Paset 1—Panangikondukta Kadagiti Progresibo a Panagadal iti Biblia
Ania ti Panagadal iti Biblia?
1 Iti intero a lubong, agarup innem a milion a panagadal iti Biblia ti binulan nga ikonkondukta dagiti adipen ti Dios. Babaen ti panagusar kadagiti nasayaat a pamay-an ti panangisuro, matulongantayo dagitoy a mayad-adalan iti Biblia a rumang-ay agingga nga agdedikar ken agpabautisarda ken agbalinda a ‘makaanay a kualipikado a mangisuro iti sabsabali.’ (2 Tim. 2:2) Kayatyo kadi a tulongan ti iyad-adalanyo a rumang-ay? Mangrugi iti daytoy a ruar, itampok Ti Ministeriotayo iti Pagarian ti maysa a serye dagiti artikulo a mangilawlawag kadagiti kangrunaan nga aspeto ti panangikondukta kadagiti progresibo a panagadal iti Biblia.
2 No Kaano nga Ireport ti Panagadal iti Biblia: No regular ken sistematiko ti pannakisaritayo maipapan iti Biblia, uray apagbiit, nga us-usarenyo ti Biblia ken ti maysa kadagiti nairekomenda a publikasion, mangikonkonduktakayon iti panagadal iti Biblia. Pudno daytoy uray no iti ruangan wenno telepono a maang-angay ti panagadal. Mabalin nga ireport ti panagadal no naminduan a naikondukta kalpasan ti pannakaidemostrana ken no adda pamatianyo nga agtultuloy ti panagadal.
3 Ti broshur a Kalikaguman ken ti libro a Pannakaammo ti publikasion a mausar iti panangikondukta iti adu a panagadal iti Biblia. No nalpasen dagitoy, ket nalawag a rumangrang-ay ti iyad-adalanyo, uray no nabannayat, ken ap-apresiarenna ti maad-adalna, mabalin nga ituloy ti panagadal iti libro nga Agdayawkayo iti Dios. Mabalin nga usaren ti broshur a Mabalinmo ti Makigayyem iti Dios! no limitado ti adal wenno saan unay a makabasa dagiti iyadalanyo.
4 Ti trabaho a panangyadal iti Biblia ket epektibo iti panangtulong iti minilion a tattao nga agbalin a pudno nga adalan ni Jesu-Kristo. (Mat. 28:19, 20) No ipakatyo dagiti singasing kadagiti masanguanan nga artikulo iti daytoy a serye, makaikonduktakayo iti progresibo a panagadal iti Biblia.