No Dumteng ti Didigra

“Idi damo, kasla awanen ti namnamami. Inyanud ti pitak ken layus ti amin a sanikuami.”—Andrew, Sierra Leone.

“Kalpasan ti bagyo, nagsublikami iti balaymi. Awanen ti nabati. Naklaatkami. Naglusdoy ti balasangko ken nagsangit.”—David, Virgin Islands.

NO NALASATAM ti maysa a didigra, mabalin a maawatam ti napadasan ti dadduma a nakalasat: pannakakellaat, di pannakaakseptar iti napasamak, pannakariribuk, danag, ken pannakabatibat. Adu a biktima ti desperado unayen ken nabambannogen nga uray la didan kayat ti agtultuloy nga agbiag.

No napukawmo ti amin gapu iti didigra, mabalin a mariknam met a kayatmon ti sumuko. Mabalin pay ketdi a mariknam nga awan serserbin ti biagmo. Ngem ilawlawag ti Biblia nga adda serserbi ti biagmo ken adda dagiti nasayaat a rason tapno manamnamam nga addanto nasaysayaat a masakbayam.

ADDA SERSERBI TI BIAGMO NO AMMUEM TI KINAPUDNO ITI BIBLIA

Kuna ti Eclesiastes 7:8: “Nasaysayaat ti ngudo ngem ti rugi ti maysa a banag.” No mangrugrugika pay laeng a bumangon manipud iti didigra, mabalin a kasla awanen namnama ti biagmo. Ngem bayat nga an-anusam nga urnosen ti biagmo, sumayaatto met laeng ti bambanag.

Impakpakauna ti Biblia nga addanto tiempo nga “awanton ti mangngeg . . . a panagsangit wenno panagasug gapu iti rigat.” (Isaias 65:19) Pumudno daytoy inton agbalin a paraiso ti daga nga iturayan ti Pagarian ti Dios. (Salmo 37:11, 29) Awanton dagiti didigra. Agnanayon a mapukawton ti aniaman a napait a kapadasan ken agsublisubli a nasaem a rikrikna, ta ikarkari ti Mannakabalin-amin a Dios: “Saanton a malagip dagiti immun-una a banag, ken saanton nga agtalinaed dagita iti puso.”—Isaias 65:17.

Panunotem laengen: Insaganaannaka ti Namarsua iti “nasayaat a masakbayan ken namnama”—natalna a biag babaen ti perpekto a turay ti Dios. (Jeremias 29:11) Talaga kadi nga adda serserbi ti biagmo no ammom daytoy a kinapudno? Kuna ni Sally a nadakamat iti rugi ti artikulo, “Tantandaanam dagiti nakaskasdaaw nga aramidento ti Pagarian ti Dios para kadatayo. Makatulong dayta tapno malipatam ti napalabas ken maibturam ti agdama a situasion.”

Ammuem ti ad-adu pay maipapan kadagiti aramidento ti Pagarian ti Dios iti sangatauan. No aramidem dayta, masiguradom nga uray maysaka a biktima ti didigra, adda latta serserbi ti biagmo ita bayat a segseggaam ti masanguanan nga awanton ti didigra. Kabayatanna, mangted ti Biblia kadagiti praktikal a balakad a makatulong tapno maibturam dagiti rigat nga inyeg ti didigra. Kitaem ti sumagmamano a pagarigan.

Dagiti Makatulong a Bersikulo ti Biblia

Aginanaka a naimbag.

“Nasaysayaat ti sangarakem nga inana ngem ti dua a rakem a napasnek a panagtrabaho ken panangkamat iti angin.”—Eclesiastes 4:6.

Kuna dagiti managsirarak (researcher) a kalpasan ti nakabutbuteng a pasamak, “mabalin a kumaro dagiti marikriknam a danag ken lalo a marigatanka a mangkontrol iti emosionmo . . . no kurang ti turogmo.” Nainsiriban ngarud nga aginanaka a naimbag.

Ibagam ti rikriknam.

“Madagsenan [wenno, “maladingitan,” footnote] ti puso ti tao gapu iti danag, ngem maragsakan dayta gapu iti naimbag a sao.”—Proverbio 12:25.

Makisaritaka iti maysa a kapamiliam wenno pagtaltalkam a gayyem. Malaksid a dumngeg kenka dagiti kapamiliam wenno nadekket a gagayyemmo, maparegta ken maikkandaka iti praktikal a tulong.a

Panunotem ti nasaysayaat a masanguanan.

“Adda baro a langit ken baro a daga nga ur-urayentayo kas inkarina [ti Dios], ket kadagitoy nga agtaeng ti kinalinteg.”—2 Pedro 3:13.

a Mabalin a kasapulan nga agpaagas ti maysa a nabayagen a mais-stress wenno nakaro ti panagdandanagna.