Panangikondukta Kadagiti Progresibo a Panagadal iti Biblia iti Ruangan ken Babaen ti Telepono
1. Ania ti panggeptayo a mangyadal iti Biblia?
1 Anian a rag-o ti itden ti panangirugi iti panangyadal iti Biblia! Ngem ti panangbirok iti interesado nga agadal iti Biblia ket pangrugian laeng. Ti panggep ti panagadal isu ti panangtulong kadagiti tattao nga agbalin a pudpudno nga adalan ni Kristo. (Mat. 28:19, 20) Ania ti makatulong kadatayo a mangragpat iti dayta a kalat?
2. Ania ti panagadal iti Biblia iti ruangan ken babaen ti telepono, ken apay nga epektibo dagitoy?
2 Okupado a Tattao: Okupado unay dagiti tattao iti kaaldawantayo. Iti dadduma a lugar, manmano ti umanamong nga agadal iti Biblia iti uneg ti maysa nga oras. Tapno matulongantayo dagiti kasta a tattao, naiparegta kadatayo nga irugi ken ikondukta ti panagadal iti Biblia iti ruangan wenno babaen ti telepono. Iti damo, mabalin nga ababa dagitoy a panagadal ken sumagmamano laeng a teksto iti Biblia ti mailawlawag babaen ti maysa wenno dua a parapo iti publikasion a kas iti libro nga Isursuro ti Biblia. Makomendaran ta adu itan nga agibumbunannag ti mangikonkondukta iti panagadal iti Biblia iti ruangan wenno babaen ti telepono!
3. Apay nga ikagumaantayo a paaduen ti tiempo a busbosentayo iti panangyadal iti ruangan?
3 Ngem kontentotay kadin nga iti ruangan lattan ti pangyad-adalantayo? Saan. Nupay nainsiriban a ditay agbaybayag iti damo a panagadal iti ruangan, kuna ti Mayo 1990 a Ti Ministeriotayo iti Pagarian, panid 8: “Apaman a maipasdek ti panagadal ket interesadon ti bumalay, mabalin nga ibaybayag ti panagadal.” Nagpateg daytoy. Kas panangyilustrar: Iti damo, bassit pay laeng ti ipakantayo iti maysa a nabisinan nga ubing agingga nga adda ganasnan a mangan, ngem ditay namnamaen nga agsubli ti dati a pigsana ken dumakkel no kanayon a bassit ti ipakantayo. Umasping iti dayta, ti maysa nga estudiante iti Biblia kasapulanna ti napaspasnek ken regular a panagadal tapno agmataengan kas adipen ti Dios.—Heb. 5:13, 14.
4. Ania dagiti pagsayaatan ti panangyadal iti Biblia iti uneg ti pagtaengan?
4 Panangyadal iti Biblia iti Uneg ti Pagtaengan: Nasaysayaat ti mangyadal iti Biblia iti pribado a lugar—iti pagtaengan wenno iti dadduma pay a maitutop a lugar. Mas komportable ti agadal ken ad-adda a matarusan ti estudiante ti kababagas ti Sao ti Dios. (Mat. 13:23) Nalaklaka met nga ibagay ti mangyad-adal ti material a maadal iti kasapulan ti estudiante. Maysa pay, no nabaybayag ti panagadal, ad-adda a mailawlawag ken agbalin a makapabileg ti panangusig iti Sao ti Dios.—Roma 10:17.
5. Ania ti aramidentayo tapno ti panangyadal iti Biblia iti ruangan agbalin a panangyadal iti Biblia iti uneg ti pagtaengan?
5 Kasano a ti panangyadal iti Biblia iti ruangan agbanag a panangyadal iti Biblia iti uneg ti pagtaengan? Kalpasan ti sumagmamano nga ababa a panagadal, apay a diyo isingasing ti at-atiddog a panagadal, depende iti mapagnumuanyo a kapautna? Wenno iti saan a direkta a pamay-an, mabalinyo nga isaludsod, “Mabalin kadi nga agtugawta tapno adalenta daytoy?” wenno “Kasano kabayag ti kayatmo a panangadalta iti daytoy a topiko?” No saan a naballigi ti panangikagumaanyo, itultuloyyo lattan ti ababa a panagadal iti ruangan. Iti maitutop a tiempo, ikagumaanyonto manen nga isingasing ti at-atiddog a panagadal iti uneg ti pagtaengan.
6. Ania ti panggeptayo iti panangitungpaltayo iti ministeriotayo, ken kasano a dagiti singasing iti daytoy nga artikulo tulongannatayo a mangitungpal iti dayta a panggep?
6 Bayat nga itultuloytayo ti mangbirok kadagiti maikari, saantayo a liplipatan ti panggeptayo a mangirugi ken mangikondukta iti panagadal iti Biblia. Ti kangrunaan a kalattayo ket ti panangtulong kadagiti napudno ti panagpuspusoda a tattao nga agbalin a dedikado ken bautisado nga adipen ni Jehova. Sapay koma ta bendisionanna ti panangikagumaantayo a mangitungpal iti ministeriotayo iti daytoy a panggep.—2 Tim. 4:5.