Ti Pasetyo a Mangaramid Kadagiti Gimong a Makagunggona
1 Adda tallo a tulbek a mangaramid a makagunggona dagiti gimong—panagsagana, pannakipaset, ken aplikasion. Ti naimbag a panagsagana aramidenna a nalaka ti makipaset ken makaay-ayo. Dagiti narayray nga ebkas iti pammati isudat’ mamaggunay kadagiti dumdumngeg. (Efe. 4:29) Masansan a dagiti timmabuno ket usarenda no ania dagidiay a maipresenta no matulonganda a mangipateg no kasano a ti impormasion ket maiyaplikarda iti mismo a bibiagda ken tumulong met iti dadduma nga agbalin a disipulo.
PANAGADAL TI PAGWANAWANAN KEN PANAGADAL TI LIBRO ITI KONGREGASION
2 Nasken unay dagitoy a gimong agsipud ta babaen kadakuada “ti matalek ken naannad nga adipen” ket mataraonanda iti sangakabalayan ti pammati. (Mat. 24:45-47) Nakaitudingkayo aya iti tiempo a mangadal iti material nga isut’ mausig? Nakasaganakayo kadi nga agkomento kadagiti gimong?
3 No naannad ti panangadalyo iti material, nakasaganakayo a makiraman iti dakdakkel a ragsak ti pannangted. (Ara. 20:35) Adu dagiti nakasarak a makatulong ti pananguged kadagiti panulbek a sasao. Babaen ti panangsukimat kadagiti saan a nakotar a kasuratan ken tingitingen dagitoy no kasano a maiyaplikar, magun-odyo iti pannakaawat kadagiti Nainkasuratan a basaran dagiti sungbat. Makasungbatkayo kadin babaen iti bukodyo a sasao, wenno basbasaenyo pay laeng dagiti sungbat? Ti sipapanggep iti teokratiko a panagadal isut’ mangaramid a matagikuayo dagiti impormasion ket makapagtignaykayo a maitunos kadakuada a buyogen iti napusuan a panangipateg.—Prov. 2:5; 4:7, 8.
TEOKRATIKO A PAGADALAN ITI MINISTERIO KEN GIMONG TI SERBISIO
4 Matmatanyo kadi dagiti palawagyo kas estudiante a kas naituding manipud ken Jehova ken iyanninag daytoy no kasano ti panagsaganayo? Ngem uray pay awan iti masinnunuo a naituding kadakayo, agadalkayo koma babaen iti panagbasa iti naiyiskediol a babasaen a kapitulo iti Biblia ken dagiti dadduma a material iti kada lawas. Kasta met laeng ti maaramid iti Gimong ti Serbisio. No maaramid daytoy iti nasakbay a tiempo, kabayatan ti gimong mabalinyo a panunoten a siaaktibo no ania iti maiparang, imbes a makigubalkayo pay laeng a mangammo iti material iti umuna a daras.
5 Dagiti parang iti demostrasion ken palawag ti masapul koma a dagitay agpaypayso, nga iladawanda dagiti lokal a situasion. Sanayenyo a naimbag dagiti pasetyo. Kasta met nga agkaweskayo iti maiparbeng a kas naimbag nga ehemplo dagiti dadduma.
6 Nagannak, tulonganyo dagiti annakyo nga agsagana ken sumungbat iti bukodda a sasao no magundawayan dayta. Ngarud, no amin ket ikagumaanda a maseknan iti sumangpet a nasapa ken nakasagana a makipaset, pudno a dagiti gimongtayo ket matengngelda iti asikaso dagiti tumabuno. Aramidenyo kadi ti pasetyo iti daytoy a banag tapno “amin a bambanag ket maaramidda a makapabileg” iti dadduma a nakitaripnong kadakayo?—1 Cor. 14:26.