Agtultuloykayo nga Agbunga a Buyogen iti Panagibtor
1 Idi nagsurat iti kongregasion idiay Colosas, kurang a 30 a tawen kalpasan iti ipapatay ken panagungar ni Kristo Jesus, makuna ni apostol Pablo a ti kinapudno iti naimbag a damag ket agbungbunga ken rumangrang-ay iti amin a lubong. (Col. 1:5, 6) Iti lalo pay a naindaklan a kalawa ita, dagiti Saksi ni Jehova ti literal a nakagteng “iti kaadayuan a paset ti daga” babaen iti naimbag a damag ti Pagarian. (Ara. 1:8; Juan 14:12) Bayat iti 1989 a tawen ti serbisio, adda 5.6-porsiento a panagadu iti promedio ti bilang dagiti agibumbunannag iti Pagarian iti sangalubongan, ket naragpattayo ti baro a peak wenno kangatuan a 3,787,188 nga agibumbunannag iti 212 a pagilian!
2 Kadagiti pagilian a ti panangasaba maipapan iti Pagarian ti Dios ket nalappedan ken saan a kompleto dagiti report, mas nangatngato pay a panagrang-ay a 7.6 a porsiento iti naireport! Iti sidong dagiti nagadu a problema kadagita a dagdaga, dagiti agibumbunannag ti nagtultuloy a “nagbunga a buyogen iti panagibtor.” (Luc. 8:15) Kadagiti dadduma a lugar ti pakarigatan ket naksayan, ngem ti narikut a kasasaad isut’ agtultuloy nga awan panagbaliwna iti dadduma a pagilian.
3 Kadagiti pagilian a dakdakkel ti wayawaya a mangitultuloy iti panangikasaba ti Pagarian nga aktibidad, naipasango dagiti naiduma a problema. Nawadwad dagiti masabet a di panangikankano ken kinaindiperente, nangruna kadagiti lugar a nawadwad ti material. Masapul nga agannad dagiti adipen ni Jehova a saanda koma a tumulad iti kasta a kababalin. Ditay kayat iti intereses ti material, ragragsak, panaglinglingay, ken dadduma pay a makasinga nga isudat’ manglapped kadagiti teokratiko nga aktibidadestayo. Ta no kasta agbalintayo nga indiperente ken mapaaytayo a mangipateg iti kasapulan nga agtultuloytayo nga agbunga a buyogen iti panagibtor.—Luc. 21:34-36.
KASAPULAN TI IBTOR KEN GANETGET
4 Ti panagibtor isut’ maysa a kasapulan iti sidong ti maipasango nga ibubusor iti naimbag a damag wenno adda laeng relatibo a wayawaya a mangitultuloy iti Kristiano a responsabilidadtayo. Iti dadduma a dagdaga, dagiti kakabsattayo ti agtartrabaho iti napeggad a kasasaad iti adun a dekada. Ti panagibtorda iti sidong ti kasta a kasasaad isut’ nagkurri a maipaay iti aprobado a kasasaad, nga itan ket agapitda iti nabaknang a bendision. (Roma 5:3-5; Gal. 6:9) Aniaman a rigat iti maipasabat kadatayo, kayattayo ti agtultuloy nga agandor. Masapul a maited iti pammaneknek ti Pagarian, ket masapultayo amin ti agtultuloy a mangidemostra iti kinatarnawtayo. Babaen ti panagibtor iti biangtayo, masaluadan ti kararuatayo, wenno biagtayo.—Mar. 13:10; Luc. 21:19.
5 Mabalintayo nga idemostra a ditay laglag-anen dagiti espiritual a bambanag babaen ti kinagagettayo iti serbisio ni Jehova, a ditay agkapoy iti trabaho a panangasaba. Kadagiti dadduma a dagdaga a narigrigat iti transportasion, a nakirang iti material a kasapulan, ken adda problema iti ekonomia, awan panagsarday iti panangikasaba iti naimbag a damag. Sumagmamano kadagita a pagilian, dagiti agibumbunannag ti kongregasion iti regular a nakapromedio iti 14 aginggat’ 17 nga oras iti tay-ak ti serbisio iti kada bulan. Ti ranggo dagiti payunir ti agtultuloy met nga umadu. Daytoy koma ti mamagsarimadeng ken mamagpanunot kadatayo nga aduan iti material a pagnam-ayan. Mabalintayo kadi a paaduen iti regular a pannakiramantayo iti kapatgan a panangikasaba iti Pagarian ken panagaramid iti adalan a trabaho?
MAKAARAMIDTAYO KADI ITI AD-ADU?
