Itultuloy a Kunaen, “Umayka!” Kadagidiay a Dumngeg
1 Impaganetget ni Jesus ti panagkasapulan dagiti tattao a dumngeg nga atentibo iti mensahe ti kinapudno. (Mat. 11:15; 13:9, 43) Ammona a nasken kadakuada a maalada iti sentido ti pannursurona, agsipud ta imulmulana ti pannakaammo a mangiturong kadakuada iti agnanayon a biag.—Juan 17:3.
2 Ti kasta a makaited ti biag a pannakaammo isut’ maysa a napateg a paset iti “danum ti biag” a madama ita a maipapaay kadagidiay a mawaw. (Apoc. 22:17) Amin dagidiay a mawaw iti kinalinteg ti agkasapulan a maparegta a manggundaway iti nabuslon nga awan bayadna a sagot ni Jehova. (Isa. 55:1) Maibilangkayo aya kadagiti minilion ita nga agkunkuna, “Umayka!” kadagidiay a dumngeg?
NO KASANOYO A KUNAEN, “UMAYKA!”
3 Ti Mayo isut’ maikadua a bulan iti kampaniatayo a suskripsion iti Pagwanawanan. Adda pay kadi nasaysayaat ngem iti dayta nga instrumento a pangawis ti asikaso a maipaay iti nakaskasdaaw a parabor ni Jehova a biag? Daytoy Ti Pagwanawanan isut’ makatulong iti adu a tattao a makagun-od iti wayawaya manipud iti relihioso nga anito ken kinaulbod. Ania dagiti oportunidad a nasarakanyo a pakaitukonan iti suskripsion ti Pagwanawanan?
4 Ti maysa a wagas a panangitukon iti suskripsion isut’ babaen ti panagbalaybalay. Ngem addada pay dagiti dadduma a wagas, a kas kadagiti panagsarungkar wenno panangitulod kadagiti agdama a ruar kadagiti rotayo ti magasina. Dadduma kadagiti agibumbunannag ti naballigi a gimmun-od ti suskripsion kadagiti interesado a tattao a nasabetda iti panagtrabaho kadagiti lansangan. Mabalin a paregtaen dagiti dadduma a suskritor a mangipatulodda iti sagot a suskripsion kadagiti gagayyem ken kabagianda. Mabalinyo met ti mangipatulod iti sumagmamano a regalo a suskripsion. Mabalin pay a maitukon iti suskripsion kadagiti kanegosio, katrabaho, wenno kaeskuela. Panunotenyo pay dagiti dadduma a posibilidad.
ITULTULOYYO A KUNAEN, “UMAYKA!”
5 Itultuloyyo nga ipakita ti interes a tumulong kadagidiay a nagsuskribe iti Abril. Siguruenyo ti agsarungkar iti mabiit. Nalabit a mairugiyo dagiti panagadal iti Biblia kadakuada ken isingasingyo ti itatabunoda iti gimong a kaduayo. Babaen ti panangipakita iti sinsero nga interes kadakuada, mabalin a sipapabor a mangipangagda ken matignayda nga agprogreso iti naespirituan.
6 Ti imbitasion nga, “Umayka!” isut’ maidandanon ita kadagiti amin a nasnasion. Babaen iti Anakna a Jesus, sigragrasia nga ipapaay ni Jehova iti sagot a biag kadagiti amin a mangipangag iti awis nga, “Umayka!” ken “awatem ti danum iti biag nga awan bayadna.” Adda aya naan-anay a pannakiramanyo a mangidanon iti imbitasion kadagiti sabsabali kabayatan ti Mayo?