Saludsod

◼ Rumbeng kadi nga agdalungdong ti kabsat a babai no adda kabsat a lalaki a kaduana a mangyadal iti Biblia iti ruangan?

No mangikondukta ti kabsat a babai iti regular ken nayeskediul a panagadal iti Biblia, rumbeng nga agdalungdong no adda kaduana a kabsat a lalaki. (1 Cor. 11:3-10) Kastoy ti nailawlawag iti Hulio 15, 2002 a ruar Ti Pagwanawanan, panid 27: “Maysa daytoy a nasaksakbay a nayurnos a sesion ti panangisuro a ti mangikonkondukta iti panagadal ket kinapudnona, mangidadaulo. Ti kasta a panagadal ket agbalin nga ekstension ti kongregasion. No ti Saksi a babai ti mangidaulo iti kasta a panagadal ket adda kaduana a Saksi a lalaki, maiparbeng laeng nga agdalungdong ti babai.” Agaplikar daytoy uray no ti panagadal ket maikondukta iti pagtaengan, iti ruangan, wenno iti sabali pay a lugar.

Iti sabali a bangir, no saan pay a naipasdek ti panangyadal iti Biblia, saan a masapul nga agdalungdong ti kabsat a babai no adda kaduana a kabsat a lalaki uray no ti panggep ti isasarungkarda ket mangidemostra iti panagadal iti Biblia wenno adalenda ti maysa a topiko iti maysa kadagiti publikasion a maus-usar iti panangyadal. Yantangay ti panagadal iti ruangan ket kaaduanna a maipasdek kalpasan ti sumagmamano a panagsarungkar, masapul nga ikabilangan dagiti agibumbunannag ti kasasaad ken nainkalinteganda koma iti panangikeddengda no kaanoda nga agdalungdong.