Panagseserrek Manen

¹ Bayat ti Hunio mangrugi manen iti baro a makatawen a panageskuela dagiti agtutubotayo. Addada bambanag a makaparagsak a padaanan, ngem adda met sumagmamano a bambanag a pakadanagan. Adu nga agtutubo ti maituding iti nagduduma a maestro/maestra, agpalista kadagiti baro a kurso, ken makitimpuyog kadagiti di am-ammo nga estudiante. Kayat dagiti agtutubotayo ti makitinnulong kadagiti autoridad ti eskuelaan ken agbalin a mannakigayyem kadagiti padada nga estudiante, ngem masapul nga agannadda iti aniaman a makadangran iti espiritualidadda.—1 Cor. 15:33.

² Maysa a kangrunaan a pakaseknan dagiti Saksi nga annak ken agtutubo isu ti panangliklik iti makaakar nga impluensia ti lubong, a naigamer ita iti edukasional a sistema. Masapul a natured dagiti Kristiano nga agkedked iti nailubongan a pagalagadan ken kapanunotan nga agdama ita a maitantandudo maipapan ti moral, ket masapul nga ‘agaluadda’ babaen ti kanayon a panagkonsulta ken panagpaidalanda iti Sao ni Jehova. (Sal. 119:9) Masapul a maammuan dagiti maseknan a nagannak no ania ti mairaman iti kurikulum ti eskuelaan tapno umiso a maidalanda dagiti annakda. No maisupadi iti kinasanto ken makiddaw a kinadalus kadagiti adipen ni Jehova ti maisuro iti eskuelaan, masapul a liklikan.—1 Ped. 1:15, 16.

³ Gagangay met a maipasango kadagiti isyu a mainaig kadagiti nasionalistiko a seremonia, panangrambak kadagiti piesta, ay-ayam, wenno sosial a taripnong. Makatulong ti broshur a Dagiti Saksi ni Jehova ken ti Edukasion kadagiti agtutubo maipapan kadagitoy a bambanag. Maksayan dagiti narikut a situasion no umasideg dagiti nagannak dagiti ubbing kadagiti mannursuro nga addaan iti kopia daytoy a publikasion. Mabalin nga ilawlawagda a tumulong daytoy iti maestro/maestra a mangtarus no apay a pilien dagiti Saksi ni Jehova ti saan a makipaset kadagita nga aktibidad. Dakkel ti maitulong daytoy a mamataud iti espiritu ti panagtitinnulong.

⁴ Mainayon pay, nasayaat no dagiti Kristiano nga estudiante adda bukodda a broshur nga Edukasion a kadua dagiti material a maadal iti eskuelaan. Masansan a tumaud dagiti oportunidad a mangasaba kadagiti dadduma nga estudiante nga agsaludsod no mapagsasaritaan ti pammatitayo. Kasta met, itugot koma dagiti annak a Saksi iti amin a tiempo dagiti napetsaan nga Advance Medical Directive/Release card wenno Identity Card, umiso a nasaksian, ken napirmaan. Dagidiay mangalagad kadagitoy a pammagbaga ket sigurado a maipada iti ‘manakem a tao a makadlaw iti kalamidad ket rugianna ti aglemmeng.’—Prov. 22:3.