Panangsaranget iti Karit ti Ministerio
1 Ti panagbalaybalay ket mangipasango iti napaypayso a karit kadagiti adu a makipaset iti nadalus a panagdayaw. Ngem ti napaypayso nga ayat ken Jehova tulonganna ti maysa a tao a mangsaranget iti daytoy a karit ken adu ti sigsigud a managbabain a rimmang-ay pay ketdi a nagbalin nga amin-tiempo a manangaskasaba.
2 Nalawag iti Biblia nga inkaskasaba dagidi immuna a Kristiano ti Pagarian iti binalaybalay. (Ara. 5:42; 20:20, 21) Kasta met laeng ti aramidentayo itatta nupay mabalin a didatay ikaskaso, rurodendatayo, wenno direkta a busorendatayo.
3 No Aniat’ Maaramidan ti Panangsaranget iti Karit: Tunggal mangasabatayo, agimulatay iti sumagmamano a bin-i ti kinapudno, tangay ammotayo a mabalin nga agbunganto dagiti dadduma inton agangay. (Ecl. 11:6) Agbalbaliw dagiti indibidual a kasasaad, a mabalin a dayta ti mamagpanunot iti bumalay maipapan iti naibaga ti maysa kadatayo ket nasaysayaatton ti panangipangagna iti sumaganad nga ibibisitatayo.
4 Ti ministeriotayo ipaayanna iti gundaway dagidiay agduyos iti kinalinteg tapno maam-ammoda ni Jehova. Siaayat a ballaaganna dagidiay agtarigagay kadagiti nailubongan a ragragsak a nasken nga agbalbaliwda tapno magun-odda ti anamong ti Dios. Ipakaammona met ti nagan ni Jehova ken mangidayaw kenkuana, dumngeg man dagiti bumalay wenno saan.—Ezeq. 3:11.
5 Ti panagtrabaho iti ministerio tulongannatay met a mangpatanor kadagiti bunga ti espiritu. (Gal. 5:22) Tulongannatayo nga agbalin a napakumbaba ken mannakipagrikna. Ti panagtalinaed nga okupado iti trabaho ni Jehova isut’ mangsaluad kadatayo iti lubong.—1 Cor. 15:58.
6 Bayat nga agbalaybalaytayo, pribilehiotay nga irepresentar ni Jehova a Diostayo. Ania pay ti dakdakkel a dayaw a magun-od ti asinoman no saan a ti panagbalin a katrabahuan ti Dios? (1 Cor. 3:9) No agpannuraytayo kenkuana, ti espirituna ti tumulong kadatayo a mangsaranget iti karit ti panagbalaybalay a ministerio.