Ammoyo Kadi?

Kasano idi a makapagbiahe iti barko ti maysa a tao?

IDI panawen ni Pablo, kaaduanna nga awan ti barko a pangpasahero. Tapno makabirok ti maysa a tao iti paglugananna, agdamag kadagiti barko a pangkargamento no adda lumabas iti papananna ken mayat a mangilugan iti pasahero. (Ara. 21:2, 3) Uray no ti naglugananna ket saan a mapan iti eksakto a destinasionna, mabalin a mangbirok iti sabali a barko nga umakaranna nga agturong iti asideg ti destinasionna no sumanglad ti barko kadagiti nadumaduma a lugar.​—Ara. 27:1-6.

Kaaduanna nga adda laeng idi espesipiko a tiempo a panagdaliasat iti baybay ken awan ti sursurotenda nga eskediul ti panagbiahe. Malaksid iti di nasayaat a paniempo, dagiti marinero a mamati kadagiti dakes a pagilasinan itantanda ti aglayag no adda aguni a wak iti barkoda, no makakitada iti nadadael a barko iti igid ti baybay, ken dadduma pay. No nasayaat ti turong ti angin, gundawayan dagiti marinero ti aglayag. No makabiroken ti agdaldaliasat iti barko a mayat a mangilugan kenkuana, mapan iti sangladan nga awit-awitna ti bagahena sa urayenna a maipakaammo a pumanawen ti barko.

“Idiay Roma, adda kombiniente a serbisio tapno di mabannog nga agbirok dagiti tattao iti barko iti sangladan,” kuna ti historiador a ni Lionel Casson. “Adda ti sangladanna iti wangawangan ti Karayan Tiber. Iti asidegna nga ili ti Ostia, adda plasa a napalikmutan iti opisina. Adu kadagita ti kukua dagiti kompania ti pangkargamento a barko iti nagduduma a sangladan: adda maysa nga opisina ti Narbonne [France itan], kasta met ti Carthage [Tunisia itan], . . . ken dadduma pay. Asinoman nga agbirbirok iti paglugananna ket mapan kadagiti opisina tapno kitaenna dagiti siudad a lumabasan ti barko nga asideg iti rutana.”

Makainut idi ti panawen dagiti agdaliasat no agluganda iti barko, ngem adda dagiti peggad. Narba ti sumagmamano a barko a nagluganan ni Pablo bayat ti panagdaliasatna kas misionero.​—2 Cor. 11:25.