6 Iti panangbusbos ti ad-adu a tiempo iti tay-ak ti serbisio kasapulanna iti bassit laeng a panangihusto ti iskedioltayo. No maysa laeng nga oras ti mausartayo iti tay-ak ti ministerio iti Domingo, mabalintayo kadi a paatiddogen dayta a tiempo babaen ti panangusar iti sabali pay nga oras nga agsarungkar wenno mangidaulo iti panagadal ti Biblia? Wenno no mangidaulotayo iti panagadal ti Biblia, mabalin aya a mairaman iti maysa wenno nasursurok nga oras iti panagbalaybalay a serbisio wenno mangaramid iti sumagmamano a sarungkar sakbay iti panagadal? Iti Sabado kalpasan ti panangusar iti dua nga oras a panagmagasina, nalabit a maidagastayo dagiti magasina kadagiti rota a naipasdektayo wenno padasen iti sumagmamano a panagbisita. Dagidiay agnanaed kadagiti siodad ti makaisarak iti kombeniente a tiempo a mausar iti panangasaba iti lansangan. Kadagitoy ken iti dadduma pay a wagas, mabalintayo a maparang-ay ti pannakipasettayo iti tay-ak ti serbisio. Agresulta daytoy iti kalalainganna a panangrang-ay.
7 Ti ad-adu a tiempo iti tay-ak ti serbisio nga agsarungkar ti awan duadua nga agresulta iti ad-adu a panagadal ti Biblia a maikondukta. Inton agtanoy kaipapananna daytoy iti ad-adu a tattao a maiyeg iti kinapudno ken tumulongda met kadatayo a mangiringpas iti panangasaba a trabaho.—Mat. 28:19, 20.
NASKEN TI KARARAG
8 Tapno agtultuloytayo nga agbunga a buyogen iti panagitured, masapul a dawatentayo iti bendision ni Jehova ken agpaiturongtayo iti espirituna. Aramidentayo ti ministeriotayo a danggayan iti kararag ken Jehova. No ikararagtayo ken Jehova maipapan iti tay-ak ti aramidtayo, maipalagip a datayo dagiti katrabahadorna. (1 Cor. 3:9) Babaen iti tulong ni Jehova, maibtorantayo iti ministerio agpapan pay no saan a makita a madagdagus iti resultana. Iti dadduma a deppaar, ti iyaadu isut’ dumteng laeng iti kalpasan iti adu a tawtawen a matalek a panagibtor iti biang dagiti manangiwaragawag iti Pagarian. Bayat a kumitatayo iti masanguanan, kanayon a nasken iti panangsapul iti nadiosan a panangiwanwan ken tulong tapno ditay agkapoy ngem maibanagtayo a naan-anay iti ministeriotayo. (2 Tim. 4:5) Nawadwad pay laeng iti bunga a mapataud iti panangikasaba iti Pagarian ken panagaramid iti adalan a trabaho.
9 Impaganetget ni Jesus iti kasapulan a maipaay iti awan sardayna a panagkararag. (Luc. 18:1) Imballaag ni Pablo: “Agkararagkayo iti awan ressatna.” (1 Tes. 5:17) Adda dagiti naganat a rason a maipaay iti awan sardayna a panagkararag itan. Adu a responsabilidad ti nasaklaw iti panangtaripato iti rumangrang-ay nga arban iti tinawentawen. Kayattayo a matulongan dagiti dadduma nga agpataud ti bunga a buyogen iti panagibtor. Masapul a maipaay iti asikaso kadagiti nagduduma a kasapulan iti tunggal agibumbunannag ken iti intero nga organisasion. Ti pannakakita iti kasapulan a panagdonar a mangsuportar iti trabaho ken ti agtultuloy a panangipablaak iti publikasion dagiti naibasar ti Biblia a literatura agingga iti kabaelan, kayattayo nga ikararag ken Jehova nga agtultuloy ti panangtignayna kadagiti managbuteng iti Dios a tattao nga agbalinda koma a natulong iti daytoy.—2 Cor. 9:8-11.
10 Bayat a dagiti benneg iti sangalubongan a tay-ak ket malukatan a maipaay iti teokratiko a panagrang-ay iti mas nalawlawa pay ngem iti napalabas, ti Nainkasuratan a pammagbaga iti Colosas 4:2 ti lalo a nabagbagas itan ti kaipapananna: “Agibtorkayo iti panagkararag, agtalinaedkayo a siririing iti daytoy a buyogen iti panagyaman.” Dagiti kararagtayo ti maipaay koma iti kakabsattayo iti uray sadino a lugar nga agtultuloyda koma nga agbunga, a tulonganda dagiti marakarnero a tattao a nasarakanda idiay teritoria a ti panangasaba ket pudno a narigrigat iti napalabas.
IPARANGARANG ITI PANAGYAMAN
11 Anian a yamantayo iti nawadwad a naespirituan a parabor a sagsagrapentayo! Kayattayo a pagyamanan ni Jehova kadagitoy, ket ikararagtayo iti agtultuloy a bendisionna iti trabaho ti matalek nga adipenna ken iti Manarawidwid a Bagi. Ti napakumbaba, awan sarday a regtada a maipaay a pagimbagantayo ken dagiti marakarnero a tattao iti intero a lubong ti maipateg unay.
