Tulongan Dagiti Annak iti Napusuan a Panagserbi ken Jehova
1 Indeklara ni Salomon a “dagiti annak ket tawid manipud ken Jehova.” (Sal. 127:3-5) Adda inted ti Dios a responsabilidad iti nagannak nga isut’ panangisuro ken panangdisiplina ti annakda. Ramanenna daytoy ti panangsanay kadakuada iti ministerio, a paregtaen ida nga agsao manipud ti pusoda maipapan ken Jehova.—Efe. 6:4.
2 Manipud kaano nga edad a masapulen a sanayen dagiti nagannak iti annakda? Nabatad iti sungbat ti Biblia: Isut’ manipud kinamaladaga. (2 Tim. 3:14, 15) No nasapsapa iti pannakasanayda, dakdakkel ti namnama a dagiti annak ket mapatanor iti solido a pundasionda ti kinapudno ken pagbalinenda iti ministerio a kas bokasion wenno trabahoda. Daytoy a nasapa a panangsanay ti agserbi met a saluad kadakuada manipud iti nailubongan a panunot ken kababalin.
3 Adu dagiti saan pay a simrek iti pagadalan ti nangipasimudaag iti laingda a mangaramid ti nagduduma a kabaelan. Daytoy a potensial a maipaay iti panagadal manipud ti kinaubing isut’ masapul koma a mangiturong iti panangsanay a paglaingan a mangyeg kadakuada ti anamong ni Jehova. (w88 8/1 p. 15; w89 12/1 p. 31) Adu dagiti adda iti kinaganus ti nagprogreso agingga iti panagbalinda a saan pay a bautisado nga agibumbunannag. Adu dagiti agtutubo ti nagdedikar ken nagbautisar sakbay a nagbalinda a teenager wenno nagedad ti trese. Nanglukat daytoy kadakuada iti dana ti panagserbida kas auxiliary payunir wenno regular payunir sakbay pay a nagraduarda iti pagadalan.
4 Adu nga adulto ti mangmatmat iti agtutubo kadagitoy nga aldaw a kas nadursok ken saan a naraem ti nalabit a saan a dumngeg iti maysa nga agtutubo a sumarungkar idiay ruanganda. Ania iti mabalin a makuna ti maysa nga agtutubo a pangparukma iti daytoy? Maysa nga agtutubo nga agibumbunannag ti nangusar iti kaasping daytoy: “Naimbag a bigatyo, ti naganko isut’․․․․․․․․. Simmarungkarak kadagiti kaaruba ita agsipud ta adu dagiti maseknan maipapan iti masakbayan. Kas maysa nga adulto wenno nataengan, sigurado nga ad-adu ti kapadasanyo maipapan iti bambanag ti panagbiag ngem iti siak. Nupay kasta, adtoy ti maysa a kasuratan a makaliwliwa kadatayo amin.” Kalpasan a mabasa iti Apocalipsis 21:3, 4, ti saritaan isut’ maiturong iti tract a Biag iti Maysa a Natalna a Baro a Lubong.
5 Daytoy ti sabali a singasing: “Komustakayo, ti naganko isut’․․․․․․․․. Sumarungkarak laeng iti mabiit kadagiti kaaruba agsipud ta ammok nga adu dagiti adulto wenno nataengan ti maseknan maipapan iti kababalin dagiti agtutubo kadagitoy nga aldaw. No dadduma dagiti agtutubo ket saanda a nadayaw. Ngem adtoy ti maysa a kasuratan a mangipakita no kasano nga iti masakbayan makaadalton ti tunggal maysa a tao iti panagbiag a sangsangkamaysa a buyogen ti talna.” Kalpasanna basaen ti Salmo 37:11 ken komentuan iti maitutop. No dagiti bumalay ket mangngegda ti kakastoy a napasnek nga ebkas iti agtutubotayo nga agibumbunannag, sigurado nga adu kadakuada ti magutugot a dumngeg.
6 Rinibo dagiti agtutubo nga agibumbunannag ti makiramraman a sireregta iti panangikasaba ti Pagarian a trabaho. Masapul a makomendaranda. Dagiti agtutubo a masanay manipud kinamaladagada babaen dagiti nadiosan a nagannak isuda ti sidadaan a mangipangag iti pammaregta a makipaset a naan-anay ti ministerio. Dagidiay adda iti pagadalan ti addaan iti nagpaiduma a gundaway a mangasaba nga agpadpada kadagiti kaeskuela ken maestroda.
7 Gapuna a tulonganyo dagiti agtutubo nga agibumbunannag iti kongregasionyo nga agserbi ken Jehova a buyogen ti agkabannuag a pigsa, nga agdayawda kenkuana iti napusuan.—Ecl. 12:1.