No Apay a Kayatenyo ti Mangikondukta iti Panagadal ti Biblia
1 Maysa kadagiti pakagunggonaan unay a kapadasan iti biang ti maysa a Kristiano isu daydiay pannakatulongna iti maysa a tao nga agbalin a disipulo ni Kristo. (Mat. 28:19, 20; 1 Cor. 3:6, 9) Kadagidiay a matulongan, kaipapananna kadakuada iti biag nga agnanayon.
2 Maysa a nasinged a relasion ti tumanor iti nagbaetan ti mannursuro ken daydiay sursuruan. Ti panagdakkel iti espiritual daydiay estudiante isut’ taudan iti dakkel a rag-o. (1 Tes. 2:11, 19, 20) Gapuna, masapul a kalat iti kada Kristiano ti mangikondukta iti uray no maysa laeng a panagadal ti Biblia iti pagtaengan iti ruar ti bukodna a sangakabalayan. Siempre, responsabilidad iti kada ulo ti pamilia ti mangikondukta iti regular a panagadal ti Biblia iti bukodna a pamilia. No ti ama ket saan a manamati, ti ina isu ti mangadal iti Biblia kadagiti annakna.
IKARARAGYO DAGITI PANAGADAL
3 Ti regular a panangikararag ken Jehova a maaddaankayo iti panagadal ti Biblia isut’ mangidemostra iti sinsero a tarigagayyo a mangikondukta iti maysa. Ipakita daytoy a makitatayo iti biag-ken-patay nga isyu a nasaklaw. (Ezek. 33:7-9, 14-16) Mabalin a maipanamnama kadatayo iti bendision ni Jehova iti napudno a pingettayo.—1 Juan 5:14, 15.
4 Tapno epektibotayo iti panagaramid ti disipulo, masapul nga agsaganatayo a naimbag. Kadagiti umay a bulbulan, ipasami kadakayo dagiti singasing manipud kadagiti managdaliasat a manangaywan ken dagiti sabsabali a nagballigi iti daytoy. Maysa a serye dagiti artikulo ti mangted kadagiti praktikal nga ideya no kasano a mairugi ken maikondukta dagiti nabunga a panagadal ti Biblia.
MASANGUANAN NGA ARTIKULO
5 Ania dagiti sumagmamano nga ideya a mabalin a mausig kadagiti masanguanan a ruar iti Ti Ministeriotayo iti Pagarian? Ilawlawagmi no kasano a dagiti nagduduma ket nairugida iti panagadal ti Biblia ken no aniada dagiti metodo nga inusarda a nangdanon iti puspuso dagiti estudianteda. Iranudmi met kadakayo dagiti singasing maipapan iti panangpatanor ti panangipateg a maipaay iti organisasion ken iti tay-ak ti serbisio. Addanto met dagiti singasing no kasano a mapasayaat iti panagadalyo ti Biblia iti pamilia tapno dagiti annakyo ket mapatanorda iti nadekket a relasion ken Jehova.
6 Bayat dagiti uppat a napalabas tawtawen iti serbisio, adda 959,834 a tattao ti nabautisaran iti intero a sangalubongan, ken 31,383 kadagitoy ti adda kadagiti kongregasion ditoy Pilipinas. Nawadwad kadagitoy a tattao ti nakagteng iti punto ti dedikasion ken bautismo babaen iti tulong dagidiay a nangikondukta kadakuada iti panagadal ti Biblia iti pagtaengan. Dagiti timmabuno iti Memorial ken kadagiti kombension ti distrito iparangarangda nga adu pay laeng dagiti mabalin a matulongan nga agprogreso iti bautismo. Babaen ti agtultuloy a reggettayo a mangirugi ken mangikondukta iti panagadal ti Biblia kadagitoy, mabalin a matulongantayo pay dagiti adu nga agbalin a disipulo ken agbanag a magun-odda iti agnanayon a biag. (1 Tim. 6:12, 19) No ngarud ta awan pay iti panagadalyo ti Biblia iti agdama, aramidenyo kadi a personal a kalat ti mangirugi ken mangikondukta iti maysa bayat ti 1991 a tawen iti serbisio?