Panagbalaybalay nga Awanan Sarday
1 Idi kadaanan nga Israel, dagiti sakripisio ti inaldaw a maidaton. (Exo. 29:38-42) Ita, nakiddaw kadatayo “nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.” (Heb. 13:15) Agdatontayo ken Jehova babaen ti panangidayaw kenkuana iti awan sardayna.—Isa. 43:21; Ara. 5:42.
2 Insuro ni Kristo Jesus no kasanotayo nga ipaay iti nadalus a panagdayaw babaen ti panangidaton kadagiti sakripisio a pakaidayawanna. Ammona a ti kaimbagan a wagas a mangdanon kadagiti tattao babaen ti naimbag a damag isut’ pannakisao kadakuada a mismo kadagiti pagtaenganda. (Mat. 10:7, 12) Gapuna a masarakantayo a dagiti apostol ket sinurotda ti naipaltiing a panangiwardasna a mangasaba kadagiti balaybalay.—Ara. 20:20.
3 Awan giddiatna kadagitoy nga aldaw. Kas disipulo ni Jesus, dagiti pudno a Kristiano surotenda ti ehemplona babaen ti panangikasaba ti naimbag a damag iti balaybalay. Nupay mababalaw ken maidadanestayo iti dayta, minilion ti nakaadal iti kinapudno ken ginasut a ribo dagiti baro a disipulo a makitimtimpuyog iti dakkel nga umariwekwek iti kada tawen, a mangted ti ebidensia a daytoy ti wagas ni Jehova a mangibanag iti pagayatanna. Dayta ti gapu a makaanustayo iti ministerio.
4 Magunggona iti Panagbalaybalay a Panangasaba: “Ti Dios saan a mangidumduma . . . Anamonganna ti tao nga agbuteng kenkuana ken agaramid iti kinalinteg.” Ti ipapan iti kada balay idiay teritoriatayo ipakitana ti saan a panangidumduma, a maited iti tunggal maysa ti maipada a gundaway a dumngeg iti damag ti Pagarian. Dagidiay mangipangag umawatda ti personal a tulong kas maiyataday iti kasapulanda.
5 Gistay amin nga agibumbunannag, agraman agtutubo, nataengan, ken dagidiay agdadamo, ti makipaset iti panagbalaybalay a trabaho. Iti kastoy a wagas tunggal maysa ti mangaramid “iti publiko a panangideklara maipaay iti pannakaisalakan.” (Roma 10:10) Ti pannakiraman iti dadduma iti balaybalay a ministerio ti mangreppet kadatayo iti singgalut ti ayat ken panagkaykaysa. Kabayatanna, maipaaytayo ti oportunidad a mangipamatmat ti panagibturtayo no masabettayo ti di panangikankano ken ibubusor. Ipakita dagiti bambanag a binendisionan ni Jehova ti panagbalaybalay a trabaho ken us-usarenna dayta a mangurnong iti dakkel nga umariwekwek iti “balay” ti nadalus a panagdayaw.—Isa. 2:2-4.
6 Agtultuloytayo koma a mangasaba iti balaybalay nga awanan sarday agingga a kunaen ni Jehova nga umdasen. (Isa. 6:11) No aramiden dayta, magunggonaantayo iti rag-o nga aggubuay manipud pannakiraman iti dayta a trabaho.—1 Cor. 15:58.