Panangtaripato iti Bin-i ti Pagarian
1 Ti maysa a mannalon isaganana iti daga ken mulaanna ti bin-i, ket anian a ragsak ti mariknana no makitana iti bin-i nga agrusing! Inyarig ni Jesus “iti sao ti Dios” iti bin-i a naimula. (Luc. 8:11) Gapuna, kayattayo ti naan-anay a makiraman iti panagmula ti bin-i iti Pagarian, a buyogen iti namnama a madanon dagiti tattao a dagiti pusoda ket umasping iti “nasayaat a daga” iti ilustrasion ni Jesus.—Mat. 13:19, 23; Luc. 8:15.
2 Naaddaankayo aya iti pribilehio a nangipaima kadagiti daan a libro idi napan a bulan, wenno naaddaankayo iti nasayaat a diskusion iti Kasuratan kadagiti tattao idiay teritoriayayo? Makaaramidkayo kadi iti ad-adu pay a mangkultibar iti interesda iti mensahe ti Pagarian? Ti panagsarungkar isut’ maysa nga epektibo a panangtaripato iti naipakitada nga interes. Dagitoy ti masansan a maaramid iti kalpasan ti maysa wenno dua nga aldaw manipud iti immuna a pannakasarak kadakuada.
3 Bayat ti Pebrero, adda pay gundawaytayo a mangipaima kadagiti daan a publikasion. Nalabit a ti linaon dagitoy isut’ kasapulan iti maysa a tao tapno mariing ti tarigagayna nga agprogreso iti espiritual. Kasta met a nakasaganakayo koma a mangiranud kadagiti puntos maipapan iti bendision ti Pagarian a maiyeg kadagidiay addaan iti manangawat a puspuso.
4 Ti panagserbi nga auxiliary payunir isut’ mangted iti dadduma pay nga oportunidad nga agsarungkar ken mangirugi kadagiti baro a panagadal. Kada tawen a nawadwad dagiti manggundaway iti serbisio a kas auxiliary payunir iti Marso ken Abril. Iti daytoy a tawen ti Marso ket addaan iti lima a Sabado ken ti Abril addaan iti lima a Domingo, maysa a bentahe dagidiay addaan iti amin a tiempo a panggedan.
5 Kadagiti dadduma a kongregasion, ti intero a bagi dagiti panglakayen, dagiti ministerial nga adipen, agraman assawada ket nangituyangda iti naimbag nga ehemplo iti panagserbi a kas auxiliary payunir. Idi napan nga Abril iti maysa a kongregasion ket naaddaanda iti 83 nga auxiliary payunir ken 12 a regular payunir. Anian a gubuayan daytoy iti pammaregta kadagiti amin a kongregasion!
DAGITI PANAGSARUNGKAR NGA AGBALIN A PANAGADAL
6 Tapno epektibotayo kadagiti panagsarungkar, kasapulan nga addaankayo iti notasion iti house-to-house record. Dagitoy ti tumulong kadakayo a mangeddeng iti suheto a mailawlawag no agsarungkarkayo. Palubosan dagiti dadduma nga agibumbunannag dagiti bumalay nga isuda ti kangrunaan nga agsao iti umuna a sarungkar tapno maammuanda no ania dagiti suheto a paginteresanda. No adda maibagana a biddut a kapanunotan, nainsiriban no liklikan a dillawen iti dayta a komentona idiay rugina, ngem imbes a kasta, maigunamgunam dagiti karkari ti Pagarian.
7 Ti panagadal ti Biblia a trabaho isut’ kangrunaan a pamay-an a tumulong kadagiti tattao a mangadal iti pangpanggep ti Dios. Mangusarkayo iti maysa a punto kadagiti publikasion a paginteresan daydiay tao. Mangtedkayo ti saludsod, kalpasanna maipakita kenkuana no kasano a ti literatura ket ipaayna ti sungbat manipud iti Biblia. Mabalinyo nga aramaten ti libro a naipaima iti bumalay wenno ti sabali nga addan kenkuana.
8 No kasano a nakaay-ayat ti agmula iti literal a bin-i ken buyaen iti panagtuboda bayat a taripatuen ida, lalo pay a dakdakkel ti pannakapnektayo no makita “iti sao ti pagarian” nga agramut ken agtubo iti puspuso dagidiay nga adalantayo.