12 Iti panagmula ti bin-i iti Pagarian, nawadwad a bilang iti literatura ti nalpasen a naipaima. (Mat. 13:3-8, 18-23) Kaskasdi, agtultuloy pay laeng iti panaggarasugas a maipaay iti Biblia ken iti literatura ti Biblia idiay tay-ak. Ipakita iti sangalubongan a report a nawadwad a panangkultibar ken panagsibug iti porma dagiti panagsarungkar ken panagadal ti Biblia iti naaramid. Bayat nga itultuloy iti pasettayo kadagitoy a nasken a benneg iti ministeriotayo, agyamantayo ken Jehova iti agtultuloy a bendisionna a nangparang-ay iti amin a bambanag. Ngarud, ikararagtayo pay dayta a bendision.—1 Cor. 3:6, 7.
DADDUMA A KASAPULAN
13 Gapu iti kaaddatayo iti daytoy a lubong nupay saantayo a paset daytoy, dagiti Kristiano ti agtultuloy a mapasanguan iti pakasuotan ken pakarigatan, a dagitoy ti kumarkaro iti maudi nga al-aldaw. Dadduma itan ti agsagsagaba iti pannakaidadanes wenno sabsabali a pakarigatan. Masapul nga itultuloy dagiti dadduma iti Kristiano nga aktibidadesda iti sidong dagiti rinebba iti gubat a dagdaga. Napadasan dagiti kakabsattayo iti didigra a kas iti ginggined, bagio, ken allawig. No mapasamak dagitoy, ikararagtayo dagiti kakabsattayo kadagitoy a luglugar. (Maidilig iti Aramid 12:5; 2 Corinto 1:11.) No dadduma kasapulan iti umasug wenno agsurat kadagiti opisiales iti nangato a pagsaadan maipapan iti pannakalapped ti trabahotayo, pannakaidadanes iti kakabsattayo, wenno dadduma pay a bambanag a mangapektar iti intereses ti Pagarian. Iti sidong dagiti kakasta a sirkumstansia, aramidentayo no ania iti personal a kabaelantayo, ken idatag dagiti ararawtayo iti tunggal maysa a paboranda koma dagiti padatayo nga adipen.—1 Tim. 2:1, 2.
14 Adu dagiti pakasikoran a maiyeg kadagiti pamilia nga agbibiag iti daytoy dakes a lubong ni Satanas. (2 Cor. 4:4) Dagiti naasawaan ti mapasanguan kadagiti serioso a problema. Masapul a maparegtada nga agkararag a maipaay iti nadiosan a giya, ken mabalin nga ikararagantayo met ida. (1 Cor. 7:5; 1 Ped. 3:7) Ipateg koma dagiti ulo ti pamilia a ni Jehova ket imdenganna iti napasnek a kararagda a maipaay iti pannakaiwanwan a mangimaton a naimbag iti sangakabalayanda. (Oc. 13:8; Fil. 4:6, 7) Dagiti agtutubo ken nataengan ket agpadpadada a mapasanguan kadagiti pakasuotan a kasasaad. Nalabit a mapagteng dagitoy idiay pagadalan, panggedan, iti biahe, ken dadduma pay a sirkumstansia. Ti kararag isut’ bumadang kadatayo a mangresiste iti espiritu daytoy dakes a lubong ken tapno agtultuloytayo nga agbunga bayat a masalimetmetantayo nga aramiden no ania daydiay makaay-ayo iti saklang ti Dios.—Mat. 6:13; Efe. 6:13-18; 1 Juan 3:22.
15 Ni Jehova isut’ naindaklan a Managdengngeg iti kararag. (Sal. 65:2) Iti amin a tiempo masapul nga isadagtayo kenkuana iti amin a pakasikorantayo. (Sal. 55:22) Adda gundawaytayo a mangipakita iti pannakaseknantayo babaen iti kararag a maipaay iti amin nga intereses ti Pagarian ken pagsayaatan iti amin a kakabsat iti sadinoman. Babaen ti panangisilnag iti trabaho dagidiay mangidadaulo iti kongregasion ken dagiti manangimaton iti sangalubongan a programa iti ilalawa, no makilangentayo kadagidiay a masakit iti espiritual, wenno no taripatuen iti problema dagiti dadduma nga uray nalag-an wenno nadagsen, amintayo ti masapul a mangisaklang kadagitoy a bambanag ken Jehova a buyogen iti kararag. (1 Tes. 5:25; Sant. 5:14-16) Wen, dagiti pakadanagantayo ti masapul a maipabaklay ken Jehova a buyogen iti talek nga uray ania a dawatentayo a maitunos iti pagayatanna, isut’ dumngeg kadatayo. (1 Ped. 5:7; 1 Juan 5:14) Sapay koma ta agregtatayo iti serbisio ti Pagarian ken agtultuloy a kumita ken Jehova a tumulong kadatayo nga agtultuloy nga agbunga a buyogen iti panagibtor.