Itukon Dagiti Magasina iti Kada Oportunidad
1 Iti nasuroken a 100 a tawtawen, Ti Pagwanawanan isut’ nangitandudo iti kinapudno ti Pagarian. Inusarna iti Sao ti Dios a kas kampilan a nangduyok kadagiti relihioso a biddut ken imbutaktakna dagiti palso a sursuro. Ti Agriingkayo! a magasina insikkirna met iti kinapudno. Kadagiti nalinteg ti panagpampanunotda a tattao, mabalin a mariing ti interesda iti Nainkasuratan a material a masarakan kadagiti dadduma a publikasion ti Sosiedad. Ania ti maaramidtayo tapno maipaima dagitoy a magasina iti ad-adu pay nga ima dagiti tattao?
2 Ti umuna nga addang isu ti panangammo iti linaon dagitoy a magasina. Kaipapanan daytoy ti panangbasa kadakuada apaman a maawatda ken isarita dagiti artikulo iti sabsabali idiay kongregasion. Tumulong daytoy kadatayo nga agpositibo ken narayray a mangitukon kadakuada iti sabsabali.
3 Ti sumaruno nga addang isut’ panangitiempo iti kada lawas a mangitukon kadagitoy a magasina iti dadduma. Aramidenyo daytoy a paset iti regular nga iskediolyo. Naridamkayo aya kadagiti oportunidad a maipaima dagiti magasina?
MAKISAOKAYO KADAGITI TATTAO
4 No addakayo idiay tay-ak, asitganyo dagiti tattao bayat a magmagnada iti kalsada. Kasaritayo dagidiay nakatugaw idiay luganda, dagidiay agtartrabaho iti arubayanda, wenno agur-uray iti paglugananda. Itudoyo kadakuada dagiti masinnunuo nga artikulo ken iti punto a paginteresan. Usarenyo dagiti ilustrasion a pangriing ti interesda. Makisaokayo kadagiti tattao a naingayyeman, iti positibo a wagas, ken ipresentayo dagiti depinido a puntos a natakuatanyo manipud panagbasayo a mismo iti magasina.
DAGITI DADDUMA NGA OPORTUNIDAD
5 Ipadasyo met dagitoy a singasing idiay teritoria iti negosio. Ranaenyo dagiti oportunidad bayat a dagiti negosiante ket saanda unay a kupado kadagiti parokiano. Nasarakan dagiti adu nga agibumbunannag a nalaklaka ti agipaima iti magasina idiay teritoria ti negosio ngem iti gagangay a panagbalaybalay a trabaho.
6 Pinadasyo kadin ti namataud iti rota ti magasina? No agipaimakayo iti magasina, ipasigudyo kadagiti tattao a ragsakenyo ti agsubli iti las-ud ti dua a lawas a maipaay iti sumaruno a ruar. Adu dagiti maipaima babaen daytoy urnos iti mismo a panangitulod kadakuada.
7 Nalabit a maisapulyo pay iti dadduma nga oportunidad, kas iti panangasaba no rumabii, pannakisarita kadagiti kabagian, wenno no agbiahe ken aggatangkayo. Babaen ti panangsurot kadagitoy a singasing, mabalintayo pay a matulongan dagiti adu a tattao nga agbalin a regular a managbasa iti publikasiontayo ti Biblia.