Instruksion Kadagiti Agpaset iti Gimong ti Serbisio
Mangrugi iti daytoy a ruar Ti Ministeriotayo iti Pagarian, nabaliwanen ti dadduma a sasao kadagiti instruksion iti eskediul ti Gimong ti Serbisio tapno nalaklaka a maawatan. Dagiti sumaganad nga instruksion ken pammalagip ket panangpabaro ken pananglawlawag iti linaon ti artikulo a “No Kasano ti Agsagana Maipaay iti Gimong ti Serbisio,” iti Mayo 2009 a ruar Ti Ministeriotayo iti Pagarian.
◼ Palawag: Maysa daytoy a palawag a naibatay iti naited a reperensia ken saan a makipartisipar ti tallaong. Masapul nga ipamaysa ti ispiker no ania ti nangnangruna a makatulong iti kongregasion.
◼ Saludsod ken Sungbat: Kas iti Panagadal iti Pagwanawanan, ababa laeng ti introduksion ken konklusion daytoy a paset, ken usarenyo dagiti saludsod para iti tunggal parapo. Saan koma a komento a komento ti konduktor. Mabalin a basaen dagiti napapateg a teksto no ipalubos ti oras. Saan a maibasa dagiti parapo malaksid no adda instruksion a maibasa dagita.
◼ Palawag nga Adda Pannakipartisipar ti Tallaong: Maysa daytoy a palawag nga adda bassit pannakipartisipar ti tallaong. Saan laeng a palawag daytoy ken saan met a puro saludsod ken sungbat.
◼ Demostrasion ken Interbiu: Ti kabsat a makimpaset iti daytoy ket mangdutok kadagiti kakabsat a mangiparang iti demostrasion; saan ket nga isu ti agdemostra. Rumbeng a kualipikado ken mapagwadan dagiti dutokanna, ken no posible, pakaammuanna ida a nasaksakbay. Nasaysayaat no saan a dagiti kabbaro wenno bassit pay ti kapadasanna nga agibumbunannag ti dutokanna a mangidemostra no kasano a maar-aramid ti ministeriotayo tapno laeng mapadasanda ti agpaset, nupay mabalin nga agakem kas bumalay ti dadduma kadakuada. Masapul a sumango iti tallaong dagiti agibumbunannag nga agdemostra. Dagidiay mainterbiu ket masapul a mapan iti entablado imbes nga agyanda laeng iti tugawda. Rumbeng a maensayo dagiti demostrasion ken interbiu. No lumbesen iti oras ti gimong ket masapul a paababaen ti kabsat ti pasetna, saanna nga ikkaten dagiti demostrasion wenno interbiu. Dagiti ministerial nga adipen ket masapul a makiuman iti bagi dagiti panglakayen wenno iti sabali pay a panglakayen sakbay nga agpili kadagiti dutokanna nga agpaset.
No ti maysa a paset ket addaan kadagiti espesial nga instruksion, masapul a masurot a naimbag dagitoy. No maiparang dagiti paset ti Gimong ti Serbisio sigun kadagiti naibalabala iti ngato, makatulong dagiti kakabsat tapno ti Gimong ti Serbisio ket ‘maaramid a sitatakneng ken sigun iti urnos.’—1 Cor. 14:40.