Ti Libro nga Isursuro ti Biblia—Kangrunaan a Katulongantayo iti Panangyadal iti Biblia
1 Anian a ragsaktayo nga immawat iti libro nga Ania a Talaga ti Isursuro ti Biblia? iti “Panagtulnog iti Dios” a Kombension Distrito! Nagrag-o dagiti delegado nga immawat iti personal a kopiada idi nalpas ti programa iti Sabado. Kasano nga usaren daytoy baro a katulongan iti panangisuro? Nadisenio dayta a kas kangrunaan a katulongantayo iti panangyadal iti Biblia. Nupay maitampok pay nga umuna ti baro a libro kas literatura a tukon inton Marso, maiparegta kadagiti agibumbunannag nga usarendan a dagus dayta a mangirugi ken mangikondukta iti panagadal iti Biblia.
2 Dagiti Agdama nga Iyad-adalan iti Biblia: Dagiti agibumbunannag a mangyad-adal iti libro a Pannakaammo wenno ti broshur a Kalikaguman nasken a tingitingenda a naimbag no kasano ken kaanoda nga usaren a pangyadal ti baro a publikasion. No nabiit pay a nairugi ti panangyadal, mabalinyon nga irugi ti baro a libro. No nakaadayokayon iti libro a Pannakaammo, mabalinyo nga itultuloy ti panagadal iti kapitulo ti libro nga Isursuro ti Biblia a katupag ti kapitulo nga ad-adalenyo. No addakayon iti arinunos ti libro a Pannakaammo, mabalinyo nga ileppas dayta a publikasion.
3 Awan duadua nga amintayo ket adu ti am-ammona a tattao a mayat a magunggonaan iti panagadal iti libro nga Isursuro ti Biblia. Apay a diyo itukon ti panagadal iti Biblia iti tunggal tao nga usarenyo daytoy a katulongan iti progresibo a panangyadal? Kas pagarigan, dagidiay nayadalan iti broshur a Kalikaguman wenno ti libro a Pannakaammo ngem saan pay a nagdedikar ken nagpabautisar mabalin a kayatda nga ituloy ti agadal babaen ti panangusaryo iti baro a libro. Mabalin a kayat dagiti nagannak nga usaren ti publikasion a mangitukit iti umiso a pannakaammo maipapan iti pagayatan ti Dios kadagiti annakda.—Col. 1:9, 10.
4 Panangyadal iti Maikadua a Libro: Adda kadi urnos a mayadalan iti maikadua a libro ti iyad-adalantayo iti Biblia no nalpasnan ti Ania a Talaga ti Isursuro ti Biblia? Adda. No nabatad a rumangrang-ay, nupay nabannayat, ken apresiarenna ti maad-adalna, mabalin nga itultuloy nga iyadalan iti Biblia, nga usarenyo ti libro nga Agdayawkayo iti Maymaysa a Pudno a Dios. Agtalekkami a ti libro nga Isursuro ti Biblia ket makatulong unay kadatayo a mangitungpal iti pagrebbengantayo nga agaramid kadagiti adalan.—Mat. 28:19, 20.