Ti Gimong ti Serbisio Kabalannatayo iti Kada Naimbag a Trabaho
1 Ti panggep iti Gimong ti Serbisio isut’ panangkabalna kadatayo a makiraman a naan-anay iti tay-ak ti ministerio. (2 Tim. 3:17) Nupay kasta, no saantayo nga agsagana a maipaay iti gimong wenno iyaplikar dagiti maadal, bassit laeng ti magunggona.
2 Ti nasakbay a panagsagana ti tumulong kadakayo a mangagsep a mas naan-anay iti instruksion. Repasuenyo dagiti publikasion a mausar, ken itugotyo ida tapno masurot ken makiramankayo iti ispiker.
3 Ti mangidaulo a manangaywan repasuenna a siaannad dagiti naiyiskediol a paset ti gimong. Dagiti makabael, kualipikado a panglakayen ken ministerial nga adipen ti matudingan nga mangisagana kadakuada. (om p. 70) Dagiti kongregasion a sumagmamano laeng ti panglakayen ken ministerial nga adipen mabalinda a dutokan dagiti dadduma a makabael a kakabsat a bumadang kadakuada. Tunggal ispiker masapul nga agsagana a naan-anay, nga annuroten dagiti naipaay a pagalagadan, ken siguruenda a saanda a lumbes iti oras.
4 Ti kabsat a nadutokan iti anunsio masapul a kasaona ti mangidaulo a manangaywan a nasakbay tapno ammuenna dagiti bambanag a kasapulan a madakamat. Mairaman kadagitoy dagiti surat manipud ti Sosiedad wenno palagip maipapan iti urnos ti serbisio wenno dagiti report. Mabalin nga adda nadamag a masakit a kasapulan a masarungkaran wenno plano dagiti aktibidad ti kongregasion iti masanguanan. Timuden a naimbag dagitoy tapno sidadaankayo a makiraman.
5 No ti maysa a paset kasapulanna ti pannakiraman dagiti timmabuno, agsaganakayo babaen ti panangbasayo iti material ken sukimatenyo dagiti kasuratan. Panunotenyo no kasano a maiplano nga iyaplikar dagiti singasing ken no ania ti maikomentoyo. Nalabit a maipakitayo iti praktikal a pateg ti instruksion babaen ti panangistoria iti ababa a kapadasan.
6 No adda demostrasion, padasenyo a panunoten no ania ti sawen iti dayta a situasion. Siputanyo dagiti nausar nga argumento. Padasenyo a lagipen no ania ti nakuna idi napalabas maipapan dayta a tipo ti kasasaad, ket usigen no kasano a dagiti punto a maidemostra ket tumulong kadakayo a gumun-od ti nasaysayaat a resulta iti masakbayan.
7 Dagiti makipaset ti demostrasion ken interbio masapul nga aginsayoda a nasakbay. Masapul a tunggal maysa ammona no ania ti sawen ken aramidenna idiay plataporma. Dadduma kadagiti adda pasetna ti aginsayo iti pasetda kalpasan ti Panagadal iti Pagwanawanan ti Domingo tapno masanayda idiay plataporma ken makita no mano a mikropono ken tugaw ti kasapulan.
8 Kayattayo ti agbalin a “naisagana a maipaay iti tunggal naimbag nga aramid.” (2 Tim. 2:21) Ti Gimong ti Serbisio tumulong kadatayo a mangaramid iti dayta. Ti itatabuno ken panangalagad no ania ti maadal isut’ tumulong kadatayo a ‘naan-anay a maitungpaltayo ti ministerio.’—2 Tim. 4:5.