Ania ti Ar-aramiden Dagiti Annakyo idiay Pagadalan?
1 Ita ta nakagteng manen dagiti agtutubotayo iti tawen ti panageskuela, kasanoda a masaranget iti karit ti panagserbi ken Jehova iti sidong dagiti suot ti kinatarnawda? Kasanoyo a nagannak a masaluadan dagiti annakyo kadagiti maipasango kadakuada a pakasuotan?
USAREN ITI SCHOOL A BROSHUR
2 Ti School a broshur isut’ nadisenio a mangidatag a sibabatad kadagiti maestro maipapan iti patpatien ken ar-aramid dagiti Saksi ni Jehova a maisinggalut iti aktibidades iti pagadalan. Mangipaay met iti giya a pagsurotan maipapan iti nagkaykaysa a takder dagiti Saksi ni Jehova no maipapan iti moral a kondukta.
3 Kadagiti adu nga agtutubo daytoy a broshur ti nagbalin a pudno a saluad kadakuada. Kas ehemplo, maysa a Saksi a naganak ti nakadamag a naited dagiti lektura iti edukasion ti sekso kadagiti estudiante babaen dagiti tattao a nababa ti moralda. Babaen iti broshur nga adda kenkuana, inlawlawag ti naganak iti panagtukkiadna ket naaramid iti pannakabaliw ti klase iti anakna.
4 Nawadwad ti maaramidan dagiti nagannak a tumulong iti annakda a “mangaramid ti depensa iti saklang ti siasinoman” nga agsaludsod kadakuada. (1 Ped. 3:15) Iti dadduma a kaso iyiskediol dagiti nagannak ti sagpaminsan a panagbisitada iti pagadalan tapno kasaoda ti maestro. Daytoy a personal nga interes ti mangpairut iti singgalut ti naganak ken anak. Dadduma ti makikatugaw pay bayat iti diskusion idiay kuarto ti klase no daytoy ket maipalubos.
AGBALINKAYO A SAKSI ITI KADA ALDAW
5 Maysa nga agtutubo a Saksi idiay Colorado ti nagkiddaw iti maestrana a tulonganna kadagiti narigatna a maawatan a sasao bayat a basaenna iti kada aldaw daydiay Panangsukimat Kadagiti Kasuratan iti Inaldaw-aldaw. Iti maysa nga aldaw nadlawna a naawan daydiay bokletana. “Binulod” gayam ti maestrana idi nagawid a nasapa gapu ta adda sakitna. Saanna a kayat a malanganan iti panagbasa ti teksto.
6 Ti positibo a panangmatmat a buyogen iti nagaget a panagsagana isut’ tumulong nga agpadpada kadagiti nagannak ken annak a ‘bariksan ti panunotda a maipaay iti trabaho’ bayat iti tawen ti panageskuela.