo. Kinunana: “Diak kayan no adda pay dumteng a problema. Adu nga aldaw a kayatkon ti sumuko.”

Wenno kasanon no natayanka iti ipatpateg iti biag? Kuna ni Janice a taga-Australia: “Idi natay ti dua nga annakko, napalalo ti ladingitko nga uray la impakpakaasik iti Dios: ‘Apo, saankon a kaya! Bay-annak lattan a matay. Diak kayaten ti agriing pay.’”

Napalaus met ti ladingit ni Daniel idi nakilalaki ni baketna. Inlawlawagna: “Idi impudno ni baketko nga adda lalakina, kasla nabagsol ti pusok. Panagriknak, maulit-ulit nga adda mangduyduyok iti bagik ket nagpaut dayta iti adu a bulan.”

Ilawlawag daytoy a ruar Ti Pagwanawanan no apay nga adda serserbi ti biag uray

• No dumteng ti didigra

• No matay ti ay-ayatem

• No liniputannaka ti asawam

• No adda nakaro a sakitmo

• No mariknam a dimon kayat ti agbiag

Ngem umuna, kasanotayo a makabangon no adda dumteng a didigra?