Agplanokayo a Nasakbay a Maipaay iti Setiembre
1 Kas panangpadaan iti panangrugi ti baro a tawen iti serbisio inton Setiembre, nasayaat kadatayo amin ti panangusig no ania dagiti nagapuanan iti napalabas a tawen ken no ania dagiti tarigagayan a maibanag iti masanguanan a tawen. Kas nakuna ni apostol Pablo: “Iti uray aniaman a nakagtengantayo a progreso, itultuloytayo ti magna a siuurnos iti isu met laeng a desdes.”—Fil. 3:16.
2 Adu dagiti agtutubo ti makaaramid a kalat a mangsaksi iti ad-adu a kaeskuelada ken ikagumaanda nga ipasdek iti panagadal ti Biblia. Dakayo met a nagannak a dagiti annakyo ket addada iti pagadalan ti makasarak a daytoy Setiembre isut’ nasayaat a bulan a panagserbi kas auxiliary payunir. Laglagipenyo a ti Setiembre iti daytoy a tawen ket addaan iti lima a Sabado ken lima a Domingo, gapuna nga adu ti makabael nga agpayunir iti daytoy a bulan.
3 Adu dagiti nagballigi a nagserbi kas auxiliary payunir iti kallabes a bulbulan ti agngayangay a mangusig iti panagaplikar a regular payunir a mangrugi ti Setiembre 1 no palubosan iti kasasaadda. Anian a nagsayaat a pamay-an a mangirugi iti baro a tawen ti serbisio!
4 Kadagidiay nga ageskuela a madama iti pagadalan, mabalinyo kadi nga iyiskediol ti tiempo a maipaay iti teokratko a panagadal a kas trabaho iti pagtaengan? Tumulong daytoy kadakayo nga agkualipikado iti amin a tiempo a serbisio a kas karera ken tumulong kadakayo nga agtalinaed iti dana ti biag. (Isa. 30:21) Dagiti napateg a tiempo ti mabalin a madadael babaen iti panagbuya ti telebision. Apay a dikay usaren dayta a tiempo a maipaay iti teokratiko a trabaho?—1 Tim. 4:15.
5 Dikay palubosan iti tiempo nga aglabas kadakayo a kas ulep iti tangatang, ngem iplanoyo ti tiempo ket ituyangyo dagiti kalat tapno mausaryo ti tiempo iti wagas a makaiyeg iti dayaw ni Jehova.—Ecl. 11:4.