Nakasaganakayo Kadin a Sumrek iti Eskuelaan?
1. Ania dagiti oportunidad nga agur-uray kadakayo bayat a sumrekkayo iti eskuelaan?
1 Dakayo nga agtutubo a Kristiano ket maipaspasango kadagiti baro a karit ken impluensia agdadamo man wenno nabayagkayon nga ages-eskuela. Ngem addaankayo met kadagiti baro nga oportunidad a ‘mangsaksi iti kinapudno.’ (Juan 18:37) Nakasaganakayo kadin a naimbag a mangipaay iti panangsaksi?
2. Kadagiti ania a wagas a nakasaganakayon a sumrek iti eskuelaan?
2 Tapno agballigikayo iti tunggal aspeto ti biag, immawatkayo iti adu a pannakasanay manipud ken Jehova, manipud kadagiti dadakkelyo, ken manipud iti matalek ken masirib nga adipen. (Prov. 1:8; 6:20; 23:23-25; Efe. 6:1-4; 2 Tim. 3:16, 17) Awan duadua nga ammoyon no ania dagiti karit a pakaipasanguanyo iti eskuelaan. Gapu ta addaankayon iti nadiosan a pannakasanay ken ammoyon ti kasasaad a pakaipasanguanyo, agsaganakayo a mangipaay iti panangsaksi. (Prov. 22:3) Utobenyo a naimbag dagiti instruksion ken dagiti makatulong a Nainkasuratan a singasing a masarakan iti dua a tomo ti libro nga Agimtuod Dagiti Agtutubo kasta met dagiti nainaig nga artikulo a regular a maipabpablaak iti Agriingkayo!
3. Kadagiti ania a wagas a makaipaaykayo iti panangsaksi?
3 Ti naisangsangayan a teritoriayo ikkannakayo iti gundaway a mangipaay iti panangsaksi iti adu a wagas. No mapaliiw dagiti sabsabali ti mapagwadan a panagkawkawes ken panaglanglangayo, ti kababalin ken panagsasaoyo, ti panangraemyo kadagiti kaeskuelaan ken mannursuroyo, ken uray dagiti gradoyo, ken mapaliiwda nga adda natibker a pamuonyo iti biag, mabalin nga isaludsod dagiti dadduma, “Apay a nagpaidumaka?” (Mal. 3:18; Juan 15:19) Mabalin a maluktan ti gundawayyo a mangasaba ken mangilawlawag kadagiti patpatienyo. (1 Tim. 2:9, 10) Iti intero a tawen, mabalin a maipasangokayo kadagiti karit kas kadagiti nasionalistiko a seremonia ken selebrasion. No saludsodenda no apay a saankayo a makipaspaset, ti laeng kadi ibagayo ket, “Maiparit ngamin iti relihionmi; Maysaak a Saksi ni Jehova,” wenno aprobetsarenyo ti gundaway a mangikasaba iti maipapan iti naayat nga Amayo a ni Jehova? Ti nasayaat a panagsagana babaen ti panangiwanwan ni Jehova pagbalinennakayo a natured a mangasaba kadagiti mannursuroyo, kaeskuelaanyo, ken dadduma pay.—1 Ped. 3:15.
4. Apay a manamnamayo nga addaankayo iti naballigi a tawen iti panageskuelayo?
4 Uray pay no medio agnernerbioskayo a mapan ageskuela, kayatmi a maammuanyo nga adukami a mangsupsuporta kadakayo ta kayatmi nga agballigikayo iti panageskuelayo. Kanayonanna, makipagragsakkami kadakayo ta addaankayo kadagiti gundaway a mangipaay iti panangsaksi iti naisangsangayan a teritoriayo. Gapuna, agbalinkayo a natured ken agsaganakayon a sumrek iti eskuelaan!