No Matay ti Ay-ayatem

“Awan man la ti naaramidak idi bigla a natay ni manongko. Kalpasan ti mano a bulan, bigla lattan a malagipko isuna ken mariknak ti saem, a kas man la mabagbagsolak. No maminsan, makaungetak pay ketdi. Apay a natay ni manongko? Makonkonsiensiaak ta bassit la a tiempo ti panagkaduami idi sibibiag pay.”—Vanessa, Australia.

NO MATAYANKA iti ay-ayaten, mabalin nga agkakanat met ti mariknam: saem, kinaliday, ken kinaawan gaway. Nalabit makaungetka pay ketdi, makonsiensia, mabuteng, ken mapampanunotmo, adda ngata pay serserbi ti biag?

Laglagipem a ti panagladingit ket saan a kinakapuy. Dayta ketdi ti pakakitaan nga ipatpategmo unay ti ay-ayatem. Ngem posible ngata a maep-ep ti napalalo a ladingitmo?

NO KASANO A NAKAILIWLIWAG TI DADDUMA

No kasla awan patinggana ti saem a marikriknam, mabalin a maliwliwaka kadagitoy a suhestion:

IWAYAAM TI AGLADINGIT

Saan nga agpapada ti pamay-an wenno kapaut ti panagladingit ti amin. Ngem makatulong ti panagsangit tapno mabang-aran ti riknam. Kuna ni Vanessa a nadakamat itay: “Isangitko lattan; masapul nga iruarko ti saem a marikriknak.” Kuna ni Sofía, a bigla a natayan iti ading a babai: “Nakasaksakit no panunotek ti napasamak. Kayarigan dayta ti panangdalus iti agnannana a sugat. Nakapampanaas ngem makatulong dayta tapno umimbag ti sugat.”

IBAGAM TI PAMPANUNOTEM KEN MARIKRIKNAM

Natural laeng a kayatmo ti agmaymaysa no maminsan. Ngem no bukbukodam ti agladingit, kaska la agaw-awit iti nagdagsen a banag a maymaysam. Malagip pay ti 17 ti tawenna a ni Jared a naulila iti ama: “Adda dagiti nangibagaak iti marikriknak. Mabalin a diak unay nailawlawag, ngem limmag-an ti riknak idi naibagak dayta.” Ni Janice a nadakamat iti umuna nga artikulo innayonna ti maysa pay a pagsayaatan dayta: “Talaga a naliwliwaak idi nakisaritaak iti dadduma. Nariknak a naawatandak ken diak agmaymaysa.”

AKSEPTAREM TI TULONG

Imbaga ti maysa a doktora a no akseptaren a dagus dagiti natayan ti tulong dagiti gagayyem ken kakabagianda kalpasan unay a natayanda, posible a nalaklakada a maibturan ti panagladingit ken mailiwliwagda dayta. Ibagam kadagiti gagayyemmo no ania ti maitulongda. Kayatdaka a tulongan ngem nalabit, saanda la ngamin nga ammo no kasano.—Proverbio 17:17.

AD-ADDA NGA UMASIDEGKA ITI DIOS

Kuna ni Tina: “Idi bigla a natay ni lakayko gapu iti kanser, awanen ti pangibagaak kadagiti problemak, isu a ti Dios ti pangibagbagaakon iti amin a marikriknak! Apagriingko, ikararagko a tulongannak tapno madaerak ti agmalem. Tinulongannak ti Dios iti ad-adu a pamay-an ngem iti kabaelak nga idetalye.” Kuna ni Tarsha nga agtawen iti 22 idi natay ni nanangna: “Ti inaldaw a panagbasak iti Biblia ti nangliwliwa kaniak isu a kanayon nga adda makaparegta a pampanunotek.”

ILADAWANMO ITI ISIPMO TI PANAGUNGAR

Intuloy ni Tina: “Idi damo, saan a makaliwliwa kaniak ti panagungar gapu ta kasapulak ni lakayko—ken kasapulan dagiti annakko ni tatangda. Ngem ita, kalpasan ti uppat a tawen, dayta a namnama ti pagkapkaptak. Nakapatpateg dayta tapno diak sumuko. Im-imadyinek a makitakto manen ni lakayko isu a kalmadoak ken naragsakak!”

Mabalin a saanmo a dagus a mailiwliwag ti ladingitmo. Ngem makapabang-ar ti kapadasan ni Vanessa. Kunana, “Panagkunam ket saanmo a kabaelan, ngem makitamto a sumayaat ti kasasaadmo.”

Laglagipem nga uray no mailiwka latta iti natay nga ay-ayatem, adda serserbi ti biag. Babaen ti naayat a tulong ti Dios, matagiragsakmo latta ti nasinged a panaggagayyem ken makapnek a biag. Ket din agbayag, pagungarenton ti Dios dagiti natay. Kayatna a maarakupmo manen ti ay-ayatem. Iti kasta, awanton ti mariknam nga ut-ot dita pusom iti agnanayon!

Dagiti Makatulong a Bersikulo ti Biblia

Tagipatgen ti Dios ti ladingit ken luluam.

Maysa a mannurat ti Biblia ti nangibaga iti Dios: “Urnongem koma dagiti luluak iti lalat a pagkargaam. Saan aya a naisurat dagita iti librom?”—Salmo 56:8.

Ibagam iti Dios ti amin a linaon ti pusom.

‘Ibagak iti Dios dagiti pakarigatak. O Jehova,a umawagak kenka tapno agpatulongak.’—Salmo 142:2, 5.

Maaddaanka iti namnama.

“Agungarto agpadpada dagiti nalinteg ken dagiti nakillo.”—Aramid 24:15.

Inkari ti Dios a pagbiagennanto manen ti di mabilang a tattao a natay, ket il-iliwenna nga aramiden dayta.b—Job 14:14, 15.

a Jehova ti nagan ti Dios sigun iti Biblia.

b Para iti ad-adu pay nga impormasion maipapan iti panagungar, kitaem ti leksion 30 ti libro nga Agbiagka a Naragsak iti Agnanayon! nga impablaak dagiti Saksi ni Jehova ken mai-download iti www.jw.org/ilo.