Agtutubo—Gundawayanyo ti Panageskuelayo
1 Komusta ti panageskuelayo ita ta sumrekkayon iti maikatlo a bulan ti panageskuela iti daytoy a tawen? Ikagkagumaanyo kadi ti agadal a naimbag? Gunggundawayanyo kadi dagiti oportunidad nga ipaay kadakayo ti eskuelaan tapno maiburayyo ti kinapudno kadagiti kaklase ken mannursuroyo? Agtalekkami a kayatyo nga aramiden amin a kabaelanyo idiay eskuelaan.
2 Lalaingenyo ti Agadal: No nakasaganakayo a naimbag no mapankay ageskuela ken atentibokayo, magun-odyo dagiti manayon a gunggona. Gagetanyo nga asikasuen dagiti homework-yo, ngem diyo ipalubos a singaen ti panageskuelayo dagiti teokratiko nga aktibidadyo.—Fil. 1:10.
3 No diyo pay binasa, basaenyo ti broshur a Dagiti Saksi ni Jehova ken ti Edukasion. Kalpasanna, ikkanyo koma wenno dagiti dadakkelyo iti sinaggaysa a kopia dagiti mannursuroyo. Ibagayo kadakuada a masungbatanto ti aniaman a saludsodda. Daytoy ti tumulong kadakuada tapno ad-adda a matarusanda dagiti prinsipio ken pammatiyo ket makikooperarda kadakayo bayat nga iyaplikaryo ti naisuro kadakayo. Dayta met ti mangipatalged kadagiti mannursuroyo a tarigagayanyo ken dagiti dadakkelyo ti makikooperar kadakuada bayat a tulongandakayo a gumun-od iti napateg nga edukasion.
4 Agbalinkay a Nasayaat a Saksi: Apay a diyo ibilang ti eskuelaan kas personal a teritoriayo para iti di pormal a panangasaba? Iti sumaganad a tawen ti panageskuela, addaankayto kadagiti naisangsangayan a gundaway a mangasaba. Ik-ikutanyo ti nakaskasdaaw a naespirituan a pannakaammo a no mairanud, mabalin a ‘mangisalakan agpadpada kadakayo ken dagidiay agimdeng kadakayo.’ (1 Tim. 4:16) Babaen ti panangtaginayon iti mapagulidanan a Nakristianuan a kababalin ken panangasaba iti aniaman a maitutop a tiempo, magunggonaankay a mismo ken dagiti sabsabali.
5 Nangasaba ti maysa nga agtutubo a kabsat iti di pormal kadagiti padana nga estudiante idiay eskuelada. Kadagidiay dimngeg, adda maysa a Katoliko, maysa nga ateista a manguy-uyaw kadagidiay mamati iti Dios, ken maysa nga agtutubo a mannigarilio ken mangnginum. Iti pakadagupanna, daytoy nga agtutubo a kabsat natulonganna nga agdedikar ken agpabautisar ti 15 a kapatadanna!
6 Gapuna, dakayo nga agtutubo, ikagumaanyo ti agadal ken mangasaba iti naisangsangayan a teritoriayo. Iti kasta matagiragsakyo ti kadaklan a gunggona iti panageskuelayo.