No Kasano ti Agsagana Maipaay iti Gimong ti Serbisio
1. Ania ti nakairantaan ti Gimong ti Serbisio, ken kasanotayo a magunggonaan a naan-anay iti dayta?
1 Nairanta ti Gimong ti Serbisio a tumulong kadatayo nga agbalin a nabunga iti ministerio. Kangrunaan a mausig ti maipapan iti panangikasaba iti naimbag a damag ti Pagarian, panagaramid iti adalan, ken panangiwaragawag iti um-umayen a panangukom ti Dios. (Mat. 28:19, 20; Mar. 13:10; 2 Ped. 3:7) Magunggunaantayo a naan-anay iti daytoy nagpateg a gimong no nakasagana ken sidadaantayo a makipaset.
2. Ania ti aramidentayo tapno nakasaganatayo nga agimdeng iti palawag?
2 Palawag: Dagiti reperensia iti palawag ket kaaduanna nga agparang iti instruksion para iti agpalawag. Mabalinyo a repasuen dagita a reperensia agraman dagiti naisitar a teksto, ken panunotenyo no kasano a mayaplikar ti impormasion iti ministerioyo.
3. Ania ti mabalintay nga aramiden tapno nakasaganatayo iti saludsod-ken-sungbat a panangusig?
3 Saludsod-ken-Sungbat a Panangusig: Maikondukta daytoy a paset a kas iti Panagadal iti Pagwanawanan, nga ababa laeng ti introduksion ken konklusionna. Ugedanyo dagiti kangrunaan a punto iti kada parapo, ken agsaganakayo a mangipaay kadagiti ababa ngem nabagas a komento.
4. Kasanotayo a masaganaan ti paset a pagsasaritaan ti tallaong?
4 Pagsasaritaan ti Tallaong: Maiparang daytoy a paset kas palawag, ngem ti agpalawag mabalinna a pagkomentuen ti dadduma iti tallaong. No ugedanyo dagiti kangrunaan a punto ken basaenyo dagiti naisitar a teksto, masungbatanyonto dagiti mayimtuod a saludsod. Ti kabsat a mangiparang iti daytoy a paset ikagumaanna a pagkomentuen dagiti agdengngeg no saklawenna dagiti kangrunaan a punto.
5. Ania ti makatulong tapno magunggonaantayo a naan-anay kadagiti demostrasion?
5 Demostrasion: Dagiti dadduma a paset ket addaan kadagiti demostrasion a mangipakita no kasano nga usaren dagiti nausig nga impormasion iti teritoriatayo. Dagiti panglakayen, aduan kapadasan nga agibumbunannag, wenno payunir ti mapusgan a mangiparang iti daytoy. No isaganayo daytoy a paset, panunotenyo no kasano ti mabalin a pannakaiparangna. No maidemostra ti pagtuladan a presentasion iti Ti Ministeriotayo iti Pagarian, panunotenyo no kasano ti panangisaoyo a mismo iti dayta ken no kasanoyo nga ibagay iti nagduduma a bumalay. Siguraduenyo nga itugot ti publikasion wenno magasin a mausar iti demostrasion. Iti Sangapamiliaan a Panagdaydayawyo iti rabii, nasayaat no ensayuenyo ti dadduma kadagitoy a presentasion.
6. Ania dagiti rason nga agsaganatayo maipaay iti Gimong ti Serbisio?
6 Ad-adda a matagiragsaktayo ti Gimong ti Serbisio no nakasagana ken seggaantayo dagiti nagsasayaat a paset a maiparang. Ad-adu a pammaregta ti mairanudtayo no aramidentayo dayta. (Roma 1:11, 12) No iwayaantayo ti agsagana maipaay iti Gimong ti Serbisio, makatulong dayta tapno maitungpaltayo ti annongentayo.—2 Tim. 3:17.